Jeremia 21 - Herero Revision Bible (HRR)

Omazuvarisiro womahaverero wa Jerusalem

1 Sidkija, ombara ya Juda, wa hinda Pashur, omuzandu wa Malkija, nomupristeri Sefanja, omuzandu wa Maaseja, ku ami, Jeremia, ama ningire nai: 2 “Arikana tu purira ku Muhona, Nebukadnesar, ombara ya Babilon, notjimbumba tje tjovita tjinga amave tu sekamisire ovita. Ngahino Muhona me tu tjitire otjihimise tje tjimwe na ṋiṋikiza Nebukadnesar kutja a yaruke ombunda.”

3 Tjazumba Muhona wa hungira ku ami, nami mba raera kovarumendu, mba hindirwe ku ami, 4 ve karaere Sidkija kutja Muhona, Ndjambi wa Israel, wa tjere nai: “Sidkija, ami me havere otjimbumba tjoye tjovita tji matji rwisa ombara ya Babilon notjimbumba tjayo tjovita. Ami me woronganisire ovirwise vyovarwe voye wovita mokati kotjihuro. 5 Me mu rwisa nomasa wandje aehe, na wina nomazenge nomapindi wandje nomasurwazenge wandje. 6 Ami me zepa ngamwa auhe ngwa tura motjihuro hi; ovandu novinamuinyo mave ṱu i omutjise omuzeu. 7 Nungwari ove novahongore voye, novandu mba mba hupa po movita na mondjara na momitjise, amuhe me mu yandja kohuuriro yombara Nebukadnesar noyovanavita na eṋe mbe vanga okumuzepa. Nebukadnesar me mu zepa amuhe. Ke nokuhupisa umwe weṋu nokumuṱira otjari nondjenda. Ami, ngu mbi ri Muhona, owami ngu mba hungire.”

8 Muhona we ndji raera kutja mbi tje nai kotjiwaṋa: “Tareye! Ami, ngu mbi ri Muhona, me mu pe okutoorora ondjira, ndji twara komuinyo poo indji ndji twara konḓiro. 9 Auhe ngu ma kara motjihuro ma ṱu movita poo i ondjara poo i omutjise omuzeu. Nungwari auhe ngu ma piti motjihuro ne riyandja kOvababilon mba kovere otjihuro nambano, ke nokuṱa; eye ma yama omuinyo we. 10 Ami mba tya kutja hi nokuyama otjihuro hi, nungwari me tji yandeke. Otjo matji yandjewa kombara ya Babilon, noyo mai tji nyosa atjihe okumana. Ami, ngu mbi ri Muhona, owami ngu mba hungire.”

Ombanguriro kondjuwo youhonapare wa Juda

11 Muhona we ndji raera kutja mbi yandje ombuze ndji kondjuwo youhonapare wa Juda, okutja ozo nḓa ozondekurona za David: 12 “Purateneye ku imbi, ami, ngu mbi ri Muhona, mbi me hungire. Ṱakamiseye kutja ousemba u yenenisiwe eyuva arihe. Yameye omundu ngu ma tjitwa ovineya ku ingwi ngu me mu wovisa. Ape he ri nao, ourunde weṋu mau yakisa omazenge wandje otja omuriro mbu ha zemisiwa. 13 Ove, Jerusalem, wa haama kondongamo yomukutu tjimuna oruuwa ndwa tongama morutjandja. Nungwari ami me ku rwisa. Ove motja kape na umwe ngu ma yenene okukurwisa, nu ngu ma taurire momaṱarero woye. 14 Nungwari ami me ku verere imbi mbi wa tjita. Ami me nyosa otjihwa tjoye, nu imbwi omuriro mau seseta oviṋa avihe mbya kondoroka otjihuro. Ami, ngu mbi ri Muhona, owami ngu mba hungire.”