1 Jojakim ngunda a ri ombara, Nebukadnesar, ombara ya Babilon, wa rwisa ehi ra Juda, nu Jojakim wa ṋiṋikiziwa okukara kehi yomananeno we oure wozombura ndatu; tjazumba Jojakim otja sekamena Nebukadnesar. 2 Muhona wa hinda ovira vyovapunde voviṋa, Ovababilon nOvasirie nOvamoab nOvaamoni okukarwisa Jojakim nokukanyona Juda otja Muhona pa hungirire notjinyo tjovakarere ve, imba ovaprofete. 3 Otjiṋa hi tja tjitwa otja komarakiza wa Muhona, kokutja Ovajuda ve nyonwe komurungu we mena romauvi aehe ombara Manasse nga tjitire, 4 nu tjinenenene mena rovandu avehe ovehinandjo mba zepere. Muhona ka vangere okuisira Manasse mena rotjiṋa ho.
5 Oviṋa avihe vyarwe Jojakim mbya tjita vya tjangwa mEkuruhungi rOzombara za Juda. 6 Jojakim wa koka, nomuzandu we Jojakin we mu pingena mouhona.
7 Ombara ya Engipte notjimbumba tjayo tjovita kave na pu va pita rukwao mOengipte okukarwa mena rokutja ombara ya Babilon ya honaparera omahi aehe nga ri owombara ya Engipte, okuza konḓonḓu Eufrat nga komukuro wa Engipte wokeyuva kokunene.
Jojakin ma rire ombara mOjuda
(2Eku 36:9-10)8 Jojakin wa rira ombara mOjuda tjari nozombura omurongo na hambondatu; neye wa honapara oure womieze vitatu mOjerusalem. Ina wa ri Nehusta, omusuko wa Elnatan, ngwa zire kOjerusalem. 9 Jojakin wa tura ondjo komurungu wa Muhona mokuhorera kotjikaro tjaihe.
10 Jojakin ngunda a ri ombara, otjimbumba tjarwe tjovita tjOvababilon tjaa tji hongorerwa i ovahongore vombara Nebukadnesar, tja rwisa otjihuro Jerusalem natji tji kovere. 11 Nu Jerusalem ngunda atja koverwa, Nebukadnesar omuini weya ku tjo. 12 Nu ombara Jojakin na ina novazandu novahongore ve, novakarere vondjuwo youhona ve riyandja kOvababilon. Mombura oitjahambondatu youhona we Nebukadnesar wa kambura Jojakin otja omuhuurwa, 13 na twara ovihuze avihe vyondjuwo ya Muhona novyondjuwo youhona kObabilon. Nebukadnesar wa nyanyaura ovitjuma avihe vyongoldo ombara Salomo mbya ungurira ondjuwo ya Muhona otja Muhona pa tjivisire. 14 Nebukadnesar wa twara ovandu avehe va Jerusalem, novaingona avehe vondjuwo youhona, novarumendu avehe ovatjiukwa otja ovahuurwa; avehe kumwe va ri omayovi omurongo. Eye wina wa twara ovarumendu avehe, mba ri ozonongo moviungura vyawo puna ovahambure vovitenda, na sye po ovandu imba ovasyona tjinene porwe mOjuda.
15 Nebukadnesar wa twara Jojakin otja omuhuurwa kObabilon puna ina novakazendu ve novakarere e novarumendu avehe mba ri ovahongore mOjuda. 16 Wina wa twara ovarumendu avehe ovahongore kObabilon, avehe kumwe va ri omayovi hambombari; novaungure eyovi rimwe mba ri ozonongo moviungura vyawo puna ovahambure vovitenda, avehe ovarumendu ozombanḓe mba yenena okuyenda kovita.
17 Nebukadnesar wa zika Matanja, inyangwe ya Jojakin, okurira ombara mOjuda, na rundurura ena re ri rire Sidkija.
Sidkija ma rire ombara mOjuda
(2Eku 36:11-12Jer 52:1-3a)18 Sidkija wa ri notjiwondo tjozombura omirongo vivari na imwe, tja rira ombara mOjuda; eye wa honapara oure wozombura omirongo vivari na imwe mOjerusalem. Ina wa ri Hamutal, omusuko wa Jeremia, ngwa zire kotjihuro Libna. 19 Ombara Sidkija wa tura ondjo komurungu wa Muhona otja ombara Jojakim tja tjitire. 20 Muhona wa pindikire tjinene novature va Jerusalem nOvajuda nga tje ve ramba komurungu we.
© Herero Revision Bible © Bible Society in Namibia, 2021.
