Ohiva oitjatano
1 Nu omuengeri outjatano otja posisa ohiva ye. Nami mba muna onyose ndja wira kombanda yehi okuza keyuru; noyo ya perwe otjipaturure tjorutjiva rwokehi yehi. 2 Nonyose ndji ya patururire otjinyo tjorutjiva, nu mu rwo amu piti omuise mbwa sanene nomuise wezuko enene; ondjerera yeyuva norumuinyo mevaverwa vya zorerisirwe i omuise mbwa zire motjinyo tjorutjiva. 3 Nu momuise mbwi arire tji mwa zu ozombahu aze ya kombanda yehi; nozo za perwe ouvara tjingewo mbwi ozondje mbu ze na wo. 4 Nozombahu nḓa za raererwe kutja aze ha nyono omahozu nomiti novihape ngamwa avihe; ozo za sere okuhihamisa ovandu mba porwe mbe hi notjiyambo tja Ndjambi kovipara vyawo. 5 Ozo kaze yandjererwe okuzepa ovandu, nungwari za yandjererwe okuvehihamisa uriri oure womieze vitano. Omuhihamo mbu ze eta wa sana na imbwi wondje tji ya rumata omundu. 6 Nu moure womieze vitano mbi ovandu mave paha onḓiro, nungwari kave nakuimuna ko; owo mave zeri okuṱa, nungwari onḓiro mai ve penge.
7 Nozombahu nḓa za sanene noukambe mbwe rirongerera ovita. Koviuru vyazo kwa ri oviṋa mbyaa vi munika otja omakori wouhona wongoldo, nomirungu vyazo vya sanene nomirungu vyovandu. 8 Nozo za ri nozondjise tjimuna ozondjise zovakazendu, nomayo wazo ya ri tjimuna inga wongeyama. 9 Otukoro twazo twa ri tjimuna otuvao twovitenda twomorukoro, nombosiro yovivava vyazo ya ri tjimuna omungunda womatemba omengi woukambe ngu maye utukire ovita. 10 Ozo za ri nomitjira mbi twera tjimuna imbwi owondje; nu momitjira vyazo mbi omu mu nomasa okuhihamisa ovandu oure womieze vitano. 11 Nu za ri nombara, ndji ze honaparera, okutja omuengeri ngu tjevera orutjiva rwokehi yehi. Ena re mOtjiheberi oAbadon; mOtjigrike oApolion, okutja “Omunyone”.
12 Nu Owee indji ondenga ya kapita; nu tara mape ya Ozoowee mbari kombunda yaindji.
Ohiva oitjahamboumwe
13 Nomuengeri outjahamboumwe arire tja posisa ohiva ye. Ami mba zuvire eraka nda zire mozonya inḓa ine zotjipunguhiro tjongoldo tji tji ri komurungu wa Ndjambi. 14 Neraka ndi ra tja komuengeri outjahamboumwe ngwa ri nohiva: “Kutura ovaengeri mba vane mba pandekerwa ponḓonḓu onene Eufrat.” 15 Novaengeri mba vane ave kuturwa; owo va rongererwa oiri ndji neyuva ndi nomueze mbwi nombura ndji okuzepa orukondwa orutjatatu rwovandu avehe. 16 Nu mba raerwa otjivaro tjovakavire voukambe wovita: Otjo tja ri omangete omasere yevari. 17 Nu motjirimunikise tjandje ami mba muna mo oukambe novakavire vawo: Owo va ri notuvao twomorukoro twovitenda otuserandu tjimuna omuriro, noturovazu tjimuna ewe rosafira, noturumbu tjimuna osurungu yongoporo. Oviuru vyoukambe vya sanene na imbi vyozongeyama, nu movinyo vyawo mwa pitire omuriro nomuise nosurungu. 18 Norukondwa orutjatatu rwovandu rwa ṱire i oviwonga vitatu mbi: Omuriro nomuise nosurungu mbya zire movinyo vyoukambe. 19 Orondu omasa woukambe u za movinyo vyawo na wina momitjira vyawo. Omitjira vyawo vya sana nozonyoka, nu vi noviuru, nu imbwi oukambe ombu u hihamisa na vyo ovandu.
20 Novandu mba ovakwao, imba avehe mbe ha ṱire i oviwonga mbi, kave na pu ve ritanaurire omitima okupoka ku imbi mbi va ungura nomake wawo. Owo va panḓera pokurikotamena kozombepo ozohakohoke na koviserekarera vyovisenginina vyongoldo nosilveri nongoporo nomawe nomiti, nu mbi ha sora okumuna nokuzuva nokukawondja. 21 Nu kave na pu ve ritanaure momitima okuisa ozonḓepero noundjai notuvakiro nourunga.
© Herero Revision Bible © Bible Society in Namibia, 2021.
