Jerusalem matji verwa
1 Tjazumba otji mba zuva Ndjambi ama ravaere nai neraka enene: “Indjeye popezu, oweṋe varumendu mbu mamu kavera otjihuro. Eterereye ovirwise vyeṋu!” 2 Kamanga kwe ya ovarumendu hamboumwe okuza komuvero wokombanda wondjuwo ya Muhona wokeyuva kokunene mba ri novirwise vyawo. Owo va ri puna omurumendu ngwa hwikikire ombanda oheze nu ngwa kutire otjitjange kekwamo. Owo avehe va kakurama potjipunguhiro tjongoporo.
3 Tjazumba ondjerera ongeṋangeṋe ya Ndjambi wa Israel ya yeruruka kombanda okuza kovakerubi ku ya ri, nai i komahitiro wondjuwo ya Muhona. Muhona wa ravaera komurumendu ngwi ngwa hwikikire ombanda oheze na tja: 4 “Tuurunga otjihuro atjihe tja Jerusalem u katwe ko otjihako kotjipara tjangamwa auhe ngwa ningisa ondjenda nu ngwa kurungisiwa i oviṋa avihe oviyaukise mbi tjitwa motjihuro.”
5 Nu mba zuva Muhona ama tja nai kovarumendu imba ovakwao varwe: “Mu kongorereye motjihuro nu mu kazepe ovandu! Amu hupisa omundu, nu amu tjariparere omundu nangarire umwe. 6 Zepeye ovakururume novazandu novasuko novakazendu novanatje. Nungwari amu ṱunu ku ngamwa auhe ngu notjihako motjipara. Utireye mba pondjuwo yandje.” Owo otji va uta novanane, mba kuramene mbo pondjuwo ya Muhona.
7 Ndjambi wa tja nai ku wo: “Tengurureye ondjuwo ya Muhona. Yeriseye otupanda twayo noturova! Uteye otupanda twayo noturova! Uteye notjiungura!” Nowo arire tji va utu okuzepa ovandu motjihuro.
8 Omazepero ngunda amaye tjitwa, ami tjandje mba sewa erike mbo. Mbe ripeta nga omurungu wandje tji wa ṱuna mehi, nu e ravaere e tja: “Muhona Ndjambi, ove u nomazenge tjinene nai na Jerusalem nga tji mo zepa avehe mba sewa po mOisrael are?”
9 Ndjambi wa zira a tja: “Otjiwaṋa tja Israel notja Juda vi nondjo yomauvi omatirise. Ovyo vya zepa ovandu mehi arihe, nu vye urisa Jerusalem nourunde. Ovyo vi tja ami, ngu mbi ri Muhona, mba za mo mehi ravyo, nu hi tji vi munu. 10 Nungwari ami hi nokuviṱira ondjenda nu hi nokuviyama. Me tjiti tjingevyo mbi mbi vya tjita kovakwao.”
11 Omurumendu ngwi ngwa zarere ombanda oheze nu ngwa kutire ovitjange kekwamo wa yaruka na kaserekarera nai ku Muhona: “Ami mba yenenisa omarakiza woye.”
© Herero Revision Bible © Bible Society in Namibia, 2021.
