Eksodus 30 - Herero Revision Bible (HRR)

Otjipunguhiro tjomatwimisiro

1 “Tunga otjipunguhiro pomue, okutwimisira ko ovyomoro omuwa. 2 Otjo ngatji kare nomikuma vine mbi ṱeki pamwe; oure watjo nouparanga watjo ngau kare nometa ohinga, nu ngatji kare noutonga wometa imwe. Ozonya zatjo ngaze rire otjiṋa tjimwe kumwe na tjo. 3 Twa ko ongoldo ongohoke ku tjo na komikuma avihe vine na kozonya zatjo, nu u ungurire ko omukuro wongoldo okukondorokisa tjo. 4 Wina tji ungurira ozongoho zongoldo kombarimbari kehi yomukuro kovikoro vivari vyomikuma mbya tarasana; mu zo omu mamu hweke ovinḓe vyomatjindiro wotjipunguhiro. 5 Ungura ovinḓe pomue, nu u twe ko ongoldo. 6 Nu tji twa komurungu werapi etjizikize, ndi ri komurungu wOtjipwikiro tjOmerikutiropamwe notjikamo tjatjo. Poṋa mbo ami opu me hakaenene na ove. 7 Nu Aron nga twimisire ko ovyomoro omuwa. Omuhuka auhe eye tji ma kaṱuna omamunine nga rire tje vi twimisa. 8 Nu komuihi Aron tji ma kayakisa omamunine, nga katwimise ovyomoro omuwa, ombunguhiro yovyomoro omuwa ndji, nga i kaende komurungu oruveze aruhe ndu maruya. 9 Kotjipunguhiro hi, amu punguhire ko ovyomoro omuwa mbi hiya yandjerwa; ombunguhiro oningiririsiwa poo yovikurya, nu ngaamu tirire ko ombunguhiro yomanuwa ku tjo. 10 Otjikando tjimwe mombura Aron nga tjite otjitjitwa tjondjesiro yourunde kozonya zatjo. Otjiṋa hi tji sokutjitwa rumwe mombura okuza ku nai nga kozondekurona nḓu maze ya kombunda. Otjipunguhiro hi ngatji rire otjiyapuke tjinenenene tji tja yapurirwa Muhona.”

Otjisutwa tjOndanda yOmahakaeneno

11 Muhona wa hungira ku Moses a tja: 12 “Tji mo vara Ovaisrael otja kotjivaro tjawo, auhe nga sute otjimariva tjonguturiro ku Muhona mena romuinyo we kutja ape he ya otjipo mokati kawo ngunda amave varwa. 13 Auhe ngwa rire orupa rwa imba mba varwa nga sute ihi tji matji vangwa nu tji tja sanekwa otja kotjisuta tjokotjouyapuke. Auhe nga sute ihi otja ombunguhiro ku Muhona. 14 Omurumendu auhe ngwa rire orupa rwa imba mba varwa, okuza kowozombura omirongo vivari nokomurungu, nga yandje otjisuta hi ku Muhona. 15 Omutumbe ke nakusuta kombanda, nomusyona ke nakusuta kehi tji mamu yandja otjisuta ku Muhona okuyama ominyo vyeṋu. 16 Kambura otjimariva hi kOvaisrael u ungurise na tjo oviungura vyOndanda yOmahakaeneno. Ihi matji zemburukisa Muhona Ovaisrael, notjo matji rire otjisuta okuyama ominyo vyeṋu.”

Otjiyaha tjongoporo tjomerikohero

17 Muhona wa hungira ku Moses a tja: 18 “Ungura otjiyaha tjongoporo notjikurameno tjatjo tjongoporo okurikohera mo; nu tji twa pokati kOndanda yOmahakaeneno notjipunguhiro, nu u tirire mo omeva, 19 kokutja Aron novazandu ve ve rikohere mo omake nozombaze, 20 rutenga ngunda ave hiya hita mOndanda yOmahakaeneno poo ave hiya ya kotjipunguhiro okupunguha ovikurya vyombunguhiro. Nowo kave nokuṱa. 21 Owo ngave rikohe omake nozombaze kutja ave ha ṱu. Nu ihi ngatji rire omazikamisiro omakarerere ku wo na kozondekurona zawo.”

Omaze omatwirise

22 Muhona wa hungira ku Moses a tja: 23 “Ritoorera omiti omiwa vyapo: Omamira omawa ozokirograma hamboumwe, nozokirograma ndatu zokaneel, ndji ṋuka nawa, nozokirograma ndatu zokalmus, ndji ṋuka nawa, 24 nozokirograma hamboumwe zokasio otja konḓengu yoviṋa vyokotjouyapuke, nozorita ine zomaze womiṋinga; 25 pu imbi ungura po omaze omayapuke wokutwirisa, nu avihe mbi vi runga otja tji vi rungwa i omurunge. Owo ngaye rire omaze omayapuke wokutwirisa. 26 Inga twirisa na wo indji Ondanda yOmahakaeneno nOtjipwikiro tjOmerikutiropamwe, 27 na ihi otjiriro noviungurise vyatjo, notjipunguhiro tjokutwimisira ko ovyomoro omuwa, 28 notjipunguhiro tjozombunguhiro ozoningiririsiwa, noviungurise vyatjo avihe, notjikurameno tjomamunine noviungurise vyatjo avihe, notjiyaha tjomerikohero notjikurameno tjatjo. 29 Oviṋa mbi vi yapura momuhingo mbwi, novyo mavi rire oviyapuke okumana, nu auhe poo atjihe tji matji ṱunu ku vyo matji rire otjiyapuke. 30 Nu twirisa ooAron novazandu ve nokuveyapura kutja ve ndji karere motjiungura tjoupristeri. 31 Tjazumba hungira kOvaisrael nu itja: ‘Omaze omatwirise nomayapuke nga, ma e sokuungurisiwa motjiungura tjandje okuza koruveze nga koruveze aruhe. 32 Owo aye tirirwa komundu ngamwa auhe, nu eṋe amu rungu omaze warwe, nga sana na wo. Owo omayapuke, nu ngaye rire omayapuke ku eṋe. 33 Auhe ngu ma rungu omaze, nga sana ngo poo ngu me ye eta komundu ngu he ri omupristeri, nga kondwe kotjiwaṋa tjawo.’ ”

Ovyomoro omuwa

34 Nu Muhona wa tja ku Moses: “Ritoorera omiti mbi: Epya rostorak, nonareki, nomaihi womiti galba, novizumba ovikohoke; imbi avihe ngavi ṱeke pamwe motjisanekero. 35 Ungura na vyo ovyomoro omuwa u vi runge tjimuna omurunge wovivawa tje runga, mbya wanekwa nomongwa, ovikohoke noviyapuke. 36 Nu kweya tjiva vyavyo tjinene, nu u twe tjiva vyaimbi pehi komurungu wOtjipwikiro tjOmerikutiropamwe mOndanda yOmahakaeneno, ami na ove pu matu hakaenene. Ngavi rire oviyapuke tjinenene ku eṋe. 37 Ko nokurirungira ko ovyomoro omuwa mbya sana ngo okuungura na vyo omuini, vi vara otja mbya yapurirwa Muhona. 38 Auhe ngu me rirungire ovyomoro mbya sana ngo, nga kondwe kotjiwaṋa tjandje.”