Omavandururiro 7 - Herero Revision Bible (HRR)

Imba omayovi esere rimwe nomirongo vine na yane ovandu va Israel

1 Nu kombunda yoviṋa mbi ami mba munine ovaengeri vane ava kurama povikoro vine vyehi nava ṱiza inḓa ozombepo ine, kokutja ape ha ningi ombepo ndji mai hingi kombanda yehi na mokuvare na momiti. 2 Nu wina mba munine omuengeri omukwao ngwaa zire komuhuka e notjiyambo tja Ndjambi omunamuinyo. Eye wa ravaerere neraka enene kovaengeri mba vane Ndjambi ka yandjere omasa okuhahaura ehi nokuvare. 3 Omuengeri ngwi wa tjere: “Amu hahaura ehi nokuvare nomiti, nga eṱe tji twa twako otjiyambo kovipara vyovakarere va Ndjambi wetu.” 4 Nu ami mba raererwe kutja otjivaro tjaimba mba twirwe ko otjiyambo tja Ndjambi kovipara vyawo tja ri omayovi esere nomirongo vine na yane. Owo va zire momihoko omurongo na vivari vya Israel. 5-8 Momuhoko auhe mwa ri ovandu omayovi omurongo na yevari, mba twirwe ko oviyambo kovipara, okutja owa Juda na Ruben na Gad na Aser na Naftali na Manasse na Simeon na Levi na Isakar na Sebulon na Josef na Benjamin.

Otjimbumba otjinene

9 Kombunda yaimbi ami mba tarere ne munu otjimbumba otjinene tjovandu omundu tje hi nokusora okuvara. Owo va zire movanavisenginina avehe, na momihoko noviwaṋa avihe, na momaraka aehe, nowo va kuramene momurungu wotjihavero tjouhona na momurungu wOndjona ava zara ozombanda ozombapa ozonde nu ave notutavi twomivare momake wawo. 10 Nowo va ravaerere neraka enene ave tja: “Ondjamo i za ku Ndjambi wetu ngwa haama kotjihavero tjouhona, na kOndjona!” 11 Ovaengeri avehe va kuramene okukondoroka otjihavero tjouhona novanene novinamuinyo mbi vine. Tjazumba ave u onḓurumika momurungu wotjihavero tjouhona nave rikotamene ku Ndjambi, 12 amave tja: “Amen! Ondangero, nondjozikiro, nounongo, nokutja okuhepa, nondengero, nouvara, nomasa, ovyo ovya Ndjambi wetu aruhe nga ko nga aruhe. Amen!”

13 Nu omunene umwe we ndji pura a tja: “Ovandu mba mba zara ozombanda ozombapa ozonde, oowaṋi, nu va za pi?”

14 Ami e ziri e tja: “Hi nokutjiwa, Muhona. Ngu mo tjiwa oove.”

Eye arire tja tja ku ami: “Owo ovandu mba mba zira mondatumisire ondirise. Owo va koha ozombanda zawo ozonde nave ze yepaerisa nombinḓu yOndjona. 15 Opu mave zu okukurama komurungu wotjihavero tjouhona tja Ndjambi nokumukarera omutenya nouṱuku mondjuwo ye ondjapuke. Nu ingwi ngwa haama kotjihavero tjouhona meve yama mokukara popezu na wo. 16 Owo kamaave ṱondjara nu kamaave ṱonyota; omutenya noupyu ousesete kamaau ve nyosa ko, 17 orondu Ondjona, ndji ri mondivitivi yotjihavero tjouhona, mai rire omurise wawo, nu mai ve hongorere kotuharwi otunamuinyo twomeva. Nu Ndjambi ma pyona omahoze aehe momeho wawo.”