Omavandururiro 1 - Herero Revision Bible (HRR)

1 Membo ndi mwa tjangwa ovitjitwa Jesus Kristus mbya vandurura. Ndjambi we mu pa omavandururiro nga kutja a raise kovakarere ve imbi mbi mavi sokutjitwa tjimanga. Kristus otja hinda omuengeri we komukarere we Johanes okuyekumutjivisa oviṋa mbi. 2 Johanes eye omuhongonone waimbi Ndjambi mbya hungira na imbi Jesus Kristus mbya zikamisa; eye u hongonona avihe mbya muna. 3 Omuṋingandu ingwi ngu ma rese embo ndi, novaṋingandu imba mbu mave puratene komambo womaprofetero nga, nu mbu mave kara nonḓuviro nave ṱakamisa imbi mbya tjangwa membo ndi! Orondu oruveze ru ri popezu oviṋa avihe mbi mu mavi tjitwa.

Ozombinika kozombongo hambombari

4 Okuza ku Johanes, kozombongo hambombari morukondwa rwa Asie:

Otjari nohange ngavi kare na eṋe okuza ku Ndjambi, ngu ri po, ngwa ri po, nu ngu mee ya, nokuza kozombepo hambombari nḓe ri komurungu wotjihavero tje tjouhona, 5 nokuza ku Jesus Kristus omuhongonone omuṱakame, ngu ri omutenga okupenduka movakoke, nu wina ngu ri omuhonapare wozombara zouye.

Eye we tu suvera, nu monḓiro ye, eye we tu kutura kourunde wetu, 6 ne tu tjiti ovahonapare vapamwe na ye mouhona we, ovapristeri mbu mave karere Ndjambi Ihe. Jesus Kristus nga pe ondjozikiro nohivirikiro nu ouhonapare we ngau karerere aruhe nga ko nga aruhe! Amen.

7 Tara, eye ma yende movikamba! Novandu avehe mave mu munu, nangarire imba mbe mu twerere okutuvakaṋa wina. Noviwaṋa avihe kombanda yehi mavi mu riri. Ii, tjiri mape kara nao!

8 “Owami omutenga nomusenina”, Muhona Ndjambi Omunamasaaehe ma tja nai, ngu ri po, ngwa ri po, nu ngu mee ya.

Kristus me rimunikisa ku Johanes

9 Owami Johanes, omukweṋu mongamburiro, nu moruwano rwetu na Jesus ami mbi norupa puna eṋe momauzeu na mouhona na monḓaro orure. Ami mba huurirwe ne etwa kekoverwa ra Patmos, mena rokuzuvarisa embo ra Ndjambi nouatjiri mbwi Jesus Kristus mbwa vandururire. 10 MEyuva ra Muhona Ombepo ya honapara mu ami, nami e zuu eraka enamasa kongotwe yandje ndaari pose otja ohiva; 11 oro ra tjere: “Tjanga membo imbi mbi mo munu, nu u ri hinde kozombongo movihuro hambombari mbi: Oefese na Smirna na Pergamum na Tiatira na Sardes na Filadelfia na Laodisea.”

12 Nami mba tanauka okutara ingwi ngwaa hungire kuna ami, nu mba muna ovikurameno vyomamunine hambombari vyongoldo, 13 nu mokati kavyo e munu umwe ngwaa munika otja Omuna wOmundu. Eye wa zarere ombanda onde, nekwamo rongoldo morukoro rwe. 14 Nozondjise ze za ri ozombapa twee tjimuna omainya omavapa wozonḓu, tjimuna ovitutukende, nomeho we aaye munika tjimuna omaraka womuriro. 15 Ozombaze ze aaze keṋakeṋa tjimuna ongoporo ndja zuzurwa mezuko nu ndja kohororwa, neraka re aa ri pose otja ombosiro yomeva omengi. 16 Eye wa ri nozonyose hambombari meke re rokunene, nu motjinyo tje mwa pitire engaruvyo etwe, ndi konda kuvari. Omurungu we aa u yere tjimuna ozohanya zeyuva.

17 Nami tji mbe mu muna, mba wa onḓurumika pozombaze ze ne saravara tjimuna omundu ngwa koka. Eye wa twa eke re rokunene ku ami na tja: “O tira! Owami ngwi omutenga nomusenina. 18 Owami omunamuinyo! Ami mba kokere, nu tara, nambano mbi nomuinyo aruhe nga ko nga aruhe. Nu mbi nouvara kombanda yonḓiro notjovakoke. 19 Nambano tjanga oviṋa, mbi mo munu, imbi mbi ri po nambano, na imbi mbi mavi katjitwa kombunda. 20 Nu inga onge ri omaheero omaundikwa wozonyose hambombari nḓu mo munu meke randje rokunene, nowovikurameno vyomamunine hambombari vyongoldo: Ozonyose hambombari ozo ovaengeri vozombongo hambombari, nu imbi ovikurameno vyomamunine hambombari ovyo ozombongo hambombari.”