Muhona ma kotoka kondjuwo ye
1 Omurumendu ngwi we ndji twara komuvero mbuyau tara komuhuka, 2 nu imbo mba muna po ondjerera ongeṋangeṋe youkarepo wa Ndjambi wa Israel okuza komuhuka. Eraka raMuhona aa ri hwaara tjimuna ozongazona zokuvare, nehi aa ri yere otja ondjerera ongeṋangeṋe. 3 Otjirimunikise hi tja sanene ku ihi tji mba mwine indu Ndjambi tje ere okunyona Jerusalem, na ku ihi tji mba mwine ponḓonḓu Kebar. Nami mba wa onḓurumika. 4 Ondjerera ongeṋangeṋe ndji ya kapitira momuvero wokomuhuka nai hiti mondjuwo ya Muhona.
5 Ombepo ya Muhona ye ndji toora ai kendjihitisa morupanda rwomoukoto; nami mba muna kutja ondjuwo ya Muhona ye urisiwa nongeṋangeṋeno ya Muhona. 6 Omurumendu ngwi wa kuramene mbo posi yandje, nami mba zuva Muhona ama hungire nai ku ami okuza mondjuwo ye: 7 “Muatje womundu, poṋa pu mape kara otjihavero tjandje tjouhona opo mba. Ami me tura mwi mokati kotjiwaṋa tja Israel nu e tji honaparere nga aruhe. Otjiwaṋa tja Israel nozombara zatjo kamaave yamburura ena randje eyapuke rukwao mokurikotamena koomukuru varwe na mokupaka oturova twozombara zatjo poṋa mba. 8 Ozombara za tunga omiti omityakaṋa nozongambezero zondjuwo yazo youhona keṋe yomiti omityakaṋa nozongambezero zondjuwo yandje, kokutja pe kare ekuma uriri pokati ketu. Ozo za yamburura ena randje eyapuke noviṋa avihe oviyaukise, mbi za tjita, nu komuhingo mbwi momazenge wandje ami otji mbe ze yandeka. 9 Nambano ozo maze sokuisa okurikotamena koomukuru varwe, nu maze sokuisa mo oturova twozombara zatjo. Aza tjiti nai ami me tura mokati kotjiwaṋa tjandje nga aruhe.”
10 Nu Muhona wa hungira komurungu a tja: “Muatje womundu, raera ondjuwo yandje kotjiwaṋa tja Israel, nu ngatji konḓonone ondunge yondungiro yayo. Ve ṱisa ohoṋi kozondjito zawo zouvi. 11 Tjazumba owo tji va ṱohoṋi noviṋa mbi va tjita, ve handjaurira ondunge yondungiro yondjuwo, okutja ombunikiro yayo, nomahitiro nomapitiro wayo, nomuhapo wayo, nonḓunino yoviṋa avihe, nomaraerero nomazikamisiro wayo aehe. Ve tjangera oviṋa avihe mbi kokutja ve mune oviṋa avihe tji mavi ṱunwa, nomazikamisiro aehe tji maye kayenda. 12 Indi oro etwako rondjuwo yandje: Ehi arihe nde i kondoroka kondomba yondundu oro eyapukeyapuke.”
Otjipunguhiro
13 Omasanekero wotjipunguhiro ya ri otja inga ngaa e ungurisiwa mokusaneka ondjuwo ya Muhona. Okukondoroka otjipunguhiro atjihe kehi kwa ri orurora ndwa ri noukoto wozosentimeta omirongo vitano, nouparanga wozosentimeta omirongo vitano, norungora kotjikoro tjopendje rwa ri noutonga wozosentimeta omirongo vivari nandano. 14 Orukondwa rwotjipunguhiro kehikehi okuza pehi rwa ri noutonga wometa imwe. Norukondwa orutjavari rwa hivire okuyaruka moukoto okuza kotjikoro ozosentimeta omirongo vitano okukondoroka, nu rwa ri noutonga wozometa mbari. Orukondwa orutjatatu wina rwa hivire okuyaruka moukoto okuza kotjikoro ozosentimeta omirongo vitano okukondoroka.
15 Orukondwa indwi rwokombanda kuya ku ningirisirwa ozombunguhiro rwa ri noutonga wozometa mbari. Ozonya kovikoro vine za ri ozondonga pu avihe. 16 Kombanda otjipunguhiro tja ri nomikuma vine mbi ṱeki pamwe, ozometa hamboumwe komukuma auhe. 17 Orukondwa rwomokati wina rwa ri nomikuma vine mbi ṱeki pamwe, ozometa hambombari komukuma auhe, norungora kotjikoro tjopendje rwa ri noutonga wozosentimeta omirongo vivari nandano. Orurora rwa ri nouparanga wozosentimeta omirongo vitano. Ozondondo nḓaa ze rondo kotjipunguhiro za ri komukuma wokomuhuka.
Omayapuriro wotjipunguhiro
18 Muhona Ndjambi wa tja nai ku ami: “Muatje womundu, puratena ku imbi mbi me ku raere. Otjipunguhiro tji tja tungwa, ove mo sokutjiyapura mokuningiririsira ko ozombunguhiro na mokutjipamenena nombinḓu yovinamuinyo vyombunguhiro. 19 Ovapristeri mba mbe ri ovomuhoko wa Levi nu mbe ri ozondekurona za Sadok aveyerike ombu mave ya komurungu wandje okundjikarera. Ami, ngu mbi ri Muhona Ndjambi, me rakiza kutja u ve pe ondwiyona yongombe okuipunguha i rire ombunguhiro yokuisapo ourunde. 20 Ove mo kambura ko kombinḓu no i hu kozonya nde ri kombanda kovikoro vyotjipunguhiro, na kovikoro vyorukondwa rwomokati rwotjipunguhiro, na kotungora atuhe okukondoroka. Komuhingo mbwi ove otji mo kohorora otjipunguhiro nokutjiyapura. 21 Ove mo toora ondwiyona ndji ndji mai punguhirwa ombunguhiro yokuisapo ourunde, nu mo i ningiririsire poṋa pu pa toororwa pendje yehi rondjuwo ya Muhona. 22 Mependukirwa ove mo kambura ondwezu yongombo, ndji hi notjipo no i punguha i rire ombunguhiro nombinḓu yayo momuhingo tjingewo mbu wa tjita kondwiyona yongombe. 23 Tji wa mana okutjita nai, toora ondwiyona yongombe nondwezu yonḓu, azeyembari nḓe hi novipo, 24 nu u ze ete ku ami. Ovapristeri mave ze pemenene nomongwa nave ze punguhire ami ze rire ombunguhiro oningiririsiwa. 25 Eyuva arihe oure womayuva hambombari ove mo punguha ondwezu yongombo nondwiyona yongombe nondwezu yonḓu ze rire ozombunguhiro zomauvi. Ovinamuinyo avihe mbi mavi sokukara nokuhinatjipo. 26 Oure womayuva hambombari ovapristeri mave yapura otjipunguhiro ave tji kohorora nu ave tji ṱunu kutja ku ungurirwe. 27 Nomayuva nga hambombari tji ya kapita, ovapristeri mave utu okupunguhira kotjipunguhiro ozombunguhiro ozoningiririsiwa nozokutja okuhepa zoviyandjewa mbya etwa i otjiwaṋa. Nami me kara notjari na eṋe amuhe. Ami, ngu mbi ri Muhona Ndjambi, owami ngu mba hungire.”
© Herero Revision Bible © Bible Society in Namibia, 2021.
