Ongumbiro yokutja okuhepa koutoṋi
1 Tangeye Muhona,
eye tjinga e nouwa!
Orusuvero rwe ru
karerera nga aruhe.
2 Ovaisrael ngave hongonone nai:
“Orusuvero rwe ru
karerera nga aruhe.”
3 Ovapristeri va Ndjambi
ngave hongonone nai:
“Orusuvero rwe ru
karerera nga aruhe.”
4 Imba avehe mbe
rikotamena ku Muhona,
ngave hongonone nai:
“Orusuvero rwe ru
karerera nga aruhe.”
5 Mombamisiro yandje ami mba
kwa ku Muhona,
neye we ndji zuvira ne ndji kutura.
6 Muhona u ri puna ami,
nu hi nokutira;
omundu me ndji tjiti tjike?
7 Muhona omuini
ongu ndji vatera,
nami me munu ovanavita
na ami amave rambwa movita.
8 Okokuwa okukara nomaundiro mu Muhona
komeho yokuriyameka kovandu.
9 Okokuwa okukara nomaundiro mu Muhona,
komeho yokuriyameka
kovahona ovanauvara.
10 Oviwaṋa ovinavita ovingi
vye ndji kovera;
nungwari ami mbe vi
yandeka puna ombatero ya Muhona.
11 Ovyo vye ndji kovera kominda avihe;
nungwari ami mbe vi yandeka
puna ombatero ya Muhona.
12 Ovyo vya taurira mu
ami tjimuna ehapu rozonyutji,
nungwari ovyo vya ningirira
tjimanga tjimuna omakuiya momuriro,
nami mbe vi yandeka puna
ombatero ya Muhona.
13 Ami mba undurwa
nomasa kutja mbi we,
nungwari Muhona we ndji vatera.
14 Muhona eye omaundiro nomasa
wandje, eye ongwe ndji yama.
15 Zuveye eraka rondjoroka
yondoṋeno mozondanda zotjiwaṋa
tja Ndjambi, ndi mari tja:
“Muhona u tjita ozondjito ozonamasa;
16 Muhona u tu etera ondoṋeno;
neke re enamasa ri
tjita ozondjito ozonamasa!”
17 Ami hi nokukoka,
me kara nomuinyo,
nu me hongonona
ovitjitwa vya Muhona.
18 Muhona we ndji vera tjinene,
nungwari ke ndji yandjere konḓiro.
19 Ndji yezururireye omivero
vyondjuwo ya Muhona!
Ami me vanga okuhita mbi
kahivirike Muhona.
20 Omuvero mu mu hitirwa
okuyenda ku Muhona owo mbwi;
imba mbe nonḓuviro komatwako
wa Ndjambi ombu mave hitire mu wo.
21 Me tanga ove, Muhona,
tjinga awe ndji zuvira,
nawe ndji pa outoṋi.
22 Indi ewe nda imbirahiwa i ovatunge,
onda karira ewe enanḓengu pu aehe.
23 Ihi tja tjitwa i Muhona,
notjo otjihimise momeho wetu!
24 Indi oro eyuva Muhona nda tjita;
ngatu yoroke nu tu nyande mu ro.
25 Tu yama, Muhona, arikana!
Tu pao ouṋingandu, Muhona!
26 Nga serwe ondaya ingwi ngu me
ya mena ra Muhona!
Matu sere eṋe ondaya okuza
mondjuwo ya Muhona.
27 Muhona eye Ndjambi;
eye we tu yerisira ondjerera.
Uteye eyuva indi enene amu
notutavi momake nu mu kayende
amamu kondoroka otjipunguhiro!
28 Oove Ndjambi wandje,
me ku tanga;
me hivirike ounene woye.
29 Tangeye Muhona,
eye tjinga e nouwa!
Orusuvero rwe ru karerera nga aruhe.
© Herero Revision Bible © Bible Society in Namibia, 2021.
