Ouwa wa Ndjambi nouvi wotjiwaṋa
1 Tangeye Muhona!
Itjeye okuhepa ku Muhona,
orondu eye omuwa;
orusuvero rwe ru karerera nga aruhe.
2 Owaṋi ngu ma sora okuserekarera
oviungura ovinamasa vya Muhona?
Owaṋi ngu ma sora okuhongonona
ondangero ye?
3 Ovaṋingandu imba mbe nonḓuviro
komarakiza we,
nu mbe tjita ousemba aruhe.
4 Ndji zemburuka, Muhona,
morusuvero rwoye ndu u na rwo
kotjiwaṋa tjoye;
ndji varura nombatero yoye.
5 Ndji munisa ouṋingandu
wotjiwaṋa tjoye otjitoororwa,
mbi wane menyando rombongo yoye,
nu mbi yoroke puna imba mbe ri ovoye.
6 Eṱe twa tjita ourunde otja ootate
mukururume tjaave tjiti.
Twa tjita ouhasemba natu
ritjindi mongarero youvi.
7 Ootate mukururume mOengipte
kave karere ko na tja noviungura
vyoye ovihimise;
kave zemburukire ozondjito azehe
zorusuvero rwoye ku wo, notji ve
ku pirukira pOmuronga wOtuu.
8 Nungwari eye we ve yama mena
rondjozikiro yena re,
kokutja a tjivise omasa we omanene.
9 Eye wa vera Omuronga wOtuu, nowo au kaha;
nu arire tja kondisire
otjiwaṋa tje poṋa popakukutu.
10 Eye otje ve yama momake wovevetonde,
nu e ve kutura kovanavita na wo.
11 Nomeva ya ṋiṋa ovanavita na wo;
nu kape ningire umwe wawo ngwa hupa.
12 Otjiwaṋa tje otji tja kambura momakwizikiro we,
nu atji mu imburire ondangero.
13 Nungwari owo va hakahana
okuzemba ovitjitwa vye,
nu ave ha undju komaraerero we.
14 Owo va kara neraru mokuti onguza,
nu ave roro Ndjambi.
15 Neye otje ve pa imbi mbi va ningira,
nungwari wina a eta omutjise
omuzeu kombanda yawo.
16 Nu mouyenda wawo mokuti onguza
owo va ṱeruru na Moses na Aron
mba yapurirwa Muhona.
17 Ehi otji ra pamburuka nari ṋiṋa Datan,
nari paka Abiram neṱunḓu re;
18 nomuriro wa seseta otjira tjawo atjihe,
novanauvi va ṱotururumo.
19 Owo va ungura ondana ondume yongoldo,
nu ave rikotamene
kotjiserekarera tjotjisenginina hi;
20 va pimba omasa wa Ndjambi
notjiserekarera tjondwezu yongombe,
ndji rya ehozu.
21 Owo va zemba Ndjambi, Omuyame wawo,
ngwa tjitire oviṋa ovinene mOengipte,
22 novihimise mehi ra Ham,
noviurumise pOmuronga wOtuu.
23 Muhona wa vanga okuyandeka otjiwaṋa tje,
nungwari Moses, omukarere we omutoororwa,
wa kuramena Muhona momurungu
ne mu tjaera kutja e he ve yandeke momazenge we.
24 Nu owo arire tji va nyengwa ehi ewa emanise,
tjinga ave ha ri kamburire
momakwizikiro wa Ndjambi.
25 Owo va kara mozondanda zawo amave unauna,
nu kave puratenene ko ku Muhona.
26 Eye ope ve pera erakiza ekukutu kutja
meve zepere mokuti onguza,
27 nokutja ma rimbi ozondekurona zawo
mokati koviwaṋa ovinavisenginina,
nu me ze esa kutja ze ṱire momahi
wovandu wozonganda.
28 Nu mOpeor otjiwaṋa tja Ndjambi
tje rikotamena ku Baal,
nu atji ri kozombunguhiro nḓaa ze
punguhirwa oomukuru mbe hi nomuinyo.
29 Nozondjito zawo zourunde
za pindikisa Muhona,
nomutjise omuzeu otji wa taurira mu wo.
30 Nungwari Pinhas wa sekama na vere ovanandjo,
nomutjise otji wa yanda.
31 Okuza kotjikando ho,
Pinhas wa varwa otja omusemba
okuza komihoko avihe nga aruhe.
32 Pomeva wa Meriba otjiwaṋa
tja pindikisa Muhona,
nu Moses wa muna ouzeu tjinene mena rawo.
33 Owo va pindikisa Moses tjinene,
nga tjaa hungire omambo nokuhinokuripura.
34 Kave yandekere oviwaṋa otja Muhona pe
ve rakizire;
35 nungwari owo va kupasana na vyo
nave horere kovikaro vyavyo.
36 Otjiwaṋa tja Ndjambi tje rikotamena
koomukuru vovisenginina,
notjiṋa hi tja karire ombate ku tjo.
37 Owo va punguhira ozombepo ozohakohoke
ovanatje vawo ovazandu novakazona,
38 nu ave tirahi ombinḓu ohinandjo,
indji yovanatje vawo ovazandu
novakazona mbu va punguhira
oomukuru vovisenginina vehi ra Kanaan.
Nehi otji ra zunḓiwa i
omatirahiro wombinḓu nga.
39 Otjiwaṋa tje rizunḓa nozondjito zatjo,
narire tji tja poka ku Ndjambi mokutjita nai.
40 Muhona otja ṱomazenge notjiwaṋa tje,
wa yaukisiwa i tjo.
41 Eye we tji yandja mouvara
woviwaṋa ovinavisenginina,
novetjitonde va honaparera tjo.
42 Ovanavita na tjo ve tji tatumisa,
notjo tje riwisa kehi youvara wawo.
43 Muhona wa yama otjiwaṋa tje potuingi,
nungwari otjo tja kara pokumupirukira,
natji ṱomwinine ko mouvi watjo.
44 Nu Muhona we tji zuva,
otjo tji tja kwa ku ye,
nu eye arire tja yakura ondjuriro yatjo.
45 Nu mena ratjo eye wa zemburuka
omerikutiropamwe we,
nu morusuvero rwe orunene eye wa
ṱondjenda na tjo.
46 Eye wa tjita kutja imba ovetjitatumise
avehe ve ṱondjenda na tjo.
47 Tu yama, Muhona, Ndjambi wetu,
nu u tu kotore okuza mokati koviwaṋa,
kutja tu tje okuhepa nu tu tange ena roye eyapuke.
48 Tangeye Muhona, Ndjambi wa Israel;
Mu tangeye nambano na ko nga aruhe!
Notjiwaṋa atjihe ngatji tje nai, “Amen!”
Tangeye Muhona!
© Herero Revision Bible © Bible Society in Namibia, 2021.
