Jesus ma twirisirwa mObetanie
(Mt 26:6-13Mk 14:3-9)1 Omayuva hamboumwe komurungu wOpaska Jesus we ere kObetanie ku kwa turire Lasarus, ingwi omurumendu eye ngwa pendurire movakoke. 2 Owo ve mu ṱunina omariro, nu Marta ongwa ri omuyandje wovikurya pomariro. Lasarus wa ri umwe wa imba mba haamene puna Jesus potjiriro. 3 Okuzambo Maria arire tja toora omaze omavawa nga ungurwa povinarde vyoriṱera ohinga, ne ye tirire kozombaze za Jesus na yeka nozondjise ze. Nomuṋuko womaze omavawa nga we urire ondjuwo aihe. 4 Nu omuhongewa umwe wa Jesus, Judas Iskariot, kombunda ngwe kemuhorora movineya, arire tja tja: 5 “Okutjavi omaze omavawa nga tji ye ha randisirwe kovimariva ovisilveri omasere yetatu, nu imbi ovimariva avi yandjewa kovasyona?” 6 Omambo nga keye hungirire motjimbe tjokutja eye me rikendere ovasyona, nungwari we ye hungirira motjimbe tjokutja eye wa ri erunga. Eye aa toora ondjaṱu yovimariva, notjiye ritoorere omuini mu imbi oviyandjewa.
7 Nungwari Jesus wa tjere: “Mu eseye! Ihi we tji tjitire eyuva rombakero yandje. 8 Ovasyona mu na wo aruhe, nungwari kamu nokukara na ami aruhe.”
Omerikutirokumwe wokuzepa Lasarus
9 Nu Ovajuda ovengi va zuvire kutja Jesus u ri mObetanie. Owo arire tji va i ngo, nu kave ire Jesus porwe, nungwari va ira okukamuna Lasarus, ingwi Jesus ngwa pendurire movakoke. 10 Ovapristeri oviuru opu ve rimanena okuzepa Lasarus wina, 11 orondu motjimbe tje Ovajuda ovengi ve ve humba nu ave kambura mu Jesus.
Omahitiro wa Jesus mOjerusalem
(Mt 21:1-11Mk 11:1-11Lk 19:28-40)12 Nu mependukirwa otjimbumba otjingi tjovandu mbe ere komayuva omanene wOpaska va zuvire kutja Jesus meya kOjerusalem. 13 Owo arire tji va toora otutavi twomavare nave kemutjakanena amave ravaere: “Hosiana! Nga tangwe ingwi ngu meya mena ra Muhona! Ombara ya Israel ngai tangwe!”
14 Jesus wa munine okasinona ne ke kavire, otja omatjangwa punga amaye tja:
15 “O tira, tjihuro tja Sion!
Tara ombara yoye mai ya,
aya kavire kokasinona.”
16 Ovahongewa ve omambo nga rutenga kave ye zuvire nawa. Nungwari Jesus tja za nokuhivirikwa, owo arire tji va zemburuka kutja omambo nga ya tjangerwa ye, nokutja owo ombinga ave mu tjitira.
17 Novandu mba mba ri puna Jesus indu eye tja isanene Lasarus meyendo ne mu pendura movakoke va hongononene imbi mbya tjitirwe. 18 Ovandu opu va zokukemutjakanena, tjinga ava zuva kutja eye wa tjita otjihimise hi. 19 Ovafarisei arire tji verihungirire oveni ave tja: “Mamu munu, eṋe kamu tji notjiṋa okutjita! Tareye, ouye auhe mau mu kongorere.”
Ovagrike tjiva mave paha Jesus
20 Nu mwa ri Ovagrike tjiva mokati kaimba mba ire kOjerusalem okukakumba momayuva wOpaska. 21 Owo va ire ku Filipus, ngwa zire kObetsaida mehi ra Galilea, nave katja: “Muhona, eṱe matu vanga okumuna Jesus.”
22 Filipus wa karaera Andreas, nowo aveyevari ave karaera Jesus. 23 Jesus arire tje ve ziri a tja: “Oiri nambano ye ya Omuna wOmundu tji ma tongamisiwa mohivirikiro ye. 24 Tjiri, tjiri me mu raere kutja ondwi yovikokotwa tji i hi nokuwira mehi nai koka mai rire imwe uriri. Nungwari tji ya koka oyo mai eta ovikurya ovingi. 25 Ingwi ngwa suvera omuinyo we me u pandjarisa, nu ngu ma tondo omuinyo we mouye mbwi me u ṱakamisire omuinyo waaruhe. 26 Ingwi ngu me ndji karere, nge ndji kongorere, kokutja imba ami pu mbi ri omukarere wandje wina a rire pa kara. Nu ingwi ngu me ndji karere, ma yozikwa i Tate.
Jesus ma hungire onḓiro ye
27 “Nambano omutima wandje wa kurunga, nu hi tje vi? Hi tje: ‘Tate, ndji yama moiri ndji?’ Nungwari ihi otji mbe era, kokutja mbi tuurunge oiri yomihihihamo ndji. 28 Tate, yandja ondjozikiro kena roye!”
Tjazumba amu zu eraka meyuru ari tja: “Ami mba yandja ondjozikiro kena randje, nu me ri pe ondjozikiro rukwao.”
29 Notjimbumba tjovandu mba kuramene mbo va zuvire eraka ndi, nu tjiva aave tja: “Indwi oruṱuṱumo.” Novakwao ave tja: “Omuengeri ongwa hungire na ye!”
30 Nungwari Jesus wa tjere ku wo: “Omambo nga kaye hungirirwe ku ami, nungwari ya hungirwa kweṋe. 31 Nambano ombanguriro youye mbwi ye ya; nambano omuhonapare wouye mbwi ma rambwa mouhonapare. 32 Nu ami tji mba tongamisiwa kombanda yehi, me nanene avehe ku ami.” 33 Eye wa hungira omambo nga, nu komuhingo mbwi otja raisa kutja eye ma ṱu onḓiro yomuhingo watjike.
34 Otjimbumba tja zirire atji tja: “Eṱe twe rihonga mOmatwako kutja Omutwirisiwa ma karerere nga aruhe. Nu mo hee vi tji motja Omuna wOmundu ma sokutongamisiwa? Omuna wOmundu ngwi, owaṋi?”
35 Jesus arire tja ziri a tja: “Ondjerera i ri mokati keṋu okaruveze okasupi. Ryangeye ngunda amu nondjerera, kokutja onḓorera ai ha wire kombanda yeṋu. Ingwi ngu ma ryanga monḓorera ke nokutjiwa ku ma i. 36 Ngunda amu nondjerera kambureye mondjerera, kokutja mu rire ovandu vondjerera.”
Okuhakambura kwovandu
Jesus tja za nokuhungira omambo nga, wa zapo ne kerihoreka ku wo. 37 Nandarire kutja Jesus wa tjitira ovihimise avihe mbi komurungu wovandu, owo kave kamburire ko mu ye. 38 Nomambo womuprofete Jesaja otji maye yenenisiwa indu tja tjere:
“Muhona, owaṋi ngwa kambura nomazuvarisiro wetu?
Nomasa wa Muhona ya vandururirwa aṋi?”
39 Owo opu ve ha sorere okukambura, Jesaja wina tjinga a tjere:
40 “Ndjambi wa poṱuparisa omeho wawo
na kokutisa omitima vyawo,
kokutja ave ha munu nomeho
nave ha zemburuka momitima
nave ha tanaukire ku ami
kutja e he ve verukisa.”
41 Jesaja wa hungirire omambo nga tjinga a munine ounene wa Jesus na tjinga a hungirire ye.
42 Nu nangarire nao ovanane ovengi vOvajuda va kamburire mu Jesus, nungwari tjinga ave tira Ovafarisei owo kave hongononene otjiṋa hi mokati kovandu, kokutja ave ha rambwa mosinagoge.
43 Owo ve vanga okuyozikwa i ovandu komeho yokuyozikwa i Ndjambi.
Omambo wa Jesus maye tjiti ombanguriro
44 Nu Jesus wa tjere neraka enene: “Ngu ma kambura mu ami ke nokukambura mu ami porwandje, nungwari wina ma kambura mu ingwi ngwe ndji hinda. 45 Ngu me ndji munu, eye wina ma munu ingwi ngwe ndji hinda. 46 Ami mbe ya mouye otja ngu mbi ri ondjerera, kokutja auhe ngu ma kambura mu ami a ha kara monḓorera. 47 Ingwi ngu ma zuu omambo wandje na ha kambura mu wo, ami hi nokumupangura. Ami hi ere okupangura ouye, nungwari mbe era okuuyama. 48 Nu ngu me ndji tondo na ha yakura omambo wandje, eye u nomupangure ngu me mu pangura. Omambo ngu mba hungire maye mu pangura meyuva esenina! 49 Ami omambo nga hi ye hungirire mouvara wandje omuini, nungwari Tate ngwe ndji hinda, ongwe ndji rakiza kutja hi tje vi nu hi hungire tjike. 50 Nu me tjiwa kutja omarakiza we ye nomuinyo waaruhe. Nomambo ngu me hungire owo nga porwe Tate nge ndji raera kutja mbi hungire.”
© Herero Revision Bible © Bible Society in Namibia, 2021.
