1 Inga onge ri omavandururiro ku Obadja: Imbi ombi ri oviṋa Muhona Ndjambi mbya hungirira omuhoko wOvaedom.
Muhona ma vere Ovaedom
Muhona wa tuma omuhindwa we komihoko,
neṱe twa zuva ombuze ye ndji mai tja nai:
“Ngatu rirongere tu karwise Ovaedom!”
2 Muhona ma tja nai kOedom:
“Ami me ku ngundiparisa;
novandu avehe mave ku nyengura.
3 Omeritongamisiro woye ye ku pukisa.
Otjihuro tjoye ohongora otjo
otjiṱunga tjoruuwa orukukutu;
onganda yoye i ri kombanda mozondundu,
nove otji mo rihungirire nai momutima:
‘Owaṋi hapo ngu ma yenene okundjinanena pehi?’
4 Nandi wa tungu onganda yoye
pondongamo tjinene otja otjiruwo tjonguvi
kutja oyo i munike aayo i ri mokati kozonyose,
ami me ku nanene pehi.
5 “Omarunga tji maye ya mouṱuku
maye toora imbi mbi maye vanga porwavyo.
Ovandu tji mave nikora omandjembere,
aruhe ve isa omandjembere tjiva.
Nungwari ovanavita na ove ve ku yandeka okumana.
6 Zondekurona za Esau, ovihuze vyeṋu vya pundwa.
7 Overikutevakumwe na eṋe ve mu tjita ovineya,
ve mu ramba mehi reṋu.
Ovandu mba ri nohange na eṋe nambano ve mu havera,
nu ve mu twira po ombate; nowo ve mu hungira nai:
‘Ozondunge azehe nḓa nḓu va ri na zo nambano ze ri pi?’
8 “Eyuva ndi mu me vere Ovaedom
me yandeke ovanazondunge vawo
nu me nyono ounongo wawo auhe.
9 Ovarumendu ovarwe ozombangaṋe va Teman mave uruma,
nomurwe auhe wovita mOedom ma ṱu.”
Ovaedom mave vererwa tjike?
10 “Eṋe, Vaedom, tjinga amwa punda nu amwa zepa
ovazamumwe veṋu, inḓa ozondekurona za Jakob,
otjinga amamu ṱisiwa ohoṋi nu amu yandekwa nga aruhe.
11 Eṋe mwa kuramene uriri
nokuhinokutjita otjiṋa meyuva ndo,
ovanavita na wo tjaave teya omivero vyawo.
Eṋe mwa ri ovavi tjimuna ovozonganda
mba yumbira outumbe wa Jerusalem
ozohanga nave kahaṋasana.
12 Eṋe mu sokutja kamu nyanderere oumba
wovazamumwe veṋu mOjuda,
nokuyoroka meyuva romayandekero wawo,
nu katjamu ve nyekerera mombamisiro yawo.
13 Eṋe mu sokutja kamu hitire motjihuro tjotjiwaṋa tjandje
kokutja mu nyandere ondatumisiro yatjo
nokukambura outumbe watjo meyuva rotjiwonga tjatjo.
14 Eṋe mu sokutja kamu kuramene
pomahakaeneno wozondjira
okukambura imba mbaa ve kondjo okutaura
nokuveyandja mouvara wovanavita na wo
meyuva rombamisiro yawo.”
Ndjambi ma pangura omihoko
15 “Eyuva ri ri popezu, ami ngu mbi ri Muhona,
mu me pangura omihoko avihe.
Vaedom, imbi tjingevyo mbi mwa tjita,
ombi mavi tjitwa ku eṋe.
Mamu yarurirwa imbi mbi mwa yandja.
16 Otjiwaṋa tjandje mbe tji vera tjinene momazenge
wandje kondundu yandje ondjapuke.
Nungwari omihoko avihe kominda avihe mavi
verwa tjinene komeho;
ovyo mavi verwa tjinene navi yanda.”
Outoṋi wa Israel
17 “Nungwari kondundu Sion tjiva mave taura,
noyo mai rire poṋa popayapuke.
Omuhoko wa Jakob ehi ndi mau ri isa po owaro,
oro hapo nda vazewa ouini wawo.
18 Omuhoko wa Jakob nowa Josef mavi sana otja omuriro;
ovyo mavi yandeke omuhoko wa Esau
otja omuriro tji u seseta ovihozu.
Kape nondekurona ya Esau ndji mai hupu.
Ami, ngu mbi ri Muhona, owami ngu mba hungire.
19 “Omuhoko mbwa zire kehi ra Juda rokeyuva
kokumuho mau isa po Edom ehi rawo;
imbwi mbwa zire kozondundu zokongurova
mau kambura Filisti momasa;
Ovaisrael mave kambura ehi ra Efraim nora Samaria
okuisapo ouini wawo;
omuhoko wa Benjamin mau kambura ehi ra Gilead.
20 Otjimbumba tjovita tjovahuurwa mba zire
kehi ra Israel rokokunene kweyuva
mave kotoka ave havere Fenisie
nga kokunene kweyuva kOsarefat.
Ovahuurwa mba zire kOjerusalem nambano mbe ri mOsardes
mave huura ovirongo vyehi ra Juda rokokumuho kweyuva.
21 Ovarumendu ovanautoṋi va Jerusalem
mave rwisa ehi ra Edom nave honaparere ro.
Nu Muhona omuini ongu ma rire Ombara.”
© Herero Revision Bible © Bible Society in Namibia, 2021.
