Ozombunguhiro zeyuva arihe
(Eks 29:38-46)1 Muhona wa hungira ku Moses a tja: 2 “Rakiza kOvaisrael nu itja nai ku wo: ‘Eṋe kondjeye okueta ku ami ozombunguhiro zovikurya nḓu maze kara nomuṋuko mbu ma u ndji pe onyuṋe moruveze ndwa tuwa po.
3 “ ‘Ombunguhiro oningiririsiwa, ndji mamu etere Muhona, oyo ndji: Eyuva arihe ozondjona mbari zombura imwe nḓe hi notjipo ze rire ombunguhiro oningiririsiwa ongarerere. 4 Ondjona imwe mo i punguha omuhuka, nu indji ongwao komuihi; 5 pamwe noruhere orunḓunḓura okirograma imwe ru rire ombunguhiro yovikurya, ndwa rungwa nomaze womiṋinga omawamawa orita imwe. 6 Indji ondji ri ombunguhiro oningiririsiwa ongarerere ndja zikirwa kondundu Sinai kutja i rire ombunguhiro oningiririsiwa, omuṋuko wayo omunanyuṋe ku Muhona. 7 Nombunguhiro yomanuwa ngai rire orita imwe yomavinu kondjona aihe peke. Indji ombunguhiro yomanuwa ku Muhona i tiririra mOtjouyapuke. 8 Nondjona ndji ongwao i punguha komuihi momuhingo mbu wa punguha indji yomuhuka, na puna indji ombunguhiro yomanuwa. Indji ombunguhiro oningiririsiwa, omuṋuko wayo omunanyuṋe ku Muhona.
Ombunguhiro yEsabata noyOmatendameno wOmueze
9 “ ‘Nungwari mesabata punguheye ozondjona mbari zombura imwe nḓe hi notjipo, noruhere orunḓunḓura ozokirograma mbari ndwa rungwa nomaze womiṋinga ru rire ombunguhiro yovikurya puna ombunguhiro yomanuwa. 10 Indii ondji ri ombunguhiro oningiririsiwa ndja pu pokupunguhwa mEyuva arihe rOkusuva puna indji ombunguhiro oningiririsiwa ongarerere na indji yomanuwa.
11 “ ‘Punguhireye Muhona meyuva etenga komueze auhe ombunguhiro oningiririsiwa: Ozondwiyona zozongombe mbari, nondwezu yonḓu imwe, nondjona imwe, nozondwezu zozonḓu hambombari zombura imwe, avihe mbi hi notjipo; 12 noruhere orunḓunḓura ozokirograma ndatu ndwa rungwa nomaze womiṋinga, puna ondwiyona yongombe aihe; noruhere orunḓunḓura ozokirograma mbari ndwa rungwa nomaze womiṋinga, puna ondwezu imwe yonḓu; 13 noruhere orunḓunḓura okirograma imwe ndwa rungwa nomaze womiṋinga puna ondjona aihe. Indji oyo ombunguhiro oningiririsiwa, ombunguhiro oningiririsiwa, omuṋuko wayo omunanyuṋe ku Muhona. 14 Nozombunguhiro zawo zomanuwa ngaze rire ozorita mbari zomavinu nondwiyona yongombe aihe, nozorita mbari kondwezu yonḓu, novita imwe nohinga kondjona. Indji ondji ri ombunguhiro oningiririsiwa meyuva etenga romueze auhe mombura. 15 Wina ngape punguhwe ondwezu imwe yongombo i rire ombunguhiro yokuisapo ourunde ku Muhona puna indji ombunguhiro oningiririsiwa ongarerere na indji yomanuwa.
Ozombunguhiro zEyuva enene rOzomboroto nḓe hi nosurise
(Lev 23:5-14)16 “ ‘Omukandi wOpaska kondjozikiro ya Muhona u tjitwa meyuva oritjamurongo na yane komueze omutenga. 17 Nu meyuva oritjamurongo na yetano komueze tjingewo, oro eyuva enene; oure womayuva hambombari mape riwa ozomboroto nḓe hi nosurise. 18 Nu meyuva etenga woronganeye pamwe okurikotamena; amu ungura ko otjiungura tjeyuva arihe mu ro. 19 Nu punguhireye Muhona ombunguhiro oningiririsiwa otja ombunguhiro yovikurya: Ozondwiyona mbari zozongombe, nondwezu imwe yonḓu, nozondjona hambombari zombura imwe; azehe ngaze kare nokuhinatjipo. 20 Nombunguhiro yovikurya yoruhere orunḓunḓura ndwa rungwa nomaze womiṋinga, ngai kare nai: Ozokirograma ndatu puna ondwiyona yongombe aihe, nozokirograma mbari puna ondwezu yonḓu. 21 Nu punguha okirograma imwe puna ondjona aihe yainḓa hambombari. 22 Wina punguha ondwezu imwe yongombo i rire ombunguhiro yokuisapo ourunde okutjitira otjiwaṋa ombunguhiro yomakohororero. 23 Punguheye imbi avihe puna indji ombunguhiro yomuhuka, ndji mai kara ombunguhiro oningiririsiwa ongarerere. 24 Momuhingo tjingewo eyuva arihe romayuva hambombari punguhireye Muhona ombunguhiro oningiririsiwa, omuṋuko omunanyuṋe ku Muhona. Oyo ngai punguhwe puna indji ombunguhiro oningiririsiwa ongarerere na indji yomanuwa. 25 Nu meyuva oritjahambombari woronganeye pamwe okurikotamena; amu ungura ko otjiungura tjeyuva arihe mu ro.
Ozombunguhiro pOmukandi wOmanikorero
(Lev 23:15-22)26 “ ‘Nu mEyuva etenga rOmukandi wOmanikorero, tji mamu etere Muhona ombunguhiro yovikokotwa ovipe, mEyuva reṋu rOtjivike woronganeye pamwe okurikotamena; amu ungura ko otjiungura tjeyuva arihe mu ro. 27 Punguheye ombunguhiro oningiririsiwa otja omuṋuko omuwa mbu mau yandja onyuṋe ku Muhona: Ozondwiyona mbari zozongombe, nondwezu imwe yonḓu, nozondjona hambombari zombura imwe, azehe ngaze kare nokuhinatjipo; 28 nombunguhiro yovikurya ngai kare nai: Oruhere orunḓunḓura ndwa rungwa nomaze womiṋinga, ozokirograma ndatu puna ondwiyona aihe yongombe, nozokirograma mbari puna ondwezu imwe yonḓu; 29 nokirograma imwe puna ondjona aihe yainḓa hambombari; 30 nondwezu imwe yongombo okutjitira otjiwaṋa ombunguhiro yomakohororero. 31 Punguheye imbi avihe puna indji ombunguhiro yomanuwa nombunguhiro oningiririsiwa ongarerere na indji yovikurya. Imbi ovinamuinyo ngavi kare nokuhinatjipo.
© Herero Revision Bible © Bible Society in Namibia, 2021.
