Eksodus 29 - Herero Revision Bible (HRR)

Omayapuriro wovapristeri

1 “Nu ove tjita nai ku Aron novazandu ve okuveyapurira ami koukarere woupristeri: Kambura ondwezu yongombe, nozondwezu mbari zozonḓu nḓe hi notjipo; 2 wina kambura ozomboroto nḓe hi nosurise, nomavanda nge hi nosurise nu nga rungwa nomaze womiṋinga, nomavanda omapapi nge hi nosurise nu nga huwa nomaze womiṋinga. Vi ungura noruhere oruwa rwovikokotwa. 3 Vi twa motjimbamba, nu u vi punguhire ami, puna indji ondwezu yongombe nozondwezu nḓa mbari zozonḓu.

4 “Eta Aron novazandu ve pomahitiro wOndanda yOmahakaeneno, nu u ve kohe momeva. 5 Tjazumba toora ozombanda, nu u zarise Aron ombanda yokehi, norupera rwokombanda yombanda yokoviṱuve, na indji ombanda yokoviṱuve oini, nondjaṱu yomorukoro, nu u mu varange nekwamo. 6 Twa ko ekori kotjiuru tje, nu u kute indji ondjenge ondjapuke kekori. 7 Nu toora omaze omatwirise nu u ye tirire kotjiuru tje u mu twirise na wo.

8 “Wina tumbuza ovazandu ve popezu u ve zarise ozombanda zokehi. 9 Nu kuta omakwamo mu wo, nu wina u twe ko omakori koviuru vyawo kutja ve kambure oukarere woupristeri, otja komazikamisiro omakarerere. Komuhingo mbwi otji mo yapura Aron novazandu ve.

10 “Nu eta ondwezu yongombe komurungu wOndanda yOmahakaeneno; ooAron novazandu ve ngave twe ko omake kotjiuru tjayo. 11 Zepera ondwezu ndji pomuvero wOndanda yOmahakaeneno, komurungu wa Muhona. 12 Tjazumba kambura kombinḓu yondwezu, nu u i hwe nomunwe woye kozonya zotjipunguhiro; nu ombinḓu ndja hupu tirira pehi meṋe yotjipunguhiro. 13 Toora ozonḓura azehe zoviṋa vyopehuri, noruamba, nozosyoti azeyembari nozonḓura nḓe ri ko, nu u ze ningiririsire kotjipunguhiro. 14 Nungwari indji onyama yondwezu yongombe, nomukova wayo notjandja vi ningirisisira pendje yorumbo. Indji oyo ombunguhiro yokuisapo ourunde.

15 “Kambura ondwezu imwe yonḓu yainḓa mbari, nu Aron novazandu ve ngave twe ko omake kotjiuru tjayo; 16 tjazumba zepa ondwezu yonḓu ndji, nu u toore ombinḓu yayo u i pemenene kotjipunguhiro okukondorokisa tjo. 17 Haṋa indji onyama yondwezu, nu u kohe oviṋa vyopehuri nozonyu nu u vi twe ponyama notjiuru. 18 Ningiririsira onyama ndji aihe yondwezu kotjipunguhiro. Omuṋuko wombunguhiro oningiririsiwa ndji ma u yandja onyuṋe ku Muhona.

19 “Kambura ondwezu ndji ongwao yonḓu; nu ooAron novazandu ve ngave twe omake kotjiuru tjayo; 20 nu zepa ondwezu ndji u kambure ko ombinḓu yayo nu u i hwe komatwi wokokunene kehi wooAron novazandu ve, na kominwe katjimunene vyomake wawo wokokunene, na ku katjimunene vyozombaze zawo zokokunene. Ombinḓu ndji ndja hupu i pamenena kotjipunguhiro okukondorokisa tjo. 21 Kambura ko ombinḓu, ndji ri kotjipunguhiro, nomaze wokutwirisa, nu vi pamenena kooAron novazandu ve, na kozombanda zawo kutja eye novazandu ve ve rire ovayapuke puna ozombanda zawo.

22 “Nu konyama yondwezu yonḓu kambura ko ozonḓura, okutja omutjira nozonḓura zoviṋa vyopehuri noruamba, nozosyoti azeyembari nozonḓura nḓe ri ku zo netumbo rokunene, orondu ondwezu yonḓu ndji ya yapurirwa Muhona. 23 Nu isa mo omboroto imwe ombutuputu nevanda rimwe romaze womiṋinga nevanda rimwe ropomakara motjimbamba tji tji ri komurungu wa Muhona mu mu nozomboroto nḓe hi nosurise. 24 Nu avihe mbi vi twa momake wooAron novazandu ve, nu gave vi take vi rire ombunguhiro yomatakero komurungu wa Muhona. 25 Tjazumba vi isa mo momake wawo, nu u vi ningiririsire kotjipunguhiro kombanda yombunguhiro oningiririsiwa. Omuṋuko wombunguhiro oningiririsiwa ndji ma u yandja onyuṋe ku Muhona.

26 “Nu tjazumba kambura orukoro rwondwezu yonḓu yomayapuriro wa Aron nu u ru take ru rire ombunguhiro yomatakero komurungu wa Muhona, Indwi ondu maru rire orwoye.

27 “Omupristeri tja twirisiwa, orukoro netumbo rondwezu yonḓu mbya yapurirwa omatwirisiro nga, nga vi yandjewe ku ami otja otjiyandjewa tjapeke nu vi yapurirwe omupristeri. 28 Imbi ngavi rire ovya Aron novazandu ve komukuma wOvaisrael, orondu indji oyo ombunguhiro yotjiyandjewa. Oyo ngai rire ombunguhiro yotjiyandjewa komukuma wOvaisrael okuza kozombunguhiro zawo zohange. Oyo ombunguhiro yawo yotjiyandjewa ku Muhona.

29 “Nu inḓa ozombanda ozondjapuke za Aron ngaze rire ozovazandu ve kombunda yonḓiro ye kokutja ve ze zare indu tji mave twirisirwa otja ovapristeri. 30 Omuzandu umwe we ngu me mu pingene moupristeri, nu ngu ma hiti mOndanda yOmahakaeneno okukarera Muhona mOtjouyapuke, nge ze zare oure womayuva hambombari.

31 “Nove kambura indji onyama yondwezu yonḓu yomatwirisiro wa Aron novazandu ve, nu u i sumisire moṋa momuyapuke. 32 Pomahitiro wOndanda yOmahakaeneno nga rire pu va rire onyama ndji puna omboroto ndja sewa motjimbamba. 33 Nowo ngave rye oviṋa mbi mbya ungurisiwa potjitjitwa tjondjesiro pomatwirisiro wawo. Nu ovapristeri porwe, mbu mave sokurya ovikurya mbi orondu ovyo oviyapuke. 34 Nu tji pa hupu onyama poo omboroto yombunguhiro yomayapuriro nga komuhuka, ove vi ningiririsa, avi riwa ko, orondu ovyo oviyapuke.

35 “Tjita nao ku Aron novazandu ve nawanawa otja punga ambe ku rakiza. Omayapuriro wawo ngaye tjitwe oure womayuva hambombari. 36 Eyuva arihe punguha ondwezu yongombe otja otjiyandjewa, kokutja pe kare ondjesiro yourunde. Komuhingo mbwi mo kohorora otjipunguhiro; tjazumba tji twirisa nomaze womiṋinga okutjiyapura. 37 Oure womayuva hambombari tjita ozombunguhiro zokuisapo ourunde kotjipunguhiro okutjiyapura. Nu ihi otjipunguhiro otji matji rire otjiyapuke tjinenene. Nu atjihe tji tja ṱunu ku tjo matji rire otjiyapuke.

Ozombunguhiro zeyuva arihe

(Num 28:1-8)

38 “Imbi mbi mo punguhire kotjipunguhiro ovyo mbi: Eyuva arihe, nokuhaisa, punguhira ozondjona mbari zombura imwe kotjipunguhiro. 39 Ondjona imwe mo i punguha omuhuka, nu indji ongwao komuihi. 40 Pamwe na indji ondjona ondenga yomuhuka punguha oruhere oruvapa okirograma imwe ndwa rungwa nomaze omakohoke womiṋinga orita imwe. Wina punguha orita imwe yomavinu i rire ombunguhiro yomanuwa. 41 Punguha ondjona indji oitjavari komuihi, nu puna yo punguha tjimuna pu indji yomuhuka. Omuṋuko wombunguhiro oningiririsiwa ndji ma u yandja onyuṋe ku Muhona. 42 Oyo ngai kare ombunguhiro oningiririsiwa ongarerere ku eṋe na kozondekurona zeṋu pomahitiro wOndanda yOmahakaeneno momurungu wa Muhona. Imbo ami opu me hakaenene na eṋe ne hungire na ove. 43 Imbo ami opu me hakaenene nOvaisrael, nu indji ongeṋangeṋeno youkarepo wandje mai tjiti kutja oruveze ru rire oruyapuke. 44 Otji me yapura indji Ondanda yOmahakaeneno na ihi otjipunguhiro. Nami me yapura ooAron novazandu ve wina kutja ve ndji karere motjiungura tjoupristeri. 45 Nu ami me tura mokati kOvaisrael, ne rire Ndjambi wawo. 46 Nowo mave tjiwa kutja owami ngu mbi ri Muhona, Ndjambi wawo, ngu mbe ve pitisa mOengipte okutura mokati kawo. Owami Muhona, Ndjambi wawo.