Moses ma pewa omatwako rukwao
(Deu 10:1-5)1 Muhona wa tja ku Moses: “Rihongera ovitjangero vyomawe vivari tjimuna imbi ovitenga; nami me tjanga ko omambo tjingewo, nga ri kovitjangero imbi ovitenga, mbi wa nyanyaura. 2 Rirongera omuhuka omunene tji pa tji u ronde kondundu Sinai, u ndji tjakanene kondomba yayo. 3 Nu ape ningi umwe ngu ma rondo puna ove; nu ape ningi umwe ngu ma munika pondundu ndjo aihe; nozonyanda nozongombe ngaaze karya meṋe yondundu ndjo.” 4 Moses otja honga ovitjangero vyomawe vivari tjimuna imbi ovitenga; nu rukuru muhuka wa penduka na karonda kondundu Sinai, Muhona punga e mu rakiza.
5 Nu Muhona wa rauka motjikamba, a kakurama pu Moses na isana ena re eyapuke ndi “Muhona”.
6 Nu Muhona wa kapita pu Moses na ravaere a tja: “Owami, Muhona, ngu ri Ndjambi ngwe ura nounyaṋutima nondjenda, ngu nomuretima, nu ngu raisa orusuvero orunene nouṱakame. 7 Ami mbi ṱakamisira omakwizikiro wandje komayovi womihoko ne isire ouvi nourunde; nungwari ko isa omunandjo nokuhaverwa, nu u varura ozondjo zooihe movanatje nga kovanatje vovanatje, kozondekurona ozetjatatu nga kozetjaine.”
8 Moses arire tja woro ozongoro ne rikotamene, 9 ama tja: “Muhona, ove tjiri tji we ndji pe ondjingonekero komurungu woye, arikana, kayende puna eṱe. Orondu otjiwaṋa hi otjirangaranga; tu isira ouvi nourunde wetu, nu tu isa po ouini woye.”
Omerikutiropamwe maye yarurwa koupe
(Eks 23:14-19Deu 7:1-5Deu 16:1-17)10 Nu Muhona wa zira a tja: “Tara, ami me tjiti omerikutiropamwe notjiwaṋa tjOvaisrael. Me tjiti ovihimise momurungu wotjiwaṋa tjoye atjihe mbi hi na vya tjitirwe kombanda yehi arihe na komihoko avihe, otjiwaṋa atjihe tji tji ri puna ove tji mune oviungura vya Muhona. Orondu ami me ku tjitire ovitirise. 11 Ṱakamisa imbi, mbi mbe ku rakiza ndino! Tara, me ramba Ovaamori nOvakanaan nOvahetite nOvaperesi nOvahevi nOvajebusi komurungu woye. 12 Ritjevera nawa kutja o he rikutu kuna ovature vehi ndo mu mo kahita, ave ha karira ombate kove. 13 Komeho yanao hahaureye ovipunguhiro vyawo, nu nyanyaureye ozongunḓe zawo zomawe ozonḓere, nu mu ke omiti vyawo vyovisenginina.
14 “Ove ko nokusokurikotamena kotjiserekarera tjotjisenginina; orondu owami Muhona ‘Omunaukoze’. Eye Ndjambi omunaukoze tjiri. 15 O rikutu kuna ovature vehi ndo kutja tji mave rikotamene nokutjitira oomukuru vawo ozombunguhiro ave he ku ṋanga okurya kozombunguhiro zawo. 16 Nu tjapo ngoo kambura ovasuko vawo okurira ovakazendu vovazandu voye, ovasuko mbo mave ve isapo pu ami nave ve tjiti kutja ve rikotamene koomukuru vawo.
17 “Ove ko nokuritjitira ko oviserekarera vyovisenginina mbya hamburwa nokurikotamena ku vyo.
18 “Ṱakamisa omukandi wOzomboroto nḓe hi nosurise; oure womayuva hambombari ryaa ozomboroto nḓe hi nosurise otja ami pu mbe ku rakiza, moruveze ndwa zikamisiwa rwomueze Abib. Orondu momueze mbo omu wa tjinda mOengipte.
19 “Omaveri aehe owandje. Otjirume atjihe otjiveri tjozongombe notjozonyanda zoye otjande. 20 Nungwari otjiveri tjokasino randurura nondjona. Nu tji u hi nokukerandurura, teya engoti rako. Everi arihe rovazandu voye randurura.
“Nu kape nomundu ngu ma munika komurungu wandje nomake nge ri tjo.
21 “Ungura omayuva hamboumwe, nu u suve meyuva oritjahambombari; wina suva moruveze rwokutaura ehi norwokunikora ovihape.
22 “Ṱakamisa Omukandi wOmakondero tji mwa utu okukonda ovitengakuhora, nandarire imbwi Omukandi wOviranda komayandero wombura.
23 “Ovandu voye avehe nga ve ye okurikotamena ku ami, Muhona, ngu ri Ndjambi wa Israel, ovikando vitatu mombura. 24 Orondu ami me ramba oviwaṋa komurungu woye ne parangisa ehi roye: Nu kape na umwe ngu me rizerire okuti kwoye, ove ngunda awa sekama okuya komurungu wa Muhona Ndjambi woye, ovikando vitatu mombura vyomukandi wOpaska.
25 “Ombinḓu yotjinamuinyo tjombunguhiro ko nokupunguha pamwe nozomboroto nḓe nosurise. Nu ombunguhiro yotjinamuinyo tji tja ṱire pomukandi wOpaska, ai hupisiwa ko nga ku muhuka.
26 “Ombura aihe eteye kondjuwo ya Muhona Ndjambi weṋu ovitengakuhora mbi mwa teya motjikunino tjeṋu.
“Ko nokutereka ko ondjona momaihi woina.”
27 Norukwao Muhona wa hungira ku Moses a tja: “Tjanga omambo nga; orondu nomambo nga ami me tjiti omerikutiropamwe na ove nOvaisrael.” 28 Moses wa ri pu Muhona omayuva omirongo vine nomauṱuku omirongo vine. Kaa ri omboroto nu kaa nu omeva. Neye wa tjanga omambo nga womerikutiropamwe kovitjangero vyomawe, okutja inga omatwako omurongo.
Moses ma rauka ondundu Sinai
29 Nu Moses tja heruka kondundu Sinai wa ri na imbi ovitjangero vivari vyomatwako meke re. Neye kaa tjiwa kutja omurungu we mau keṋakeṋa tjinga eye a hungira puna Muhona. 30 Nu Aron nOvaisrael avehe tji va muna kutja omurungu wa Moses mau keṋakeṋa, opu va tirira okuya popezu na ye. 31 Nungwari Moses we ve isana, nu Aron na imba ovanane avehe votjiwaṋa va kotoka ku ye; nu Moses wa hungira na wo. 32 Nu kombunda yanao Ovaisrael avehe ve ya popezu, neye we ve raera avihe Muhona mbya hungira ku ye kondundu Sinai. 33 Moses tja za nokuhungira na wo otja twako otjikutjire komurungu we. 34 Nu aruhe Moses tjaa hiti komurungu wa Muhona okuhungira na ye, aa isa ko otjikutjire nga tja piti. Neye tja piti pendje na raere Ovaisrael imbi mbya raerwa, 35 Ovaisrael ave munu kutja omurungu wa Moses mau keṋakeṋa. Nu Moses otjaa kutjire omurungu we rukwao nga tja hiti rukwao okuhungira na Muhona.
© Herero Revision Bible © Bible Society in Namibia, 2021.
