Markus 6 - Herero Revision Bible (HRR)

Jesus ma nyengwa mOnasaret

1 Jesus wa zapo poṋa mbo na yaruka kotjirongo ke kurira, novahongewa ve ve mu kongorera. 2 Nu mesabata eye wa uta okuhonga mosinagoge. Novengi mba ri mo tji ve mu zuva, va himisiwa i omahongero we: “Omundu ngwi avihe mbi wa isa pi? Oungee unongo mbwi eye mbwa pewa? Ovihimise vyomake we mbi wa isa pi? 3 Eye kangu ri omuungure wovipirangi are, omuna wa Maria, erumbi ra Jakobus na Josef na Judas na Simon? Nu imba mba tura mokati ketu kavaṱena kwe are?” Nowo arire tji ve mu humbu.

4 Jesus wa tja nai ku wo: “Omuprofete u yozikwa poṋa apehe posi nomoyawo na meṱunḓu re na mokati kovazamumwe ve.”

5 Punao, eye ka sorere okutjita ovihimise nangarire tjimwe poruveze ndo, posi na indu tja yambeka omake we kovavere ouṱiṱi na ve veruka. 6 Nu Jesus wa himisiwa tjinene i okuhinangamburiro kwawo.

Tjazumba eye otja ryanga movirongo ongondoroka ama hongo ovandu.

Jesus ma hindi ovahongewa omurongo na vevari

(Mt 10:5-15Lk 9:1-6)

7 Jesus wa isana ovahongewa omurongo na vevari pu ye, ne ve hindi kovevarivari. Eye we ve pa ouvara kombanda yozombepo ozohakohoke, 8 ne ve rakiza a tja: “Amu toora otjiṋa ngamwa mouyenda weṋu; ovikurya, ondjaṱu, novimariva, posi nokati okaṱaṱero. 9 Zareye ovikapwite kozombaze, nungwari amu twaerere ozombanda mbari.” 10 Eye wina we ve raera nai: “Tji mwa yakurwa mondjuwo otja ovayenda, kareye mondjuwo tjingeyo ndjo, nga tji mwa zu mo motjirongo ho. 11 Tji mwe ya poṋa ovandu pu ve hi nokumuyakura poo pu ve hi nokupuratena ku eṋe, zapoeye nu mu pume oruuma kozombaze zeṋu. Ihi matji rire omahongononeno ku wo!”

12 Ovahongewa va ya ave kazuvarisa kutja ovandu ve ritanaure kourunde wawo. 13 Owo va pitisa ozombepo ozengi ozohakohoke movandu, nu ave twirisa ovavere ovengi nomaze womiṋinga, nave ve verukisa.

Onḓiro ya Johanes Omupapitise

(Mt 14:1-12Lk 9:7-9)

14 Nombara Herodes wa zuvire oviṋa mbi, orondu ena ra Jesus ra zuvakere akuhe. Ovandu tjiva aave tja: “Johanes Omupapitise ongwa penduka movakoke! Eye opa zokukara nomasa okutjita ovihimise mbi.”

15 Nu ovandu varwe aave tja: “Eye oElia.”

Novakwao varwe aave tja: “Eye omuprofete tjimuna umwe wovaprofete imba ovakuru.”

16 Herodes tja zuva otjiṋa hi wa tja: “Eye oJohanes Omupapitise ami ngu mba kondisa otjiuru, ongwa penduka movakoke!” 17 Orondu Herodes ongwa hindire ovandu ve kakambure Johanes, ve mu pandeke, nu ve mu patere motjovakamburwa. Herodes wa tjita otjiṋa hi, mena rokutja eye wa kupire Herodias, omukazendu womuangu we Filipus. 18 Nu Johanes aa raere Herodes nai: “Kakokuwa okukupa omukazendu womuangu woye!”

19 Herodias opa karera nongore na Johanes notji ya vanga okumuzepa, nungwari eye a ha munu oruveze okutjita nao mena ra Herodes. 20 Herodes aa tira Johanes, eye tjinga aa tjiwa kutja Johanes omurumendu omusemba nomuyapuke, notji ye mu ṱakamisa nawa a ha munu otjipo. Eye wa suverere okupuratena ku Johanes, nangarire kutja aruhe ee mu kurungisa momutima.

21 Eyuva rimwe arire oruveze oruwa ku Herodias. Herodes, meyuva rongwatero ye, wa tjitira ovanane ozohongora avehe vouhona novahongore avehe vovimbumba vyovita novature oviuru avehe va Galilea omukandi. 22 Omukazona wa Herodias wa hita, a pundu na yorokisa Herodes novaṋangwa ve. Nu ombara otji ya tja komukazona ngwi: “Ningira otjiṋa ngamwa atjihe tji movanga ku ami, nami me ku pe.” 23 Oyo ye mu yanena potuingi a i tja: “Ami me ku pe ngamwa atjihe tji mo ningire, nangarire orumbembera rumwe rwouhona wandje!”

24 Omukazona arire tja piti na kapura ku ina a tja: “Hi ningire tjike?”

Ina wa zira a tja: “Ningira otjiuru tja Johanes Omupapitise!”

25 Tjimanga omukazona wa hakahana a yaruka kombara nu e keiningira a tja: “Me vanga kutja nambano nai u ndji pe otjiuru tja Johanes Omupapitise motjiyaha!”

26 Ombara ya ṱoruhoze tjinene mena rotjiṋa hi, nungwari oyo kai vangere okupanḓa mena roruyano oyo ndu ya tjita na mena rovaṋangwa vayo avehe. 27 Nu tjimanga ombara ya rakiza omutjevere kutja a kaete otjiuru tja Johanes. Omutjevere wa ya kotjovakamburwa na kakonda Johanes otjiuru; 28 tjazumba e tji eta motjiyaha ne tji yandja komukazona, nomukazona we tji yandja ku ina. 29 Ovahongewa va Johanes tji va zuva otjiṋa hi, arire tji ve ya, ave toora orutu rwe nu ave kerupaka komaendo.

Jesus ma parura ovarumendu omayovi yetano

(Mt 14:13-21Lk 9:10-17Jhn 6:1-14)

30 Ovaapostele va kotokere ku Jesus nave mu serekarerere oviṋa avihe mbi va tjitire na mbi va hongere kovandu. 31 Pa ri ovandu ovengi tjinene aruhe mbaa ve i nokukotoka, nga Jesus novahongewa ve tji ve ha ri noruveze nangarire ingwi okurya ovikurya. Jesus opa tjera ku wo: “Ngatu yende koṋa ku matu kakara atuyerike peke, eṋe mu kasuve kaṱiṱi.” 32 Nowo opu va rondera mokayaha nave i koṋa kwarwe peke ku va kakara aveyerike.

33 Nungwari ovandu ovengi ve ve muna owo tji yave i, notji va tjiza tjimanga kutja owo mave i ku tjiṋe. Ovandu mba va zire kovirongo avihe, nu va tupuka ngo pehi, ave katenga po okuvaza pu Jesus novahongwa ve. 34 Jesus tja heruka mokayaha wa muna otjimbumba otjinene tjovandu hi, neye we ve ṱira ondjenda, orondu owo va ri otja ozonḓu nḓe hi nomurise. Eye otja uta okuvehonga oviṋa ovingi. 35 Neyuva tji ratoko, ovahongewa ve arire tji ve ya ku ye nave tja: “Eyuva ratoko, nu indwi oruveze eṱe puma tuso okurikarera oveni. 36 Raera ovandu kutja ve yaruke nu ve yende kovirongo vyopopezu, ve kerirandere ovikurya.”

37 Jesus wa zira a tja: “Eṋe oveni ve pee otjiṋa okurya.”

Owo va pura nai ku ye: “Mo vanga kutja tu karande omboroto yovimariva ovisilveri omasere yevari kutja tu yandje kovandu avehe mba?”

38 Jesus otje ve pura nai: “Mu na ozomboroto ngapi? Twendeye mu katare.”

Nu tji va za nokumuna kutja ingapi, va tja: “Indano, nozohi mbari.”

39 Jesus wa hungira kovahongewa ve kutja ve haamise ovandu movimbumba pekepeke kombanda yehozu. 40 Ovandu arire tji va haama movimbumba mbumba tjiva esere na tjiva omirongo vitano. 41 Tjazumba Jesus wa toora inḓa ozomboroto ndano nozohi mbari, a tara keyuru, nu e ze sere ondaya. Eye wa koyora ozomboroto nu e ze yandja kovahongewa ve kutja ve ze haṋe movandu. Wina wa haṋa inḓa ozohi mbari movandu avehe. 42 Novandu avehe va rya nave kuta. 43 Tjazumba ovahongewa ave wongo outekero wozomboroto nozohi mbwa hupa ko, nave urisa na wo ovimbamba omurongo na vivari. 44 Novarumendu mba rya ovikurya mbi va ri omayovi yetano.

Jesus ma ka wondja kombanda yomeva

(Mt 14:22-23Jhn 6:15-21)

45 Kombunda yanao Jesus wa raera kovahongewa ve kutja ve ronde mokayaha nu ve tenge po okuyenda kObetsaida, munda mbwina womuronga, eye ngunda ama hindi ovandu okuyaruka kozoyawo. 46 Jesus tja za nokuvirikiza ovandu wa ya kondundu na kakumba. 47 Nu ongurova tji ye ya, okayaha tjandje ke ri mokati komuronga, nu Jesus wa ri erike pomukuro. 48 Eye wa muna kutja ovahongewa ve mave kondjo ouzeu okuhinga okayaha, owo tjinga aave hingi ouhunga nombepo. Nu omuhuka omunene wependukirwa pokati kondatu nohamboumwe, Jesus otje ya ku wo ama wondjo kombanda yomeva. Eye wa vanga okukapita pu wo, 49 nungwari owo tji ve mu muna ama wondjo kombanda yomeva va tjangovasi eye otjiruru, notji va ura tjinene. 50 Owo avehe ve mu muna nave uruma tjinene.

Nungwari Jesus wa hungira ku wo tjimanga na tja: “Yanḓipareye! Owami. Amu tira!” 51 Tjazumba a rondo mokayaha puna wo, notjivepo atji porimana. Ovahongewa ve va himwa tjinene, 52 orondu owo kave zuvire nawa inga omaheero womatakavarisiro wozomboroto; otjiṋa hi kave tji zuvire oparukaze.

Jesus ma verukisa ovavere mOgenesaret

(Mt 14:34-36)

53 Nowo va konda munda mbwina womuronga, ave ya mehi ra Genesaret nu ave haka okayaha komukuro. 54 Nowo tji va za nokuheruka mokayaha, ovandu va hakahana okuzemburuka Jesus. 55 Ovandu va tapakaṋa ehi arihe ndo, ave kaeta ovavere potuara, nu ave ve twara ngamwa koṋa ku va zuvire kutja oku ku na Jesus. 56 Nu ngamwa akuhe eye kee ya, kutja omovirongo poo omovihuro poo omotukondwa tomahi, ovandu aave eta ovavere poruveze romarandisiro, nave mu ningire kutja ovavere ve ṱune nangarire kotjikoro tjombanda ye; nu avehe mba ṱuna ku ye va veruka.