Jeremia 5 - Herero Revision Bible (HRR)

Ouvi wa Jerusalem

1 Vature va Jerusalem,

tuurungeye omivanda vyeṋu!

Yevayeveye! Rimunineye oveni!

Paheye nawa poṋa pomarandisiro!

Mamu sora okumuna omundu umwe

ngu ma tjiti imbi mbi ri ovisemba,

nu ngu ma kondjo okukara

nouṱakame ku Ndjambi are?

Tji mwe mu munu, Muhona

ma isire Jerusalem.

2 Nandarire kutja mu tja mu

rikotamena ku Muhona,

kamu tjiti otja pu mu heya.

3 Tjiri, Muhona u paha ouṱakame.

Eye we mu tona,

nungwari eṋe kamu karere ko na tja;

eye we mu tona okuhihamisa,

nungwari eṋe mwa panḓa okurihonga.

Eṋe mwa ri ovirangaranga,

nu mwa panḓa okuritanaura.

4 Ami mbe ripura nai:

“Imba owo ovandu vokehi uriri,

nu kave nozondunge,

owo ve ritjinda ouyova;

kave tjiwa kutja Ndjambi wawo

u vanga tjike,

nokutja Muhona u vanga

kutja ve tjite tjike.

5 Ami me i kovandu ovanauvara

ne kahungira puna wo,

orondu owo, tjiri, mave tjiwa imbi Ndjambi

wawo mbye vanga,

na imbi Muhona mbye vanga kutja ve tjite.”

Nungwari owo avehe wina va imbirahi

ouvara wa Muhona,

nu ve panḓa okukara nonḓuviro ku ye.

6 Ozongeyama movihwa opu maze zu okuvezepa;

nozombungu zokuti onguza maze ve nyondorora,

novitotongwe mavi yekuveyeva movihuro vyawo.

Ovandu mbo tji mave piti, owo mave hahaurwa,

orondu ourunde wawo ouingi tjinene,

nu movikando pekepeke va poka ku Ndjambi.

7 Muhona wa pura a tja:

“Ovandu vandje meve isirire tjike omauvi wawo?

Ovanatje vawo ve ndji esa,

nave rikotamena koomukuru vovisenginina.

Ami mba parura ovandu vandje nga tji ve kuta,

nungwari owo va katuka otukupo,

nu va kara puna ovakorondu.

8 Owo va ri otja oukambe outwezu mbwa ṋunisiwa,

nu mbwe ura nozonḓuma,

auhe aa nanukire omukazendu womukwao.

9 Ami hi nokusokuveverera oviṋa otja imbi,

nokusutisa otjiwaṋa otja ihi are?

10 Ami me hindi ovanavita okukakonda

omivite vyotjiwaṋa tjandje,

nungwari kakukevinyona oparukaze.

Meve raere kutja ve pore otutavi,

orondu otutavi twi katwandje.

11 Ovaisrael nOvajuda kava ri

nouṱakame ku ami oparukaze.

Ami, ngu mbi ri Muhona,

owami ngu mba hungire.”

Muhona ma imbirahi Israel

12 Otjiwaṋa tja Muhona tje mu pataṋa natji tja: “Eye, tjiri, ke na tji ma sora. Eṱe katu nokukara nomayuva omazeu; katu nokumuna ovita poo ondjara.” 13 Owo va tjere ovaprofete katjiṋa, owo ombepo uriri nu kave nombuze, ndji za ku Muhona. 14 Muhona, Ndjambi Omunamasaaehe, opa tjera nai ku ami: “Jeremia, mena rokutja ovandu mba va hungira oviṋa mbi, ami me sanisa embo randje komuriro motjinyo tjoye, nowo mave sana kozonguṋe, nomuriro mau ve seseta.”

15 Tjiwaṋa tja Israel, Muhona ma eta otjiwaṋa okuza kokure okuyekumurwisa. Otjo otjiwaṋa otjinamasa tji tji ha haverwa, notjikuru tjeraka ndi mu he ri i. 16 Ovayumbe vawo vouta ovarwe ozombangaṋe mbe zepa nokuhinotjari. 17 Owo mave sasaura ovihape novikurya vyeṋu; mave zepa ovanatje veṋu ovazandu novakazona, nozonyanda nozongombe zeṋu wina; nu mave yandeke omivite nomikuyu vyeṋu. Ovihuro mbya zeuparisiwa ku mwe riyameka, mavi nyonwa i ovimbumba vyawo vyovita.

18 Muhona ma tja nai: “Nungwari nangarire momayuva ngo, ami himee yandeke otjiwaṋa tjandje okumana. 19 Owo tji mave pura kutja okutjavi tji mba tjita oviṋa mbi, ve raera nai, Jeremia: ‘Otja indu tji mwa humburuka na ami namu kakarera oomukuru wozonganda mehi reṋu oveni, eṋe otjinga amamu kakarera ovandu wozonganda mehi ndi he ri oreṋu.’ ”

Ndjambi ma rongo otjiwaṋa tje

20 Muhona ma tja nai: “Raera ozondekurona za Jakob, nu u zuvarise nai kotjiwaṋa tja Juda: 21 Purateneye, mayova nomahipa, mbu mu nomeho, nungwari mbu mu ha munu, nu mbu mu nomatwi, nungwari mbu mu ha zuu. 22 Owami Muhona; okutjavi tji mu he ndji tira? Okutjavi tji mu ha zezera komurungu wandje? Ami mba twa po ozondunduvahi zeheke okurira omuruko wokuvare, omuruko omukarerere okuvare mbu ku ha tanana. Okuvare nanda ku riyumbu, kamaaku ruruma kombanda yawo; ozongazona nandi za hwaara kamaaze u teya. 23 Nungwari ove, tjiwaṋa, oove otjirangaranga notjipirukire; ove wa yepa mondjira nu we ndji esa. 24 Ko na pu we ripura okundjiyozika, nandi mbe ku rokisira ombura yokurooro noyoruteṋi moruveze orusemba, nandi mbe ku pa oruveze rwomakondero ombura aihe. 25 Moruveze rwanao, ourunde woye wa tjaera ondaya yoviṋa mbi oviwa kove.

26 “Ovanauvi ve ri mokati kotjiwaṋa tjandje, owo ve rangavara otja ovayeve mbe yara ozongwehe okukambura ozonḓera, nungwari tjandje owo va twa po ozombate zawo okupata ovandu. 27 Otja omuyeve tje urisa otjiwongo tje nozonḓera, owo otji ve urisa ozondjuwo zawo novipunda. Opu va za okurira ovanamasa novatumbe, 28 nopu va za okuṋuna nokuparuka nawa. Owo kave yandisa ozondjito zawo zouvi. Kave yandja ousemba kozosewa, nu kave raisa omausemba kovaṋiṋikiziwa.

29 “Nungwari, ami, ngu mbi ri Muhona, meve verere oviṋa mbi; ami me sutisa otjiwaṋa otja ihi. 30 Otjiṋa otjitirise notjiurumise tja tjitwa mehi: 31 Ovaprofete ve hungira ovizeze porwavyo; ovapristeri ve honapara otja ovaprofete punga amave ve rakiza, notjiwaṋa tjandje katji panḓa. Nungwari owo mave tjiti vi, avihe mbi tji vya yanda?”