Omuprofete Mikaja ma rongo Ahab
(2Eku 18:2-27)1 Oure wozombura ndatu pa kara ohange pokati ka Israel na Sirie. 2 Nungwari mombura oitjatatu Josafat, ombara ya Juda, weya okuhakaena na Ahab, ombara ya Israel.
3 Ahab wa pura kovahongore ve na tja: “Okutjavi tji twa hirimana uriri nokuhinokukotora otjihuro Ramot mOgilead okutjisa ko kombara ya Sirie? Otjo otjetu nu!” 4 Nu Ahab wa pura ku Josafat na tja: “Mo vanga okuyenda puna ami okukarwisa Ramot?”
Josafat wa zira a tja: “Ove tji we rirongere, ami wina me rirongere puna otjimbumba tjandje tjovita na puna ovakavire wina. 5 Nungwari rutenga pura ku Muhona nao.”
6 Ahab otja woronganisa ovaprofete mbu mave ngara omasere yane, e ve pura na tja: “Hi yende okukarwisa otjihuro Ramot?”
Nowo va zira nave tja: “Ketjirwise! Muhona me ku pe outoṋi.”
7 Nungwari Josafat wa pura na tja: “Kape na omuprofete warwe ngu ma sora okutupurira ku Muhona are?”
8 Ahab we mu zira a tja: “Pena umwe, ingwi Mikaja, omuzandu wa Imla. Nungwari ami mbe mu tonda, eye tjinga e he ndji ukire otjiṋa otjiwa, aruhe tjinga e ndji ukira oviwonga uriri.”
Josafat we mu zira a tja: “O tja nao, kako!”
9 Ombara Ahab opa isanena omukarere ombondo wondjuwo youhona ne mu raere kutja a kaete Mikaja tjimanga.
10 Ozombara azeyembari za haama kovihavero vyazo vyouhona potjitondero pendje yomuvero wa Samaria aza zara otupera twazo twouhona; novaprofete avehe va ukira momurungu wazo. 11 Umwe wovaprofete mba wena Sidkija, omuzandu wa Kenana, we riungurira ozonya zovitenda, na tja ku Ahab: “Muhona ma tja nai: ‘Ove mo rwisa Ovasirie nozonya otja inḓa, nga tji we ve yandeke.’ ” 12 Ovaprofete avehe varwe va hungira tjingetjo nave tja: “Karwise Ramot, nove moka toṋa. Muhona me ku pe outoṋi.”
13 Omukarere ngwi ombondo ngwa ya okukapaha Mikaja wa tja nai ku ye: “Ovaprofete avehe varwe va profetera ombara ouṋingandu, nove tjita otja ovakweṋu wina.”
14 Nungwari Mikaja wa zira na tja: “Tjimbe tja Muhona omunamuinyo, ami me hungire imbi Muhona mbi me ndji raere.”
15 Neye tje ya kombara Ahab, eye we mu pura na tja ku ye: “Mikaja, ami nombara Josafat ngatu karwise Ramot?”
Mikaja wa zira a tja: “Twendeye, nu mamu ka toṋa. Muhona me mu pe outoṋi.”
16 Nungwari Ahab we mu zira nai: “Ami hi ku raere ovikando vingapi kutja u hungire ouatjiri porwe ku ami mena ra Muhona?”
17 Mikaja wa zira na tja: “Ami mba muna Ovaisrael avehe ava rimbara kozondunda tjimuna ozonḓu nḓe hi nomurise. Nu Muhona wa tja: ‘Ovandu mba kave nomunane; ve esa ve yende kozoyawo mohange.’ ”
18 Ahab wa tja nai ku Josafat: “Ami mbe ku raera kutja Mika kemee ndji ukire otjiṋa otjiwa aruhe, me ndji ukire oviwonga uriri.”
19 Mikaja wa hungira komurungu na tja: “Nambano puratena ku imbi Muhona mbi ma hungire! Ami mba munu Muhona a haama kotjihavero tje tjouhona meyuru, ovaengeri ve avehe ava kurama posi ye. 20 Muhona wa pura a tja: ‘Owaṋi ngu ma popo Ahab kutja a kaṱire mOramot?’ Ovaengeri tjiva va hungira otjiṋa tjimwe, nu imba ovakwao va hungira otjiṋa tjarwe, 21 nga ombepo imwe tji ya kayenda komurungu, ai ya ku Muhona nai tja: ‘Ami me mu popo.’ Muhona we i pura a tja: ‘Mo mu popo komuhingo uṋe?’ 22 Ombepo ya zira ai tja: ‘Ami me katjita kutja ovaprofete va Ahab avehe ve kore ovizeze.’ Muhona wa tja ku yo: ‘Twende nu u kemupope. Ove moka toṋa.’ ”
23 Nu Mikaja wa mana okuhungira na tja nai ku Ahab: “Pa tjitwa nai. Muhona wa yandjera kutja ovaprofete voye ve ku korere ovizeze. Nungwari Muhona omuini we ku yengera otjiwonga.”
24 Sidkija, omuzandu wa Kenana, wa ya ku Mikaja ne mu tono orupyu kotjitama, na tja ku ye: “Ombepo ya Muhona ya ze mo vi mu ami nai kahungira na ove?”
25 Mikaja wa zira nai: “Ove mo rimunine omuini meyuva ndo tji mo kerihoreka metuwo romokwara.”
26 Ombara Ahab wa rakiza komukarere we umwe na tja: “Kambura Mikaja u mu tware ku Amon, ingwi ongooneya yotjihuro, na ku Joas, omuzandu wombara. 27 Ve raera kutja ve mu twe motjovakamburwa, nu ve mu pe omboroto nomeva uriri, nga tji mba kotoka nokuhinatjipo.”
28 Mikaja wa zira a tja: “Tji wa kotoka nokuhinatjipo, okutja Muhona ka hungirire notjinyo tjandje.” Neye wina wa weza na tja nai: “Auhe weṋu nga puratene ku inga ngu mba hungire.”
Onḓiro ya Ahab
(2Eku 18:28-34)29 Ahab, ombara ya Israel, na Josafat, ombara ya Juda, otji va karwisa otjihuro Ramot mOgilead. 30 Ahab wa tja nai ku Josafat: “Tji matu i kovita, ami me riteturura, nungwari ove mo i awa zara otja ombara.” Ombara ya Israel otji ya ya kovita aye riteturura.
31 Ombara ya Sirie ya rakizire kovatye womatemba wayo wovita omirongo vitatu na yevari kutja ave ha nanene omundu warwe motjirwa, posi yombara ya Israel aiyerike. 32 Nowo tji va muna ombara Josafat, avehe va tjangovasi eye onguri ombara ya Israel, nave mu rwisa. Nungwari Josafat tja ura, 33 owo otji va muna kutja kangu ri ngwi ombara ya Israel, notji va isa okumurwisa. 34 Nungwari Omusirie omurwe wa yumba otjiku ohei na yaha ombara Ahab pomahakaeneno wombanda ye yotjitenda nekwamo. Ahab wa ravaera komuhinge wetemba re rovita a tja: “Mba yahwa!” Tjazumba arire tja raere omuhinge ngwi kutja a pitise etemba motjirwa.
35 Otjirwa ngunda atja handja, ombara Ahab wa haama osemba metemba re rovita a hungamasana nOvasirie. Ombinḓu motjito tje ya ziza, nai urisa etemba pehi moukoto. Nongurova eye otja koka. 36 Kuṱa komahitiro weyuva kwa za ombuze kOvaisrael ndja tja nai: “Omurumendu auhe nga yaruke kehi rawo na kotjihuro tjawo!”
37 Ombara Ahab otja koka. Norurova rwe rwa kapakwa kOsamaria. 38 Etemba re rovita ra kakoherwa poruharwi rwa Samaria, ozombwa ku za rasera ombinḓu ye; novakorondu ve rikohera mu yo otja Muhona punga a heya.
39 Oviṋa avihe vyarwe Ahab mbya tjita, ondjuwo youhona ndja tunga nomayo wozondjou, novihuro avihe mbya tunga, vya tjangwa mEkuruhungi rOzombara za Israel. 40 Ahab tja koka, omuzandu we Ahasia we mu pingena okurira ombara.
Josafat ma rire ombara mOjuda
(2Eku 20:31—21:1)41 Mombura oitjaine youhona wa Ahab, ombara ya Israel, Josafat, omuzandu wa Asa, otja rira ombara ya Juda, 42 e notjiwondo tjozombura omirongo vitatu nandano; neye wa honapara mOjerusalem oure wozombura omirongo vivari nandano. Ina wa ri Asuba, omusuko wa Silhi. 43 Otja ihe Asa ngwa ri po komurungu we, eye wina aa tjiti imbi mbya ri ovisemba komurungu wa Muhona; nungwari ka haṋene ovipunguhiro vyovisenginina, novandu otjaave punguhire ko ozombunguhiro nave twimisire ko ovyomoro omuwa. 44 Josafat wa hangana nombara ya Israel.
45 Oviṋa avihe Josafat mbya tjita, ouvanḓe we novita vye, vya tjangwa mEkuruhungi rOzombara za Juda. 46 Eye wa isa po ovakorondu avehe, ovarumendu novakazendu, mbaa ve karere povipunguhiro vyovisenginina, imbi mbya hupa po okuza koruveze rwa ihe Asa.
47 Ehi ra Edom kara ri nombara; iyari honaparerwa i omuyarukirepo ngwa zikwa i ombara ya Juda.
48 Ombara Josafat wa tungisa ozondjuwozomomeva ozonene zokuyenda kehi ra Ofir okukaeta ongoldo, nungwari ozo za tekera mOesjon-Geber naze ha kayenda komurungu. 49 Ahasia, ombara ya Israel, wa vanga okuyandja ovarumendu ve okukayenda puna ovarumendu va Josafat mondjuwoyomomeva, nungwari Josafat wa panḓa.
50 Josafat wa koka na pakwa mOtjihuro tja David; nomuzandu we Jehoram we mu pingena mouhona.
Ahasia ma rire ombara mOisrael
51 Mombura oitjamurongo na hambombari youhona wa Josafat, ombara ya Juda, Ahasia, omuzandu wa Ahab, wa rira ombara mOisrael; neye wa honapara oure wozombura mbari mOsamaria. 52 Eye wa tura ondjo komurungu wa Muhona, ama kongorere otjihorera tjourunde tjaihe Ahab notjaina Isebel notjombara Jerobeam, ngwa turisire Ovaisrael ondjo. 53 Eye we rikotamena ku Baal ne mu karere, notja pindikisa Muhona, Ndjambi wa Israel, tjimuna ihe ngwa ri po komurungu we.
© Herero Revision Bible © Bible Society in Namibia, 2021.
