Ousemba wokurumata kwovakazona
1 OoMakla na Noa na Hogla na Milka na Tirsa va ri ovakazona va Selofhad, omuzandu wa Hefer, omuzandu wa Gilead, omuzandu wa Makir, omuzandu wa Manasse; avehe mba ovonganda ya Manasse, omuzandu wa Josef. 2 Nowo va kakurama komurungu wa Moses nomupristeri Eleasar novanane nombongo aihe pomahitiro wOndanda yOmahakaeneno, nave tja: 3 “Tate wa kokera mokuti onguza, nu ka ri novazandu. Eye ka ri motjira tja Kora tji tja pirukira Muhona, nungwari wa ṱira ourunde we omuini. 4 Okutjavi ena ra tate tji mari zengi momuhoko we, orondu eye tje hi nomuzandu? Tu peweye otjirumatwa tjetu mokati komuhoko wa tate!”
5 Moses otja twara otjiposa tjawo komurungu wa Muhona. 6 Nu Muhona wa hungira ku Moses a tja: 7 “Ovakazona va Selofhad mave hungire osemba. Ve pa ouini wawo mokati komuhoko vaihe. Otjirumatwa tjaihe ngatji konde ku wo. 8 Tjivisa Ovaisrael nai: ‘Omurumendu tja ṱu e hi nomuatje omuzandu, eṱa re ngari konde komuatje we omukazona. 9 Neye tje hi nomukazona, eṱa re yandjeye kovangu ve. 10 Nu tje hi novangu, eṱa re yandjeye kovangu vaihe. 11 Nu ihe tje hi novangu, eṱa re yandjeye komuzamumwe wopopezu na ye; ingwi nga rire ngwe ri kambura ri rire ouini we. Nu ihi ngatji rire omazikamisiro wetwako kOvaisrael otja Muhona pa rakiza ku Moses.’ ”
Josua ma toororwa okurira omupingene wa Moses
(Deu 31:1-8)12 Kombunda yanao Muhona wa tja nai ku Moses: “Ronda kozondundu Abarim, nu tara ehi, ndi me yandja kOvaisrael. 13 Nove tji wa zu nokurimuna, mo koka tjimuna erumbi roye Aron tja koka, 14 eṋe amuyevari tjinga amwe ndji pirukira mokuti onguza Sin, ombongo aihe tji va unaunina ami, indu tji mbe mu rakiza okuveraisira ouyapuke womasa wandje momurungu wawo pomeva wa Meriba.” Meriba oro oruharwi mOkades mokuti onguza Sin.
15 Nu Moses otja hungira ku Muhona a tja: 16 “Muhona, Ndjambi, Omuute wonyama aihe, nga zike omunane kombanda yotjiwaṋa hi, 17 ngu me tji hongorere movita, okutja omurumendu ngu me tji twara nokutjikotora, ombongo ya Muhona ai ha kara tjimuna ozonḓu nḓe hi nomurise.”
18 Muhona wa tja ku Moses: “Toora Josua, omuzandu wa Nun, omurumendu ngwe urisiwa nOmbepo yandje, nu u yambeke omake kotjiuru tje. 19 Mu kuramisa komurungu womupristeri Eleasar na komurungu wombongo aihe, nu u mu zike momurungu wawo a rire omunane. 20 Nu mu pa ouvara woye tjiva kutja Ovaisrael avehe ve kare nonḓuviro ku ye. 21 Eye nga kakurame komurungu womupristeri Eleasar ngu me mu ningirire omaheyero wo Urim komurungu wa Muhona. Eye nOvaisrael avehe ngave yende kovita nokukotoka otja komarakiza we.” 22 Nu Moses wa tjita otja Muhona pa rakiza ku ye; neye wa kuramisa Josua komurungu wombongo aihe, 23 na yambeke omake kotjiuru tja Josua, ne mu ziki kutja a rire omupingene we otja Muhona pa rakiza ku ye.
© Herero Revision Bible © Bible Society in Namibia, 2021.
