1 Ami mba muna indji Ondjona amai isa ko otjiyambo otjitenga tjaimbi hambombari; nu mba zuva otjinamuinyo tjimwe tjaimbi vine ama tji tja neraka rombosiro yoruṱuṱumo: “Indjo!” 2 Nu mba tara ne munu okakambe okavapa. Omukavire wako wa ri nouta, nu wa perwe ekori rouhona; neye wa kavira a i otja omutoṋe okukatoṋa rukwao.
3 Tjazumba Ondjona arire tji ya isa ko otjiyambo otjitjavari. Nami e zuu otjinamuinyo otjitjavari ama tji tja: “Indjo!” 4 Nu pa kumukire okakambe okakwao okaserandu pyu. Omukavire wako wa perwe ouvara okuisa ko ohange kombanda yehi, kokutja ovandu ve zepasane. Neye wa perwe engaruvyo enene.
5 Okuzambo Ondjona otji ya isa ko otjiyambo otjitjatatu. Nami e zuu otjinamuinyo otjitjatatu ama tji tja: “Indjo!” Ami mba tara ne munu okakambe okazorozu. Omukavire wako wa ri notjiviha meke. 6 Narire tji mba zuu ombosiro tjimuna oyeraka, ndi mari zu mokati kovinamuinyo mbi vine ndi mari tja: “Oriṱera imwe yovikokotwa kondjambi yeyuva rimwe, nozorita ndatu zovirya kondjambi yeyuva rimwe. Nungwari amu nyono omaze womiṋinga nomavinu.”
7 Ondjona tji ya isako otjiyambo otjitjaine, nami e zuu otjinamuinyo otjitjaine ama tji tja: “Indjo!” 8 Nami mba tara ne munu okakambe okavahe. Omukavire wako wa rukirwe kutja Onḓiro, nOtjovakoke tje mu kongorera. Novyo vya perwe ouvara kombanda yorukondwa orutjaine rwehi okuzepa ovandu novita nondjara nomitjise novipuka vyokuti.
9 Tjazumba indji Ondjona arire tji ya isa ko otjiyambo otjitjatano. Nu kehi yotjipunguhiro ami mba muna ko ominyo vya imba mba ṱa, tjinga ava zuvarisire embo ra Ndjambi nava kara nouṱakame mokuhongonona Jesus. 10 Owo va ravaerere neraka enene ave tja: “Muhona Omunamasaaehe, nomuyapuke, nomunauatjiri! Ngatu undje nga ruṋe, ove tji mo pangura ovandu kombanda yehi nokuvevara mena rokutja ve tu zepa?” 11 Nu auhe wawo wa perwe ombanda ombapa onde, nowo va raerwa kutja ve suve oruveze okasupi nga otjivarero tjovakwao ovakarere novakwao mongamburiro avehe vawo tji va ṱu otja wo tji va ṱire.
12 Nami mba muna indji Ondjona amai isa ko otjiyambo otjitjahamboumwe. Nu pa ri omanyinganyingiro wehi omahimise, neyuva ra tjituka ari zorere tjimuna ombanda yokupirika, nomueze au tjituka au rire omuserandu pyu tjimuna ombinḓu. 13 Ozonyose za wira kombanda yehi tjimuna omakuyu omangura ngu maye pumbukire pehi, imbwi omukuyu tji mau singwa i ombepo onḓeu. 14 Evaverwa ra zenga tjimuna embo emangwa, ndi mari mangwa, nozondundu azehe nomakoverwa aehe ya nyinganyingisiwa aye zukurwa motuveze twawo. 15 Nozombara zehi, novahonapare novahongore wovita novatumbe novanauvara novandu avehe varwe, nangarire ovakarere novakuturwa va kaṱara mozondimba na kehi yotuuwa twomatjo. 16 Nowo va ravaerere kozondundu na komatjo ave tja: “Wireye kombanda yetu nu mu tu horeke ku ingwi ngwa haama kotjihavero tjouhona, na komazenge wOndjona! 17 Indi eyuva etirise romazenge we re ya, nowaṋi ngu ma sora okusewa nomuinyo?”
© Herero Revision Bible © Bible Society in Namibia, 2021.
