Deuteronomium 14 - Herero Revision Bible (HRR)

Omutambo mbwa tjaerwa

1 “Oweṋe otjiwaṋa tja Muhona, Ndjambi weṋu, amu ritjanga ozondja motutu poo okurihora omaparu tji mamu riri ovaṱi. 2 Orondu oove otjiwaṋa tji tja yapurirwa Muhona, Ndjambi woye, nu Muhona we ku toorora kutja u rire otjiwaṋa tje omuini mokati koviwaṋa avihe, mbi ri kombanda yehi.

Ovinamuinyo ovikohoke novihakohoke

(Lev 11:1-47)

3 “O ri otjiṋa Muhona tja zikamisa kutja otjihakohoke. 4 Ovinamuinyo, mbi mamu yenene okurya ovyo mbi: Ongombe nonḓu nongombo, 5 nohorongo nonḓuno nomenye nombwindja nokatjove nongarangombe nongorowe, 6 novinamuinyo avihe, mbi nomiapi nu mbi yoora. 7 Nungwari imbi mbi mu hi nokuyenena okurya mokati koviyoore nu mbi hi nomiapi, ovyo mbi: Ongamero nombi nohere, orondu ovyo vi yoora, nungwari kavi nomiapi. Vi vareye ovihakohoke. 8 Nandarire ombinda wina oyo ohakohoke ku eṋe, orondu i nomiapi, nungwari kai yoora. Onyama yovinamuinyo mbi amu ri ko, nu amu ṱunu komitundu vyavyo.

9 “Ovinamuinyo avihe, mbi kara momeva, nu mbi mamu yenene okurya ovyo mbi: Avihe mbi novivava novikotji nga rire mbi mwa yenene okurya. 10 Nungwari avihe mbi hi novivava novikotji kamu nokuyenena okurya; vi vareye ovihakohoke.

11 “Ozonḓera azehe ozongohoke mamu yenene okuzerya. 12 Nungwari inḓa nḓu mu hi nokuyenena okurya mokati kazo ozo nḓa: Orukoze notjikuvikoze nonguvi, 13 notjimbirinyama, norukoze otja komihoko vyarwo, 14 nekwara otja komihoko vyaro, 15 nombo notjisiwi na kakwaya yokuvare, nokarukoze otja komihoko vyako, 16 notjisiwi tjomawe nondjimbi notjisiwi otjikeṋakeṋe, 17 nonḓera yomuronga, notjikuvyona, nonḓera yozohi, 18 nonḓera onene yozombahu, nonḓera yatjihongo otja komihoko vyayo, nondondamiti nondirupuku.

19 “Nu oupuka auhe ounavivava u vareye ouhakohoke; owo kau nokuyenena okuriwa. 20 Oupuka auhe oukohoke mbu nyangatara pehi mamu yenene okuurya.

21 “Amu ri ko omutundu wotjinamuinyo tji tje rikokere; mo yenene okutjiyandja kowozonganda ngwa tura puna ove a rire ngwe tji ri poo okutjirandisa komundu warwe wozonganda, ove tjinga au ri otjiwaṋa tji tja yapurirwa Muhona, Ndjambi woye.

“Ko nakutereka ko ondjona momaihi woina.

Otjitjamurongo

22 “Kovikurya avihe vyozondwi zoye mbi mavi hapa ombura aihe isa ko otjitjamurongo ku atjihe. 23 Nu twende poṋa Muhona, Ndjambi woye, puma vanga okukumbirwa; nu imbo komurungu we, nga rire pu wa rire otjitjamurongo tjovikokotwa vyoye, notjomandjembere notjomaze womiṋinga, noviveri vyozongombe novyozonyanda zoye kutja u rihonge okutira Muhona, Ndjambi woye aruhe. 24 Nu ondjira tji i ri onde kove, nove tji u hi nokuyenena okutwara otjitjamurongo koṋa Muhona, Ndjambi woye, ku ma vanga okukakumbirwa, mena rokutja Muhona, Ndjambi woye, we ku sere ondaya, tjita nai: 25 Randisa oviṋa mbi avihe, nu imbi ovimariva vi ṱakamisa u vi tware koṋa Muhona, Ndjambi woye, ku me rivangere; 26 nu randa oviṋa mbi avihe mbi mo zeri novimariva, nangarire ozongombe nozonyanda, nomavinu nomanuwa omazeu, nangarire avihe omutima woye mbi mau zeri; nu imbo tjitira pomukandi, ove neṱunḓu roye, komurungu wa Muhona, Ndjambi woye.

27 “Nungwari o zembi Ovalevi mbe tura movirongo vyoye, owo tjinga ave hi nehi poo otjirumatwa puna ove. 28 Kombunda yozombura ndatu aruhe eta otjitjamurongo tjovikunwa vyoye avihe, u tji pwike movirongo vyoye. 29 Ovikurya mbi ovyOvalevi, tjinga ave hi nehi poo otjirumatwa puna ove, nu wina ovyovozonganda, novyozosewa, novyovahepundu mbe tura movirongo vyoye. Owo ngave rye ve kute. Tjita nao kutja Muhona, Ndjambi woye, e ku sere ondaya moviungura vyoye avihe.