1 Embo ndi oro omatjangwa womambo nga hungirwa i Jeremia, omuzandu wa Hilkija, omupristeri umwe wotjihuro Anatot, mehi ra Benjamin. 2 Muhona wa hungira ku Jeremia mombura oitjamurongo nandatu, Josija, omuzandu wa Amon, tja ri ombara ya Juda; 3 nu Muhona wa hungira rukwao ku ye, Jojakim, omuzandu wa Josija, tja ri ombara ya Juda. Kombunda yanao, Muhona wa hungira ku Jeremia potuingi nga mombura oitjamurongo na imwe youhona wa Sidkija, omuzandu wa Josija. Momueze outjatano wombura ndjo ovature va Jerusalem otji va twarewa kouhuura.
Omaisaneno wa Jeremia
4 Muhona wa tja nai ku ami:
5 “Ami mbe ku toorora ngunda ambi hiye ku zezenga mezumo ranyoko;
nu ngunda au hiya kwatwa,
ami mbe ku yapura kutja u rire omuprofete woviwaṋa.”
6 Ami mba zira nai: “Muhona Ndjambi, ami hi nokutjiwa okuhungira; inga owami okaṱiṱi.”
7 Nungwari Muhona wa tja nai ku ami:
“O tja ingee oove okaṱiṱi;
twende kovandu ku me ku hindi,
nu u keveraere oviṋa avihe,
mbi me ku rakiza.
8 O ve tira,
orondu ami mbi ri puna ove okukuyama.
Ami, ngu mbi ri Muhona,
owami ngu mba hungire!”
9 Muhona wa roporora eke re, a ṱunu komiṋa vyandje na tja ku ami:
“Tara, ami me ku pe omambo ngu mo sokukahungira.
10 Ndino me ku pe ouvara kombanda yoviwaṋa nomauhona,
okuzukura nokuwisa,
okuyandeka nokuimbirahi,
okutungurura nokukuna.”
Ovirimunikise vivari
11 Muhona we ndji pura a tja: “Jeremia, mo munu tjike?”
Ami mba zira nai: “Me munu orutavi rwomuwongo.”
12 Muhona wa tja: “Ove u ri osemba, orondo ami me undju nombakatwi inga omayenenisiro wembo randje.”
13 Muhona we ndji pura rukwao a tja: “Mo munu tjike?”
Ami mba zira e tja: “Me munu onyungu, ndji mai surumuka, ndja hendama okuza komukuma wokeyuva kokunene, nu ndji ri pokutjenguka.”
14 Muhona wa tja ku ami: “Omanyoneno maye surumuka okuza komukuma wokeyuva kokunene ku avehe mba tura mehi ndi, 15 ami tjinga ame isana oviwaṋa vyokeyuva kokunene kutja vi ye. Ozombara zavyo maze twa ovihavero vyazo vyouhona pomivero vya Jerusalem nokuvikondorokisa otumbo twatjo na wina okuvikondorokisa ovihuro avihe vya Juda. 16 Ami me vere otjiwaṋa tjandje, orondu otjo tja tura ondjo tjinene; otjo tje ndji esa, atji kapunguhira oomukuru varwe ozombunguhiro natji kaungura oviserekarera vyovisenginina okurikotamena ku vyo. 17 Rirongera, Jeremia; twende u keveraere oviṋa avihe, mbi mbe ku rakiza. O ve tira nambano, tjapo ami ngee tjiti kutja u ve tire tjinene tji u ri momurungu wawo. 18 Orondu tara, ami ndinondi me ku sanisa kotjihuro otjinamasa, kongunḓe yotjitenda nekuma rongoporo kutja u sekamene ehi arihe ndi, okutja ozombara zOvajuda novaingona vazo, novapristeri vawo, notjiwaṋa atjihe tjehi. 19 Nowo mave ku rwisa, nungwari kave nokukuhavera, orondu ami mbi ri puna ove okukuyama. Ami ngu mbi ri Muhona, owami ngu mba hungire.”
© Herero Revision Bible © Bible Society in Namibia, 2021.
