1 Otja mbu tu ri ovaungure vapamwe na Ndjambi matu riyarikaṋa ku eṋe kutja amu ha pewa otjari tja Ndjambi omungandjo. 2 Ndjambi ma tja:
“Ami mbe ku zuvira moruveze orusemba,
nu mbe ku yama meyuva rondjamo.”
Tara, oruveze orusemba onambano, nu ndinondi ondi ri eyuva rondjamo!
3 Eṱe tu kondja kutja atu ha tjiti ombutarisiro komundu auhe ngamwa, kokutja motjiungura tjetu amu ha munika ondataiziro. 4 Nungwari mu avihe mbi tu tjita tu raisa kutja oweṱe ovakarere va Ndjambi. Eṱe twa kara nomuretima momaumba, na momatatumisiro, na momauzeu aehe ngamwa. 5 Eṱe twa tonwa, atu paterwa motjovakamburwa natu kara momazunganeno; twa ungurisiwa tjinene, natu kara omauṱuku omengi katumba natu nondjara. 6 Twe riraisa oveni kutja oweṱe ovaungure vapamwe na Ndjambi moukohoke na mounongo na mokukara nomuretima noupore. Avihe mbi twa tjita mOmbepo Ondjapuke na morusuvero rouatjiri, 7 na mokuzuvarisa ouatjiri na momasa wa Ndjambi nge ungura mu eṱe. Eṱe tuna ousemba otja otjirwise tjetu, okurwisa nokuriyeura natjo. 8 Eṱe tu yozikwa nu tu tengururwa; tu yambururwa nu tu tangwa. Tu varwa otja ovapukise, nungwari atu hungira ouatjiri; 9 tu varwa otja ovahatjiukwa, nungwari atu tjiukwa i avehe; otja ovaṱi, nungwari tareye, oweṱe mba tu nomuinyo; otja ovaverwa, nungwari atu hiya ṱa; 10 otja ovanaruhoze, nungwari aruhe atu nenyando; otja ovasyona, nungwari atu tumbisa ovengi; otja mbu tu hi notjiṋa, nungwari atu na avihe.
11 Vakwetu Ovakorinte, eṱe twa hungira ongahukiro na eṋe; omitima vyetu ku eṋe vi ri kamwaha okumanuka. 12 Katu patere omitima vyetu ku eṋe; oweṋe mbu mwa pata omitima vyeṋu ku eṱe. 13 Ami me hungire na eṋe aayo oweṋe ovanatje vandje. Tjiteye ku eṱe imbi eṱe mbi twa tjita ku eṋe: Omitima vyeṋu wina ngavi kare kamwaha!
Omaronga otja kovikaro vya imba mbe he ri ovakambure
14 Amu kara nehore rimwe na imba mbe ha kambura mu Kristus! Mape ya vi ousemba nouhasemba vi nanene kumwe? Nondjerera i noruwano rwatjike nonḓorera? 15 Mape yenene vi kutja pe sokukara omazuvasaneno pokati ka Kristus na Satan? Pe noruwano rwatjike pokati komukambure nomuhakambura? 16 Oomukuru vovisenginina ve noruveze rwatjike mondjuwo ya Ndjambi omunamuinyo? Orondu eṱe oweṱe ondjuwo ondjapuke ya Ndjambi omunamuinyo, otja Ndjambi punga a hungirire a tja:
“Ami me tura mu wo
ne ryanga mokati kawo;
me rire Ndjambi wawo,
nowo ave rire otjiwaṋa tjandje.”
17 Muhona opu ma zokutja:
“Zamoeye mokati kawo
nu mu haṋike na wo!
Amu ṱunu ko ku ihi tji tji ri otjihakohoke,
nami otji me mu yakura.
18 Ami me rire Iho,
neṋe mamu rire ovanatje
vandje ovazandu novakazona,
Muhona, Omunamasaaehe, ma tja nao.”
© Herero Revision Bible © Bible Society in Namibia, 2021.
