Omaronga komitanda
1 Muatje wandje, o zembi omahongero wandje nu aruhe kara nonḓuviro kuwo. 2 Omahongero wandje maye ku pe omuinyo omure nouṋingandu. 3 Orusuvero nouṱakame avi ku esa ko. Vi kuta mosengo yoye; vi tjanga momutima woye. 4 Tji wa tjiti nai, mo munu ondjingonekero nonyuṋe komurungu wa Ndjambi na kovandu.
5 á¹°akama mu Muhona nomutima woye auhe. O riyameke ku imbi mbi mo tjangovasi mo tjiwa. 6 Zemburuka Muhona mu avihe mbi mo tjiti, neye otji me ku sembamisire ondjira yoye.
7 O tjangovasi ove omuini oove onongo komurungu waindu tji u ri, nungwari tjinene kara nonḓuviro ku Muhona, nu u panḓe okutjita ouvi. 8 Tji wa tjiti nai, mape sana otja omuti omuwa omupange, mbu mau verukisa ovirwaro vyoye nu mbu mau porisa omihihamo vyoye. 9 Yozika Muhona mokumupunguhira ovitengakuhora vyovihape vyoye avihe. 10 Tjinangara mo tjiti nai, ovipwikiro vyoye mavi ura novikokotwa, nu mo kara nomavinu omengi tjinene nai nga tji u hi nokuyenena okuyepwika aehe.
11 Muatje wandje, Muhona tji me ku vyura, puratena nawa nu u yakure omavyuriro we. 12 Muhona u vyura imba mba suvera otja ihe tje vyura omuzandu we me nonyuṋe. 13 Omuṋingandu omundu ngu rira onongo, nomuṋingandu omundu ngu muna ozondunge. 14 Orondu mounongo muna ouwa okukapita osilveri; nowo ounanḓengu tjinene pongoldo, 15 na pomawe omahuze, nu kape notjiṋa tji mo sokuzera tji matji sasanekwa na wo. 16 Ounongo u ku pa omuinyo omure, nu wina u ku pa outumbe nondjozikiro. 17 Ounongo mau yorokisa omuinyo woye, nu mau ku hongorere mondjira yohange. 18 Ounongo owo omuti mbu yandja omuinyo ku imba mbe u wangata; novaṋingandu imba mbe kakatera kuwo.
19 Muhona wa zikamisa ehi mounongo we;
nu mondjiviro ye, eye wa zikamisa evaverwa.
20 Ounongo we ombu pupisa ozonḓonḓu,
nu ombu tjita kutja ovikamba vi roke ombura kombanda yehi.
21 Kakatera kounongo na kozondunge, muatje wandje. O vi esa kutja vi ze po pove. 22 Ovyo mavi ku pe omuinyo, nu mavi rire otja oviharekwa mosengo yoye. 23 Mo yenene okutwara ondjira yoye nokuhinatjipo, nu komoo putara. 24 Komoo tira ooma tji mo karara, nu mo rara noupore ouá¹±uku auhe. 25 Ko nokutira ko oviwonga vya tjimanga tjimuna imbi mbi mavi ya kovanauvi otja otjivepo. 26 Muhona eye ondjamo yoye; eye ke nokutwa ombaze yoye mombate.
27 Tji mo sora, tjita ouwa ku imba mbu mave u hepa. 28 O raere omuraranganda kutja nga undje nga komuhuka tji mo sora okumuvatera nambano. 29 O ripura notjiṋa ngamwa tji matji hihamisa omuraranganda woye, eye ngunda a tura meṋe yoye mohange. 30 O patasana nomundu moviṋa vya kauriri eye tje hiye ku tjita otjipo.
31 O ṱeruru novatjite voutwe, nu o ripura okutjita otja owo tji mave tjiti, 32 Muhona tjinga a tonda ovandu mbe tjita ourunde, nungwari eye u yakura ovasemba nouṱakame. 33 Muhona u senga ozonganda zovanauvi, nungwari u sera inḓa zovasemba ondaya. 34 Eye u nyekerera ovanyekerere, nungwari u raisa otjari tje koverisusuparise. 35 Ovanaunongo mave munu ondjozikiro, nungwari omayova mave riyambururire ko oveni.
© Herero Revision Bible © Bible Society in Namibia, 2021.
