Okuyarura koupe kwomerikutiropamwe wa Ndjambi
1 Inga onge ri omambo womerikutiropamwe Muhona nga rakiza ku Moses okutjita puna Ovaisrael mehi ra Moab posi yainga omerikutiropamwe eye nga tjita puna wo kondundu Horeb.
2 Moses wa woronganisa Ovaisrael avehe kumwe na tja ku wo: “Eṋe mwa muna oveni Muhona mbya tjita kombara ya Engipte na kovakarere vayo avehe na kehi rayo arihe. 3 Eṋe mwa muna imbi oviwonga, okutja imbi oviraisiro novihimise ovinene. 4 Nungwari Muhona ke mu pere omutima okukambura, nomeho okumuna, nomatwi okuzuva, nga ku ndinondi. 5 Ami mbe mu ryangisa mokuti onguza oure wozombura omirongo vine. Ozombanda zeṋu kaze nyondorokere, nozongaku zeṋu kozombaze kaze kurupire. 6 Eṋe kamwa ri nomboroto okurya, nomavinu nomeva omazeu okunwa, mu tjiwe kutja ami owami Muhona, ngu mbi ri Ndjambi weṋu. 7 Eṱe tji twe ya poṋa mba Sihon, ombara ya Hesbon, na Og, ombara ya Basan, otji va pita okuturwisa, nungwari eṱe twe ve havera, 8 natu kambura ehi rawo, natu ri haṋa momuhoko wa Ruben nowa Gad, na morumbembera romuhoko wa Manasse. 9 Ṱakamiseye nawa omambo womerikutiropamwe nga nokuyetjita kutja mu ṋingapare mu avihe, mbi mamu tjiti.
10 “Eṋe amuhe ndinondi mwa kurama komurungu wa Muhona, Ndjambi weṋu, okutja ovanane womihoko vyeṋu, novanene novatjevere veṋu, ovarumendu avehe Ovaisrael, 11 novakazendu novanatje veṋu, novozonganda mbe tura mokati keṋu, novake wozongune nga kovateke womeva. 12 Eṋe mu ri mba ndinondi okuyakurwa momerikutiropamwe wa Muhona, Ndjambi weṋu, nokuhita momakutasaneno, nga tjitwa noruyano rwa Muhona, Ndjambi weṋu, 13 Muhona kokutja ndino e mu tjite otjiwaṋa tje omuini, nokukara Ndjambi weṋu otja tja kwizikira eṋe nooiho mukururume Abraham na Isak na Jakob noruyano. 14 Kaweṋe porweṋu ami mbu me tjiti omerikutiropamwe nomakutasaneno nga woruyano, 15 nungwari me tjiti wo puna imba avehe mba kurama mba ndinondi komurungu wa Muhona, Ndjambi wetu, na wina puna ozondekurona zetu zokombunda.
16 “Eṋe oveni mamu tjiwa omuhingo mbu twa kara mOengipte, nokutja pa ri vi tji twa tuurunga ehi mokati koviwaṋa. 17 Eṋe mwa muna oomukuru vawo vovisenginina oviyaukise mbya ungurwa pomiti na pomawe, na posilveri na pongoldo. 18 Ritjevereye nawa kutja mokati keṋu ape ha kara omurumendu poo omukazendu poo onganda poo otjiwaṋa tji matji zapo pu Muhona, Ndjambi wetu, okukarera oomukuru vovisenginina vomihoko vyarwe. Okutjita nao maku sana nomuze mbu mau hapa okurira omuti omururu nomunauzuwo. 19 Ritjevereye nawa kutja ape ha kara omundu, tji ma zuu omambo nga womakutasaneno woruyano, ngu me rihivi momutima ama tja: ‘Mape kara nawa na ami, nandarire kutja me ryanga mourangaranga wandje omuini.’ Ihi matji mu nyono amuhe, novawa novavi pamwe. 20 Muhona kamaa isire omundu otja ingwi. Nungwari moruveze rwanao omazenge noukoze wa Muhona mavi yakere omundu ngwi, nomasengiro aehe, nga tjangwa membo ndi maye ya kombanda ye nga Muhona tje mu zemisa kombanda yehi. 21 Nu kouhumandu we Muhona me mu haṋa komihoko avihe vyOvaisrael otja kozosengiro azehe zomerikutiropamwe, nḓa tjangwa membo ndi romatwako.
22 “Nozondekurona zomihoko vyeṋu vyokombunda, novozonganda mba za kehi rokokure mave munu omanyoneno nomihihamo Muhona mbi ma eta mehi reṋu, nave tja nai: 23 ‘Omahi womakunino maye rire ongaango naye vandekwa nozosurungu nomongwa; kape na otjiṋa tji matji kunwa mu wo, nandarire ovikurya kamaavi hapa mu wo. Nu indi ehi mari sana kovihuro ooSodom na Gomora, nooAdma na Seboim Muhona mbya nyonene tja ṱire omazenge tjinene.’ 24 Nungwari imbi oviwaṋa avihe mavi pura ave tja: ‘Muhona wa tjitira tjike nai kehi ndi? Omapindi omanene nga ya pitira pi?’ 25 Nowo mave ziri nai: ‘Orondu otjiwaṋa tja Muhona tjinga atja teya omerikutiropamwe Muhona, Ndjambi wooihe mukururume, nga tjita puna wo indu tje ve pitisa mOengipte. 26 Owo aave karere oomukuru varwe vovisenginina mbu ve hi na va karerere rutenga, oomukuru Muhona mba tjaera kutja akuhe rikotamenwa. 27 Muhona opa pindikira notjiwaṋa tje, ne tji etere oviwonga avihe mbya tjangwa membo ndi mehi ratjo. 28 Muhona wa pindikire tjinene, nu momazenge we omanene we ve zukura mehi rawo ne ve nakaurire mehi rarwe mu ve ri nga ku ndinondi.’
29 “Imbi mbya undikwa, ovya Muhona, Ndjambi wetu; nungwari eye we tu vandururira oviṋa mbi avihe mbya tjangwa membo ndi, neṱe nozondekurona zetu tu sokukara nonḓuviro komatwako nokuyetjita nga aruhe.
© Herero Revision Bible © Bible Society in Namibia, 2021.
