Esekiel 35 - Herero Revision Bible (HRR)

Ndjambi ma vere ehi ra Edom

1 Muhona wa hungira ku ami 2 a tja: “Muatje womundu, senga ehi ra Edom nu u uke ro. 3 Raera ovandu kutja ami, ngu mbi ri Muhona Ndjambi, me tja nai:

Owami omunavita na eṋe, zondundu za Edom!

Ami me mu ririsa ongaango.

4 Ami ovihuro vyeṋu me vi ririsa ovitambatundu,

nokutja ehi reṋu ri rire ongaango.

Mamu tjiwa kutja owami ngu mbi ri Muhona.

5 “Ove, hi ra Edom, wa ri omunavita omukarerere wOvaisrael, nu we ve tarera amave ṱu nomangaruvyo meyuva rotjiwonga tjawo, indi eyuva romberero osenina yomauvi wawo. 6 Tjiri, ami otja ngu mbi ri Muhona Ndjambi omunamuinyo, onḓiro mai rire oumba weṋu, neṋe kamaamu poṋa momake wayo. Eṋe mu nondjo yokuzepa, nokuzepa opu maku zu okumukongorera. 7 Ami ehi rozondundu ra Edom me ri ririsa ongaango nu me zepa auhe ngu ma ryanga mu ro. 8 Ozondundu ami me ze vandeke noturova; notutu twaimba mba ṱa motjirwa matu vandeke ovivanda nomikutu. 9 Ami me ku ririsa ongaango nga aruhe, nu kape na ngu ma tura movihuro vyoye rukwao. Notji mo tjiwa kutja owami ngu mbi ri Muhona.

10 “Ove wa tja omihoko vivari, okutja Ovajuda nOvaisrael, puna omahi wavyo ovyoye, nove we vi isa po ovyoye, nandarire kutja ami, ngu mbi ri Muhona, owami ngu mbi ri Ndjambi wavyo. 11 Nambano, tjiri, otja ngu mbi ri Muhona Ndjambi omunamuinyo, ami me ku sutisire omazenge woye neruru nonyengo yoye mbi wa tjita kotjiwaṋa tjandje. Otjo otji matji tjiwa kutja ami me ku verere imbi mbi wa tjita ku tjo. 12 Nove mo tjiwa kutja ami, ngu mbi ri Muhona, mbe ku zuva amo yamburura ozondundu za Israel kutja ongaango nokutja ozoye okusokuzenyona. 13 Ami mba zuva omihingo vyoye vyomerihiviro omavi ngu wa hungira ku ami.”

14 Muhona Ndjambi ma tja nai: “Ami me ku ririsa ongaango tjinene nai, kokutja ouye auhe u yorokere omawiro woye, 15 tjimuna ove tji wa yorokera omanyonokero wa Israel, imbwi ouini wandje omuini. Ozondundu za Seir, ii, indi ehi arihe ra Edom mari rire ongaango. Omundu auhe otji ma tjiwa kutja owami ngu mbi ri Muhona.”