Esekiel 25 - Herero Revision Bible (HRR)

Omaukiro kOamon

1 Muhona wa tja nai ku ami: 2 “Muatje womundu, tara kOvaamoni nu u ve ukire nai: 3 Purateneye koviṋa mbi ami, ngu mbi ri Muhona Ndjambi, mbi me hungire. Eṋe aa mu nyekerere ondjuwo yandje tjaa i yambururwa, nehi ra Israel tjaari yandekwa novandu va Juda tjaave huurwa. 4 Eṋe tjinga amwa tjita nao, ami otjinga ame isa omihoko vyokomuhuka kutja vi mu havere. Ovyo mavi tono ozondanda zavyo mehi reṋu navi tura mu ro. Ovyo mavi ri ovihape vyeṋu navi nu omaihi weṋu. 5 Ami me tjiti otjihuro Raba tji rire omaryo wozongamero, nehi ra Amon ri rire omaryo wozonḓu, kokutja mu tjiwe kutja owami ngu mbi ri Muhona.”

6 Muhona Ndjambi ma tja nai: “Eṋe mwa tona otukwise namu haha ozombaze pehi mondjoroka. Mwa nyengura ehi ra Israel. 7 Eṋe tjinga amwa tjita nao, ami otjinga ame mu yandja mouvara womihoko vyarwe, mbi mavi mu pundu oviṋa nokumuhuura. Ami me mu nyono okumana nga tji mu hi nokuuhara amamu rire otjiwaṋa rukwao namu ha kara nehi reṋu oveni. Notji mamu tjiwa kutja owami ngu mbi ri Muhona.”

Omaukiro kOmoab

8 Muhona Ndjambi wa tja nai: “Mena rokutja Ovamoab va tjere omuhoko wa Juda wa sana komihoko avihe omikwao, 9 ami otjinga ame isa ovihuro mbyaa vi tjevere omuruko wehi ra Moab kutja vi rwisiwe puna ovihuro oviwaviwa mbi ooBet-Jesimot na Baal-Meon na Kiriataim. 10 Ami me isa omihoko vyokomuhuka kutja vi havere Ovamoab nOvaamoni, kokutja Ovamoab ave ha rire otjiwaṋa rukwao. 11 Ami me vere Ovamoab, nowo otji mave tjiwa kutja owami ngu mbi ri Muhona.”

Omaukiro kOedom

12 Muhona Ndjambi ma tja nai: “Ovaedom va sutisa Ovajuda noutwe, nomasutisiro ngo ya eta ondjo ongarerere kOedom. 13 Nambano ami me tjivisa kutja me vere ehi ra Edom ne zepa ovandu novinamuinyo mu ro. Ami me ri tjitire otjitambatundu okuza kotjihuro Teman nga kotjihuro Dedan, novandu mave ṱu motjirwa. 14 Otjiwaṋa tjandje tja Israel matji sutisa Ovaedom mena randje, notjo matji raisire Ovaedom omazenge wandje omandandi. Ovaedom otji mave tjiwa kutja okupirukira omazenge wandje maku hee tjike.” Muhona Ndjambi ongwa hungire nai.

Omaukiro kOfilistie

15 Muhona Ndjambi ma tja nai: “Ovafilisti va sutisa ovandu noutwe mba ri ovanavita na wo oure wozombura ozengi nave ve yandeke monyengo. 16 Nu ami otji me tjivisa kutja me rwisa Ovafilisti nu e ve yandeke. Ami me nyono avehe mba hupa po mOrutjandja rwa Filistie. 17 Ami meve vere tjinene nu meve sutisa okuyenena. Owo mave munu omazenge wandje. Notji mave tjiwa kutja owami ngu mbi ri Muhona.”