Eksodus 9 - Herero Revision Bible (HRR)

Omutjise omuzeu movinamuinyo

1 Norukwao Muhona wa hungira ku Moses na tja: “Twende ku Farao nu u katje nai ku ye: ‘Muhona, Ndjambi wOvaheberi, ma tja nai: Tji esa otjiwaṋa tjandje tji tjinde kutja tji kendjikarere. 2 Orondu ove tji mo panḓa rukwao kutja ve tjinde, 3 tara, eke ra Muhona mari tono ovinamuinyo vyoye, mbi ri mokuti, nomutjise omuzeu tjinene, okutja oukambe nousino nozongamero nozongombe nozonyanda. 4 Muhona ma pangura peke ovinamuinyo vyOvaisrael na imbi vyOvaengipte kutja ape ha ṱu otjiṋa ku imbi vyOvaisrael.’ ” 5 Nu Muhona wa zika oruveze rworive na tja: “Muhuka Muhona ma tjiti nai mehi ndi.” 6 Nu meyuva rokombunda yaindi Muhona wa tjita nao: Ovinamuinyo avihe vyOvaengipte vya koka; nungwari mu imbi vyOvaisrael kape na tjimwe tji tja koka. 7 Nu Farao wa hinda ovandu okukatara. Nu tara, movinamuinyo imbi vyOvaisrael kape na tjimwe tji tja ṱa. Nungwari omutima wa Farao wa kukutira ko, neye ka isire otjiwaṋa okutjinda.

Omisuro

8 Nu Muhona wa tja nai kooMoses na Aron: “Uriseye omake ayeyevari nombize yezuko. Nu Moses nge i yumbe meyuru momurungu wa Farao. 9 Noyo mai rire oruuma orunḓunḓura mehi arihe ra Engipte; nu kovandu na kovinamuinyo maru eta omisuro, mbi mavi rire omatwiyu mehi arihe ra Engipte.” 10 Komuhingo mbwi otji va kaeta ombize mezuko nave kakurama komurungu wa Farao. Nu Moses we i yumba meyuru. Noyo otji ya rira omisuro mbya rira omatwiyu kovandu na kovinamuinyo. 11 Nozondjai kaaze sora okukurama komurungu wa Moses, tjinga aza ri nomisuro otja ovandu avehe mOengipte arihe. 12 Nungwari Muhona wa kukutisa omutima wa Farao, nga tjaa ha puratene ku wo otja Muhona pa hungira ku Moses.

Ozombawe zombura

13 Norukwao Muhona wa tja ku Moses: “Muhuka ritupuka, kakurame momurungu wa Farao nu u katje nai ku ye: ‘Muhona, Ndjambi wOvaheberi, ma tja nai: Tji esa otjiwaṋa tjandje tji tjinde kutja tji kendjikarere. 14 Orondu otjikando hi me hindi omberero aihe kove omuini na kovakarere voye na kotjiwaṋa tjoye, u tjiwe kutja kape na warwe ngu ṱeki pu ami mouye auhe. 15 Orondu andakuzu mba roporora eke randje ne eta omutjise omuzeu kove na kotjiwaṋa tjoye, andakuzu wa yandekwa rukuru kombanda yehi. 16 Nungwari opu mba zu okukuyama kutja mbi ku raisire omasa wandje, nokutja ena randje ri hongononwe kombanda yehi arihe. 17 Nove ingee mo ritongamisa kombanda yotjiwaṋa tjandje nokuhinokuvanga kutja tji tjinde. 18 Tara, muhuka oruveze tjingero ami me rokisa ozombawe zombura nḓe hi na indu za tjiukirwe mekuruhungi arihe ra Engipte. 19 Hinda ovandu nambano ve kawonge ovinamuinyo, mbi ri mokuti, vi hingirwe kondjamo. Ovandu avehe novinamuinyo mbya vazewa mokuti nu mbi hi nakuetwa mozondjuwo zondjamo, maku wire ozombawe zombura navi koka.’ ” 20 Tjiva mokati kovahongore va Farao mbaa ve tira embo ra Muhona va eta ovakarere vawo novinamuinyo vyawo okuisa mokuti, nave vi hitisa mozondjuwo zomawameno. 21 Nungwari imba mba nyengura embo ra Muhona va isa ovakarere vawo novinamuinyo vyawo mokuti.

22 Nu Muhona wa tja ku Moses: “Yera eke roye keyuru, nu maku rauka ozombawe zombura kombanda yehi arihe ra Engipte, kombanda yovandu novipuka, na kombanda yovihape avihe vyokuti mehi ra Engipte.” 23 Moses wa yera okati ke keyuru, nu Muhona wa hinda otuṱuṱumo nozombawe zombura, norutjeno aru tono pehi. Nu Muhona wa rokisa ozombawe zombura mehi ra Engipte. 24 Nu kwa ri ozombawe notutjeno mbi hi nandjandero, mbya ri nomasa tjinene nu mbi hi na pu vya karere mehi ra Engipte okuza konduriro yotjiwaṋa mu ro. 25 Nozombawe zombura za tona oviṋa avihe mbya ri mokuti, ovandu novinamuinyo wina, mehi ra Engipte arihe. Inḓa ozombawe zombura za tona ovihape avihe vyokuti, nu za teya omiti avihe mokuti. 26 Omehi ra Gosen orini mu mwa ri Ovaisrael mumu ha ri ozombawe zombura.

27 Farao opa isanena ooMoses na Aron na tja ku wo: “Otjikando hi ami mba tjiti ourunde. Muhona eye onguri osemba; nungwari ami notjiwaṋa tjandje tu ri posyo. 28 Kumbeye ku Muhona, orondu otuṱuṱumo twa Ndjambi nozombawe zombura vya kapita tjinene. Ami otji me mu esa mu tjinde, neṋe amu uhara amamu kara.”

29 Moses arire tja tja ku ye: “Kamanga tji mba zu nokupita motjihuro, me yere omake wandje ku Muhona; notuṱuṱumo matu yanda nozombawe zombura kaze nakuroka rukwao, u tjiwe kutja ehi ora Muhona. 30 Nungwari ami me tjiwa kutja ove novakarere voye ingee kamu nondira ku Muhona Ndjambi.”

31 Otusepa novirya vya tombakanisiwa, orondu ovirya vya ri novihweka, notusepa twa twako osunda. 32 Nungwari ovikokotwa nomakunde kavi tombakanisirwe, tjinga avi ri oviseninakuhora.

33 Nu Moses wa pita motjihuro okuza po pu Farao, na yere omake we ku Muhona. Notuṱuṱumo nozombawe zombura vya kanuka, nombura kai rokere rukwao kombanda yehi. 34 Nu Farao tja muna kutja ombura nozombawe zombura notuṱuṱumo vya zu po, arire tja katuka rukwao na kukutisa omutima we, eye novakarere ve. 35 Ii, omutima wa Farao wa kukutisiwa, nga tje ha isire Ovaisrael okutjinda otja Muhona pa hungira ku ye notjinyo tja Moses.