Omavandururiro 8 - Herero Revision Bible (HRR)

Otjiyambo otjitjahambombari matji isiwa ko

1 NOndjona tji ya isa ko otjiyambo otjitjahambombari otji kwa kara omamwinino meyuru mangara oure wohinga yoiri. 2 Nami e munu ovaengeri hambombari, mba kuramene komurungu wa Ndjambi, nowo va perwe ozohiva hambombari.

3 Nomuengeri warwe ngwa ri notjiyaha tjotjingoldo tjokutwimisira mo ovyomoro omuwa we ere na kakurama potjipunguhiro. Neye wa perwe ovyomoro omuwa ovingi okuvipunguha puna ozongumbiro zotjiwaṋa tja Ndjambi atjihe kotjipunguhiro tjongoldo tji tji ri momurungu wotjihavero tjouhona. 4 Nomuise wovyomoro omuwa wa ronda kombanda puna ozongumbiro zotjiwaṋa tja Ndjambi okuza momake womuengeri ngwi ngwa kuramene komurungu wa Ndjambi. 5 Tjazumba omuengeri arire tja toora ihi otjitwimisiro tjovyomoro omuwa, e tji urisa nomuriro wotjipunguhiro ne u yumbu kombanda yehi. Nu pa kara ombosiro yomaraka notuṱuṱumo, notutjeno twombura, nomanyinganyingiro wehi.

Ozohiva inḓa ozondenga ine

6 Novaengeri imba hambombari, mba ri nozohiva hambombari otji ve rirongerera okuzeposisa.

7 Omuengeri omutenga wa posisa ohiva ye. Ozombawe zombura nomuriro mbya hovekwa nombinḓu arire tji vya yumbwa kombanda yehi. Norukondwa orutjatatu rwehi rwa ningiririsiwa nga ku indwi orutjatatu rwomiti, nehozu arihe etarazu wina.

8 Nomuengeri outjavari wa posisire ohiva ye. Notjiṋa tjaa tji munika otja ondundu onene ndji tjupa omuriro tja yumbirwe mokuvare. Norukondwa orutjatatu rwokuvare rwa tjitukire aru rire ombinḓu, 9 norukondwa orutjatatu rwovinamuinyo avihe, mbi kara mokuvare, rwa ṱire, norukondwa orutjatatu rwozondjuwozomomeva rwa hahaurirwe.

10 Tjazumba omuengeri outjatatu arire tja posisa ohiva ye. Nonyose onene ndjiyai yaka otja otjiyumbu tjomuriro ya raukire okuza kevaverwa nai wire morukondwa orutjatatu rwozonḓonḓu na motuharwi twomeva. 11 Nena raindji onyose ra ri “Kaururu”. Orukondwa orutjatatu rwomeva rwa rira orururu, novandu ovengi va koka mena rokunwa omeva nga, owo tjinga aya rira omaruru.

12 Okuzambo omuengeri outjaine a posisa ohiva ye. Norukondwa orutjatatu rweyuva norwomueze norwozonyose arire tji rwa tonwa, nga ondjerera yavyo oitjatatu tji ya zorerisiwa. Norukondwa orutjatatu rwomutenya karwa ri nondjerera, na indwi rwouṱuku wina.

13 Nami arire tji mba munu ne zuu onguvi ndji mai tengerere kombanda mevaverwa ama i ravaere nai neraka enene: “Owee, owee! Owee ku imba avehe mba tura kombanda yehi, ovaengeri mba vetatu varwe tji mave posisa ozohiva zawo!”