Ondjeverero kOmamunine
(Eks 27:20-21)1 Muhona wa hungira ku Moses a tja: 2 “Yandja omarakiza nga kOvaisrael: Eteye omaze omakohoke womamunine, nga kamwa momiṋinga kutja pe kare emunine mOndanda yOmahakaeneno, ndi mari yaka aruhe. 3 Ongurova aihe Aron nge ye yakise nu me yese ye yake nga komuhuka momurungu wa Muhona pendje yerapi etjizikize, ndi ri komurungu wOtjipwikiro tjOmerikutiropamwe mOndanda yOmahakaeneno. Inga owo omazikamisiro omakarerere kozondekurona zeṋu. 4 Aron nga ṱakamisire aruhe omamunine nga kotjikurameno tjomamunine tjongoldo ongohoke momurungu wa Muhona.
5 “Wina toora oruhere orunḓunḓura u tereke po omavanda omurongo na yevari, nevanda arihe ngari kare noruhere rwozokirograma mbari. 6 Nu tendeka omavanda nga kumwe motuteto tuvari, hamboumwe moruteto aruhe, kotjiriro tji tja tuwa ko ongoldo ongohoke, komurungu wa Muhona. 7 Koruteto aruhe weza ko ovyomoro omuwa ovikohoke kutja omavanda ye rire ombunguhiro oningiririsiwa ku Muhona. 8 Esabata arihe motuveze atuhe, Aron nga tendeke omavanda nga komurungu wa Muhona ye rire omazikamisiro omakarerere kOvaisrael. 9 Omavanda nga maye rire owoo Aron novazandu ve; owo ngave ye rire poṋa popayapuke, tjinga aye ri oviṋa oviyapukeyapuke ku ye okuza mozombunguhiro ozoningiririsiwa za Muhona zovikurya. Inga owo omazikamisiro omakarerere.”
Otjihorera tjombanguriro osemba nomberero osemba
10 Pari omuzandu ngwa ri na ina Omuisrael na ihe Omuengipte neye weya mokati kOvaisrael; neye wa posa nomurumendu Omuisrael mozondanda. 11 Nu ngunda amave pose omuzandu ngwi ngwa za mu ina Omuisrael wa yamburura na sengi ena ra Ndjambi. Nowo opu ve mu twarera ku Moses. Nena raina ra ri Selomit, omusuko wa Dibri, ngwa zire momuhoko wa Dan. 12 Nowo ve mu twa motjovakamburwa, Moses e ve tjivise kutja omaraerero wa Muhona maye tja tjike.
13 Muhona wa hungira ku Moses a tja: 14 “Pitiseye omurumendu ngo pendje yozondanda. Nu auhe ngwe mu zuva ama tukana, nga twe omake we kotjiuru tjomuzandu ngwi okuraisa kutja u nondjo, ombongo aihe ngai mu zepe nomawe. 15 Nu itja nai kOvaisrael: ‘Auhe ngu ma sengi Ndjambi ma vererwa ondjo yourunde mbwe tjiti. 16 Auhe ngu ma yamburura ena ra Muhona, tjiri, nga ṱe. Ombongo aihe ngai mu zepe nomawe, kutja Omuisrael poo kutja owozonganda ngu ri mOisrael.
17 “ ‘Omundu ngamwa auhe ngu ma zepa omukwao, tjiri, nga ṱe. 18 Auhe ngu ma zepa otjinamuinyo tjomundu warwe nga yarure po tjarwe; otja komazikamisiro nga tuwa po, omuinyo komuinyo.
19 “ ‘Ngamwa auhe ngu ma hihamisa omukwao korutu, ku ye ngaku tjitwe nao wina, 20 okutja omateyero komateyero, eho keho, eyo keyo; ihi otjipo atjihe tja tjiti komukwao ngatji tjitwe ku ye wina. 21 Ngamwa auhe ngu ma zepa otjinamuinyo tjomundu warwe nga yarure po tjarwe; nungwari auhe ngu ma zepa omundu, nga ṱe. 22 Etwako ndi ra tyerwa eṋe amuhe, kutja Omuisrael poo kutja owozonganda, ami tjinga ambi ri Muhona Ndjambi weṋu.’ ”
23 Moses otja raera kOvaisrael, nowo va pitisa ingwi omurumendu pendje yozondanda, nave mu zepa nomawe. Komuhingo mbwi Ovaisrael otji va tjita avihe Muhona mbya rakiza ku Moses.
© Herero Revision Bible © Bible Society in Namibia, 2021.
