Okuhaṋika nokukupa rukwao Muhona
1 “Ngatu tje nai: Omurumendu wa kupu omukazendu, nu kombunda e mu yara mena rokutja wa muna okaṋa okavi mu ye. Neye me mu tjangere orutuu rwokuhaṋika, e mu ramba moye. 2 Nomukazendu ngwi a kakupwa i omurumendu warwe, 3 omurumendu ngwi wina e mu yara, ne mu tjangere orutuu rwokuhaṋika, ne mu ramba moye poo omurumendu ngwi outjavari, a koka. 4 Tji pa kara nao, omurumendu we ingwi omutenga ke nokukemukotora rukwao okurira omukazendu we, orondu omukazendu ngwi wa rire omuhakohoke. Ndoovazu we mu kotora rukwao matji rire otjiyaukise ku Muhona; ko nakusokueta oviyaukise mehi Muhona, Ndjambi woye, ndi me ku pe ri rire ouini woye.
5 “Omurumendu tja kupa nambano ke nakusokuyenda kovita, nu ke nakusokuungurisiwa ngamwa otjingura; ma sokukuturwa oure wombura imwe okutunga onganda ye nokuyorokisa omukazendu we.
6 “Tji mo yazemisa otjiṋa komundu, ko nakusokukambura otjini notjitonde tje tonda na tjo ovikokotwa otja otjiṋa tjomoruveze; okutjita nao pa sana nokuisa po ovihupise vyomuinyo we.
7 “Auhe ngu ma pundu Omuisrael omukwao ne mu isa po omukarere poo e mu randisa otja omukarere, nga ṱe; komuhingo mbwi otji mamu yandeke ourunde mokati keṋu.
8 “Ritjevereye komutjise wongana mbu hwanga kutja mu tjite otja komuhingo ovapristeri Ovalevi mbu mave mu hongo ami otja pu mba rakiza ku wo. 9 Rizemburuka na ihi Muhona, Ndjambi woye, tja tjita ku Miriam mondjira yokuza mOengipte.
10 “Tji wa yazemisa otjiṋa kOmuisrael omukweṋu, okahita mondjuwo ye okukaeta otjiṋa moruveze rwaihi tji wa yazemisa. 11 Mo sokukurama pendje, nomurumendu ku wa yazemisa otjiṋa nge ku etere ihi tjomoruveze imbo. 12 Neye tje ri omusyona, ko nakutjitiza nga komuhuka weyuva rarwe. 13 Tji yarura komahitiro weyuva kutja a sore okukarara mongwava ye, ne ku sere ondaya; nu ihi mo varerwa tjo otja ousemba komurungu wa Muhona, Ndjambi woye.
14 “Ko nokutjita ko ovineya komuungurire wondjambi omusyona poo omuhepe, nangarire kOmuisrael omukweṋu poo kowozonganda ngu tura motjihuro tjimwe tjehi reṋu. 15 Mu suta ondjambi ye eyuva arihe ngunda eyuva ari hiya hita; orondu ma hepa ovimariva mbi, neye u nonḓero okuvimuna. Tji u hi nakumusuta eye ma urire ove ku Muhona, nove otji mo riturisa ondjo.
16 “Ooihe ngaave ṱire ouvi wovanatje, novanatje ngaave ṱire ouvi wooihe; auhe nga ṱire ouvi we omuini.
17 “O rundurura ousemba wovozonganda nowozosewa; o kambura ko ombanda yomuhepundu otja otjiṋa tjomoruveze. 18 Rizemburuka kutja ove omuini wa ri omukarere mOengipte, nu Muhona, Ndjambi woye, we ku kutura; ami opu me ku rakizire okutjita nai.
19 “Tji mo wongo ovikokotwa vyomakondero woye no zembi omukuta umwe, o yaruka okukeupaha; owo ngau rire owovozonganda nowozosewa nowovahepundu, Muhona, Ndjambi woye, kutja e ku sere ondaya mu avihe mbi mo tjiti. 20 Tji mo nikora ovihape vyomiṋinga, o yaruka okukapaha imbi mbya sewa komuti; ovyo ovyovozonganda novyozosewa novyovahepundu. 21 Tji mo nikora omandjembere motjikunino tjoye tjomivite, o yaruka okukapaha rukwao inga omandjembere nga hupu, owo ngaye rire owovozonganda nowozosewa nowovahepundu. 22 Rizemburuka kutja ove omuini wa ri omukarere mOengipte; ami opu me ku rakizire okutjita nai.
© Herero Revision Bible © Bible Society in Namibia, 2021.
