Omuzuvarise 5 - Herero Revision Bible (HRR)

O hakahana okutjita omakwizikiro

1 Tji mo i kondjuwo ya Ndjambi ritjevera nawa. Orondu okuryama popezu na yo kutja u zuve okwo okunanḓengu pozombunguhiro nḓe punguhwa i omayova mbe ha tjiwa kutja owo mave tjiti ouvi. 2 Rutenga ripura, tjazumba arire tji wa hungire. O hakahana okuhungira omambo komurungu wa Ndjambi, Ndjambi tjinga e ri meyuru, nu ove au ri kombanda yehi. Otji mo sokuritjaera uri okuhungira. 3 Okurota ku za momerikendero omengi, nokuhungira ouyova ku za momambo omengi. 4 Tji wa tjiti omakwizikiro ku Ndjambi, ye yenenisa nokuhinokuwomba, orondu Ndjambi ke nonyuṋe momayova. Yenenisa omakwizikiro woye. 5 Okokuwa okuhinokutjita omakwizikiro komurungu wokuyetjita nokuhinokuyeyenenisa. 6 Omambo woye omuini aye ku wisire mondjo, nu o ha raere ko omupristeri wa Ndjambi kombunda kutja ove ko tjitire wina! Okutjavi Ndjambi tji ma pindikire omambo woye nokunyona oviungura vyomake woye? 7 Orondu otja punga ape noturoto otuingi, opunga ape nomambo omengi womungandjo wina. Nungwari tjinene kara nondira ku Ndjambi!

Avihe omungandjo

8 Tji wa munu kutja ovasyona mave ṋiṋikiziwa, nokutja mave yekwa ousemba nouatjiri mehi, o kumwa notjiṋa hi, orondu ove mo raerwa kutja ingwi ngu ri kombanda u na warwe kombanda ye, nu imba aveyevari ve na warwe ngu ri kombanda yawo wina.

9 Nungwari ouwa wehi mu avihe owo mbwi, orondu ehi ndi tji ri nombara, ndji tjevera oviungura vyomakunino wehi.

10 Ingwi ngwa suvera ovimariva kamaa munu ovimariva mbya yenene; nu ingwi ngwa suvera outumbe kamaa munu ovihohe mbya yenene. Imbi wina omungandjo uriri. 11 Oviriwa tji vi ri ovingi, ovarye wina ve rira ovengi; omuini wavyo ma munine po tjike ku vyo posi yokuvitara nomeho uriri? 12 Ozomboṱu zomuungure ozo omuzeze, nangarire kutja wa ri ovikurya oviṱiṱi poo ovingi; nungwari omutumbe u kuhisa ozomboṱu nokurikurungisa noutumbe we ouingi.

13 Pe nouvi mbu mba muna mouye mbwi: Outumbe mbu pwikwa i omuini wawo u rira ouhumandu ku ye. 14 Outumbe mbwi mau pandjarisiwa i oviwonga, nomuzandu we ke nokukara notjirumatwa. 15 Eye wa za muzu mezumo raina, nu ma yaruka mutundu rukwao; ke na tji ma twaerere kombunda yongondjero yoviungura vye avihe. 16 Imbwi ombu ri ouvi ounene kutja otja indu tje ya, otjinga ama yaruka; eye ma munine po tjike kokutja eye wa ungura omungandjo uriri? 17 Wina ngunda e nomuinyo ma rire ovikurya vye monḓorera, nu u nomerikendero omengi puna omihihamo nomapindi.

18 Ihi ami tji mba muna otjo hi: Otjiṋa otjisemba omundu ngamwa auhe tji ma sora okutjita, okongwi okurya nokunwa nokunyandera imbi eye mbya ungurira kombanda yehi moure womuinyo we omusupi Ndjambi mbwe mu pa; ihi tje mu yenene. 19 Ndjambi tja yandja outumbe nouini komundu kutja a vyare mu vyo, nga kare nohange, nu nga yoroke mongondjero yoviungura vye; ihi otjo otjiyandjewa tja Ndjambi. 20 Orondu omundu otja ingwi ke ripura tjinene nomayuva ouṱiṱi womuinyo we, Ndjambi tjinga e mu pa ondjoroka momutima we.