Eimburiro rokutanga nokutja okuhepa ku Ndjambi
Komuimburise. Eimburiro. Epsalme.
1 Tangeye Ndjambi nokumuyorokera,
oweṋe vandu amuhe mouye!
2 Imbureye okuyozika ena re;
Mu yozikeye nokumutanga!
3 Itjeye nai ku Ndjambi:
“Oviungura vyoye, tjiri, ovihimise!
Omasa woye omanene nai
nga ovanavita na ove tji mave
rikoto komurungu woye mondira.
4 Ovandu avehe mouye ngave
rikotamene kove,
ngave ku imburire nu
ngave tange ena roye.”
5 Indjeye mu tare ovitjitwa vya Ndjambi,
oviungura vye movandu ovyo ovihimise.
6 Eye wa rundurura omuronga
au rire ehi ekukutu;
ootate mukururume ve u konda
amave kayenda pehi.
Komuhingo mbwi opu matu yorokere ye.
7 Eye u honapara aruhe momasa we,
omeho we ye tjevera oviwaṋa.
Ovemupirukire kamaave mu sekamene.
8 Hivirikeye Ndjambi wetu,
oweṋe viwaṋa amuhe!
Zuvariseye ondangero ye neraka romasa!
9 Eye we tu ṱakamisa kutja tu kare nomuinyo;
ne tu tjevere kutja atu ha putara.
10 Ove, Ndjambi, we tu rora;
we tu zuzura otja osilveri tji i zuzurwa.
11 Ove we tu hitisa mombate,
nu wa twako omitwaro omizeu
komatambo wetu.
12 Nu wa yandjera ovanavita na eṱe
ve tu susuparise;
eṱe twa yata momuriro na momeva,
nungwari ove we tu eta kouyara.
13 Ami me eta oviyambo
vyozombunguhiro ozoningiririsiwa
kondjuwo yoye;
me yenenisa omakwizikiro wandje
14 ngu mba tjere me tjiti,
tji mba ri mombamisiro.
15 Ami me punguha ozonḓu kotjipunguhiro
ze rire ozombunguhiro ozoningiririsiwa;
me punguha ozondwezu
zozongombe nozozongombo,
nomuise mau rondo nga keyuru.
16 Indjeye mu puratene,
eṋe amuhe mbu mu nondira ku Ndjambi,
nami me mu serekarerere imbi eye
mbya tjita ku ami.
17 Ami mba kwa ombatero ku ye,
ne mu tanga nomaimburiro.
18 Andakuzu mbe ripura nouvi momutima wandje,
Muhona ketje ndji zuvira.
19 Nungwari Ndjambi, tjiri, we ndji zuvira;
eye wa puratena kongumbiro yandje.
20 Ndjambi nga tangwe ngu hi na
indu wa tondere ongumbiro yandje,
nu ngu hi na wa isire ko otjari tje ku ami.
© Herero Revision Bible © Bible Society in Namibia, 2021.
