Okuriyameka koutumbe ouyova
Komuimburise. Epsalme rovazandu va Kora.
1 Zuveye ihi, oweṋe viwaṋa amuhe!
Purateneye, oweṋe vature wokombanda yehi,
2 nangarire ovanene nouṱiṱi,
nangarire ovatumbe novasyona.
3 Ami hi nokuhungira omambo wounongo uriri,
nungwari omeripura womutima
wandje ma e rire omakahu.
4 Nami me yandja ombango komambo wounongo,
nu me handjaura omaheero wotjihakwa
tjandje ame nyanda otjiharpe.
5 Ami hi nokutira omayuva woumba tji yeya,
ami tji mba koverwa i ovanavita na ami,
6 imba mbe riyameka kouini wawo,
nu mbe rihivira ouingi woutumbe wawo.
7 Kape nomundu ngu ma
sora okurisutira omuinyo we,
nu kamaa sutu ku Ndjambi otja
otjisuta kutja ma kare nomuinyo,
8 orondu omasutiro womuinyo womundu
u kosa otjisuta otjingi tjinene;
imbi mbi ma sora okusuta kamaavi yenene
9 okumutjaera konḓiro kutja a hupe nga aruhe.
10 Omundu auhe u muna kutja
nangarire ovanaunongo
wina ve koka tjimuna omayova nomahipa.
Owo avehe outumbe wawo
ve u syera ovandu varwe.
11 Omaendo wawo onge ri
ozonganda zawo nga aruhe,
omaturiro wawo omakarerere,
nandarire kutja va ri nomahi wawo oveni.
12 Ombyarero yomundu
kamaai mu yama konḓiro;
eye u ri otja ovipuka mbi ṱa.
13 Otji mape kara nao ku imba
mbe riyameka ku wo oveni;
ondjandero yaimba mba
kovisiwa i outumbe wawo.
14 Owo mave koka otja ozonḓu,
onḓiro ondji ri omurise wawo.
Ovasemba ombu mave ve honaparere,
otutu twawo tji matu zunḓaka
tjimanga motjovakoke,
kokure nozonganda zawo.
15 Nungwari Ndjambi me ndji yama,
kouvara wonḓiro.
16 Okurungisiwa i omundu tja tumbu,
nangarire outumbe we tji wa rire ouingi.
17 Orondu tja koka, ke na tji ma twaerere,
outumbe we kau na ku
punda puna ye meyendo.
18 Nandarire kutja omundu wa kowa
mehupiro re nokutja u tangwa,
tjinga e ri omuṋingandu,
19 eye wina, tjiri, ma pundu monḓiro
puna ooihe mukururume, monḓorera yaaruhe.
20 Outumbe womundu kamaau mu yama konḓiro;
eye u ri otja ovipuka mbi ṱa.
© Herero Revision Bible © Bible Society in Namibia, 2021.
