OoKora na Datan na Abiram mave pirukire ooMoses na Aron
1 Nu Kora, omuzandu wa Jishar, omuzandu wa Kehat, omuzandu wa Levi, puna Datan na Abiram, ovazandu va Eliab, na On, omuzandu wa Eliab na Pelet va ri ovazandu va Ruben 2 va pirukira Moses puna Ovaisrael omasere yevari nomirongo vitano, ovarumendu ovatjiukwa, mba toororerwe i ombongarero yotjiwaṋa. 3 Owo va sekamena Moses na Aron nave tja ku wo: “Nambano opuwo! Orondu ombongo aihe ndji oya Muhona, nu Muhona u ri puna eṱe atuhe! Ongwaye tje ri Moses ngu me ritwa kombanda yombongo ya Muhona?”
4 Nu Moses tja zuu ihi, arire tja u onḓurumika na kumbu. 5 Eye wa hungira ku Kora na imba mbe mu kongorera na tja ku wo: “Muhuka omunene Muhona me tu raisire ingwi ngu ri owe; eye ma tjiti kutja ingwi ngu ri owe, eye ngwa toorora a tumbuke ku ye kotjipunguhiro. 6 Tjiteye nai: Tooreye ovikangero vyokutwimisa, ove na Kora novakongorere voye, 7 nu muhuka tweye mo omakara novyomoro omuwa, nu mu vi twe komurungu wa Muhona, Tjazumba tu mune kutja ouṋe pu eṱe ngwa toororwa i Muhona; neye ongu ma rire omuyapuke. Nambano opuwo, eṋe Ovalevi!”
8 Moses wa hungira komurungu na tja ku Kora: “Arikaneye, purateneye, Valevi! 9 Indu kapuwo ku eṋe kutja Ndjambi wa Israel we mu toorora mombongo yOvaisrael okuya ku ye mu tjite otjiungura mOndanda yOmahakaeneno wa Muhona, nu mu karere indji ombongo are? 10 Eye we ku eta popezu novangu voye avehe, imba Ovalevi; nu nambano eṋe mamu zeri otjiungura tjoupristeri wina are? 11 Ove novakongorere voye opu mwe rikutira kumwe okupirukira Muhona; orondu Aron eye omukwatjike, tji mamu mu unaunine nai?”
12 Tjazumba Moses wa hinda ovatumwa ve kaisane Datan na Abiram, ovazandu va Eliab, nungwari owo va tja: “Eṱe katu nakuya ko. 13 Kapuwo tji we tu pitisa mehi nde ura nomaihi nouitji wokuti, no tu eta nguno kutja tu kokere mokuti onguza; nu ngunda movanga okuritjita oMuhona kombanda yetu are? 14 Tjiri, ove ko tu hitisire mehi nde ura nomaihi nouitji wokuti nu ko tu pere ehi romakunino nomivite ri rire otjirumatwa tjetu. Mo vanga okupoṱuparisa omeho wovandu mba are? Eṱe katu nakuya ko.”
15 Moses otja ṱomazenge tjinene na tja ku Muhona: “O yakura ozombunguhiro nḓu maze punguhwa i ovandu mba! Ami hi na pu mba kambura, nangarire kemwe kousino wawo, nu hi na pu mba tjita otjiṋa otjivi ku umwe wawo!”
16 Moses arire tja tja ku Kora: “Muhuka, ove novakongorere vyoye avehe indjeye komurungu wa Muhona, nu Aron wina ma kara po. 17 Auhe weṋu nga toore otjikangero tje tjomatwimisiro, nu a twe mo ovyomoro omuwa ne tji ete komurungu wa Muhona, avihe kumwe ovikangero omasere yevari nomirongo vitano, na ove na Aron wina.” 18 Nu auhe wawo otja toora otjikangero tje tjomatwimisiro, a twa mo omakara, na twako ovyomoro omuwa; nowo va kakurama pomahitiro wOndanda yOmahakaeneno, na Moses na Aron wina. 19 Kora wa woronganisa ombongo aihe, noyo ya pirukira Moses na Aron pomahitiro wOndanda yOmahakaeneno. Kamanga ongeṋangeṋeno ya Muhona ya munika kombongo aihe. 20 Nu Muhona wa hungira ku Moses na Aron a tja: 21 “Humburukeye novandu mba, nami meve nyono tjimanga!”
22 Nungwari Moses na Aron va wa onḓurumika ave kumbu nai: “Arikana, Ndjambi, oove ngu u ri omburo yomuinyo auhe! Umwe tja tjiti ouvi, otji mo pindikire ovandu avehe are?”
23 Nu Muhona wa tja ku Moses: 24 “Raera otjiwaṋa nu itja nai: ‘Humburukeye nozondanda za Kora na Datan na Abiram!’ ”
25 Moses otja sekama na i ku Datan na Abiram, novanane vOvaisrael ve mu kongorera. 26 Neye opa hungirira kotjiwaṋa a tja: “Humburukeye nozondanda zovarumendu ovanauvi mba, nu amu ṱunu kotjiṋa ngamwa tji tji ri otjawo, eṋe wina kutja amu ha yandekwa mena rourunde wawo aehe!” 27 Nowo arire tji va humburuka nomaturiro woo Kora na Datan na Abiram.
Nu Datan na Abiram va pita nave kakurama pomahitiro wozondanda zawo puna ovakazendu novanatje vawo, ovanene novaṱiṱi. 28 Moses arire tja tja: “Nambano otji mamu tjiwa kutja Muhona ongwe ndji hinda okutjita oviungura mbi avihe, nokutja ovyo kavi zire momeripuriro wandje omuini. 29 Ndoovazu ovandu mba mave koka otja ovandu avehe tji ve koka, ami okutja hi hindirwe i Muhona. 30 Nungwari ndoovazu Muhona ma utu otjiṋa otjipe tji tji hi na tja tjitirwe, nehi ari paturura otjinyo tjaro nari ve ṋiṋa puna avihe, mbi ve na vyo, nave musukire nomuinyo motjovakoke, okutja mamu tjiwa kutja ovarumendu mba va yamburura Muhona.”
31 Neye tja mana okuhungira omambo nga, ehi otji ra pamburuka kehi yawo, 32 nari paturura otjinyo tjaro, nari ve ṋiṋa puna omaṱunḓu wawo novandu avehe mbe rikuta kuna Kora, noviṋa vyawo avihe. 33 Otji va musukira motjovakoke nomuinyo na avihe mbi va ri na vyo, nehi re ve vandeka; notji va zenga mombongo. 34 NOvaisrael avehe, mba kuramene kongotwe yawo va tupuka, tji va zuva ondjuriro yawo, nave ravaere nai: “Tupukeye, ehi tjapo wina ngaari tu ṋiṋa!”
35 Nomuriro wa za ku Muhona nau seseta ovarumendu omasere yevari nomirongo vitano, mba eta ovyomoro omuwa.
Ovikangero vyomatwimisiro
36 Nu Muhona wa hungira ku Moses a tja: 37 “Raera Eleasar, omuzandu womupristeri Aron, kutja a ise mo ovikangero vyokutwimisa momuriro, nokutja a nakaure imbwi omuriro kokure; orondu ovikangero mbi oviyapuke. 38 Ovyo vya rira oviyapuke tji vya etwa komurungu wotjipunguhiro tja Muhona. Nambano toora ovikangero mbi vyovarumendu mba mba ṱira ourunde wawo, u vi hambure motutenda otupapi, nu u tu twe kotjipunguhiro tu rire otjikutjire. Ihi matji rire otjizembururkiro tjomaronga kOvaisrael.” 39 Omupristeri Eleasar otja toora imbi ovikangero vyokutwimisa vyongoporo ne vi hambura motutenda otupapi, ne tu twa kotjipunguhiro tu rire otjikutjire. 40 Ihi tja ri otjizemburukiro tjomaronga kOvaisrael kutja auhe ngu he ri ondekurona ya Aron e he ya potjipunguhiro okutwimisa ovyomoro omuwa komurungu wa Muhona. Tjapo ngaa ṱu otja Kora novemukongore. Imbi avihe vya tjitwa otja Muhona pa rakiza ku Eleasar notjinyo tja Moses.
Aron ma yama otjiwaṋa
41 Nu mependukirwa raindo, ombongo aihe yOvaisrael ya unaunina Moses na Aron ai tja: “Eṋe mwa zepa otjiwaṋa tja Muhona!” 42 Ombongo ngunda aya sekamene ooMoses na Aron, owo va tanauka okutara kOndanda yOmahakaeneno, nu mokamanga otjikamba tje i kutjira, nongeṋangeṋeno ya Muhona ya munika. 43 Tjazumba Moses na Aron tji va kakurama komurungu wOndanda yOmahakaeneno, 44 Muhona otja hungira ku Moses a tja: 45 “Humburukeye novandu mba, ami mbi ve nyone nambano nai!”
Moses na Aron otji va wa onḓurumika. 46 Nu Moses wa tja ku Aron: “Toora otjikangero tjokutwimisa, u twe mo omakara okuza kotjipunguhiro, u twe ko ovyomoro omuwa, nu u tji tware hakahana kotjiwaṋa, u ve tjitire ombunguhiro yomakohororero; orondu omazenge ya zu ku Muhona, notjiṱiro tja utu.” 47 Aron wa zuva na toora otjikangere tjokutwimisa na kataurira mokati kotjiwaṋa, otjiṱiro mu tja uta. Neye wa twa mo ovyomoro omuwa na tjitire otjiwaṋa ombunguhiro yomakohororero. 48 Neye ngunda a kurama mokati kaimba mba ṱu novanamuinyo, otjiṱiro arire tji tja yanda. 49 Notjivaro tjovandu, mba ṱa motjiṱiro hi, tja ri 14 700, nokuhinakuvara imba mba ṱa mena ra Kora. 50 Notjiṱiro tji tja yanda, Aron otja yaruka ku Moses pomahitiro wOndanda yOmahakaeneno.
© Herero Revision Bible © Bible Society in Namibia, 2021.
