Etwako enene nenanḓengu
1 “Inga ongeri omatwako, nomazikamisiro nomaraerero, Muhona, Ndjambi weṋu, nge ndji rakiza okumuhonga kutja eṋe mu kakare nonḓuviro kuwo mehi ku mamu i okukerikambura ri rire ouini weṋu. 2 Ove nozondekurona zoye tireye Muhona, Ndjambi weṋu, nu mu kare nonḓuviro komazikamisiro nomatwako we aehe ngu me mu rakiza, oure womuinyo woye auhe, kokutja u hupe orure. 3 Purateneye ku wo, Vaisrael, nu ye ṱakamiseye nawa kutja mu sore okukara nawa, nu mu takavare tjinene otja Muhona, Ndjambi wooiho mukururume, pe mu kwizikira okumupa ehi nde ura nomaihi nouitji wokuti.
4 “Zemburuka otjiṋa hi Israel, Muhona eye o Ndjambi wetu, eye erike. 5 Suvera Muhona, Ndjambi woye, nomutima woye auhe, nomuinyo woye auhe, nomasa woye aehe. 6 Nomambo nga ngu me ku rakiza ndino mo sokuyeṱakamisa momutima woye. 7 Nu ye ṋiṋikizira momitima vyovanatje voye, ye tamuna tji wa haama mondjuwo yoye na tji u ri mondjira na tji wa rangavara na tji wa penduka. 8 Wina ye kuta keke roye, nu ye zara kotjipara tjoye otja otjihako otjizemburukise. 9 Nu ye tjanga kozongambezero zondjuwo yoye na komivero vyotumbo.
10 “Muhona, Ndjambi woye, wa kwizikira ooiho mukururume Abraham na Isak na Jakob noruyano kutja me ku pe ehi, ndi novihuro ovinene noviwa, mbi ha tungirwe i ove. 11 Nozondjuwo maze ura noviṋa oviwa, mbi ha twirwe mo i ove; nu mape kara ozondjombo nḓu u ha hupurire, nomivite nomiṋinga, mbi u ha kunine, nove mo ri no kuta. 12 Nu ṱakamisa kutja o ha zembi Muhona ngwe ku pitisa mehi ra Engipte mouhuura. 13 Tira Muhona, Ndjambi woye, nu mu karera; nomakwizikiro woye ye tjita mena re porwaro. 14 Kamu nakurikotamena koomukuru varwe voviwaṋa, mbi tura meṋe yeṋu. 15 Tji mwa tjiti nao, omazenge wa Muhona, Ndjambi weṋu, maye ya kombanda yeṋu tjimuna omuriro, neye me mu nyono kombanda yehi, orondu Muhona, Ndjambi weṋu, ngu ri mokati keṋu, eye o Ndjambi omunaukoze.
16 “Aamu roro Muhona, Ndjambi weṋu, otja tji mwe mu rorere mOmasa. 17 Kareye nonḓuviro komatwako wa Muhona, Ndjambi weṋu, nouṱakame, na wina omaraerero nomazikamisiro we nge mu rakiza. 18 Tjita imbi Muhona mbi ma tja ovisemba noviwa kutja u kare nawa nu u kahite nokukambura ehi ndi ri rire ouini woye, Muhona nda kwizikira ooiho mukururume noruyano, 19 neye ma ramba ovanavita na ove avehe otja pe ku kwizikira.
20 “Novanatje woye tji ve kekupura kombunda ave tja: ‘Omatwako nomazikamisiro nomaraerero Muhona, Ndjambi wetu, nge mu rakiza, maye hee tjike?’ 21 Nu ve raera itja nai ku wo: ‘Eṱe twa ri ovakarere vyo mbara Farao mOengipte; nungwari Muhona we tu pitisa nomasa we mehi ra Engipte. 22 Eṱe twa muna nomeho wetu oveni ovihimise ovinene novitirise Muhona mbya tjita ku Farao nonganda ye aihe. 23 Eye we tu pitisa mOengipte ne tu hitisa mehi ndi nda kwizikira ootate mukururume noruyano kutja me ri yandja ku eṱe. 24 Nu Muhona Ndjambi wetu, we tu rakiza okukara nonḓuviro komatwako nga aehe, nokumutira kutja aruhe tu kare nawa, nokutja eye e tu ṱize tu kare nomuinyo otja tji tu ri nai ndinondi. 25 Nu ma rire kokuwa ku eṱe tji matu ṱakamisa omatwako nga aehe nouṱakame komurungu wa Muhona, Ndjambi wetu, otja pe tu rakiza.’
© Herero Revision Bible © Bible Society in Namibia, 2021.
