Ombongarero mOjerusalem
1 Ovandu tjiva va zire kehi ra Judea ave ya kOantiokie, nu ave utu okuhonga ovakambure ave tja: “Eṋe tjinangara kamu nakusukarekwa otja kOmatwako wa Moses, kamu nokuyenena okuhupisiwa komuinyo.” 2 Paulus na Barnabas va patasana otjiṋa hi tjinene kuna ovandu mba, notji pa tyewa kutja Paulus na Barnabas novakambure ovakwao tjiva mOantiokie ve yende kOjerusalem okutwara ombata ndji kovaapostele novatarere wombongo.
3 Nowo tji va za nokuhindwa i ombongo mouyenda wawo arire tji va tuurunga ehi ra Fenisie nora Samaria amave yende amave serekarere kutja imba mbe he ri Ovajuda va tanaukira ku Ndjambi. Ombuze ndji ya yorokisa ovakambure avehe tjinene. 4 Nu tji ve ya mOjerusalem ave yakurwa nawa i ombongo novaapostele novatarere. Nowo arire tji ve ve serekarerere avihe Ndjambi mbya tjitire na wo. 5 Nungwari ovakambure tjiva mba ri ouṋepo wotjira tjOvafarisei va sekama ave tja: “Imba mbe he ri Ovajuda nu mba tanauka mave sokusukarekwa nokuraerwa kutja ve ṱakamise Omatwako wa Moses.”
6 Ovaapostele novatarere va worongana okuhungirira otjiṋa hi. 7 Nu tji va za nokupatasana orure, Petrus arire tja sekama a tja: “Vakwetu, mamu tjiwa kutja omayuva omengi nga kapita Ndjambi we ndji toorora mokati keṋu okuzuvarisa Ombuze Ombwa ku imba mbe he ri Ovajuda wina, kokutja owo ve zuve nu ve kambure. 8 Ndjambi ngu tjiwa omeripura wovandu avehe wa yakura imba mbe he ri Ovajuda, indu tje ve pa Ombepo Ondjapuke otja tjinga e i yandja ku eṱe. 9 Eye ka twire po ombangu pokati ketu na wo; we ve isira ourunde wawo tjinga ava ri nongamburiro. 10 Nambano okutjavi tji mamu vanga okurora Ndjambi mokutwa ko omutenge kovakambure, ootate mukururume na eṱe mbu tu hi na indu twa sorere okuutjinda? 11 Eṱe twa kambura nu twa yamwa i otjari tja Muhona Jesus tjimuna owo tji va kambura nave yamwa.”
12 Ombongo aihe tjandje nai ya mwina ngunda amai puratene ku Barnabas na Paulus tji mave serekarere ovihimise noviraisiro avihe Ndjambi mbya tjitire na wo mokati kaimba mbe he ri Ovajuda. 13 Tji va mana okuhungire, Jakobus a tja: “Purateneye ku ami, vakwetu! 14 Simon wa zu nokumuraera nambano nai kutja Ndjambi wa raisa ombango ye yokuyakura imba mbe he ri Ovajuda indu tje ritoororera otjiwaṋa mokati kawo. 15 Omambo wovaprofete maye i kumwe motjiṋa hi otja tji pa tjangwa momatjangwa wawo:
16 ‘Muhona ma tja: Kombunda yoviṋa mbi ami me kotoka
nu e yarura ko ouhona wa David.
Me tungurura ovitambatundu vyawo
nu e vi zeuparisa rukwao.
17 Noviwaṋa avihe mavi ya ku ami,
naimba mbe he ri Ovajuda avehe
ami mbu mba isana okurira ouini wandje.
18 Muhona ngwa tjivisire oviṋa mbi rukuru ma tja nao.’ ”
19 Jakobus wa hungira komurungu a tja: “Otja koumune wandje, ami opu me zu okutja atu ha yandja ouzeu ku imba mbe he ri Ovajuda mbu mave ritanaurire ku Ndjambi. 20 Nungwari ngatu ve tjangere orutuu rwokuveraera kutja ave ha ri ovikurya ovihakohoke, ovyo tjinga avya punguhirwa oomukuru vovisenginina, ave ha nanukire otuvakiro nokutja ave ha ri otjipuka tji tja siniwa, nombinḓu wina ave ha ri. 21 Orondu Omatwako wa Moses ye resewa aruhe okuza korukuru mozosinagoge mesabata arihe peke, nomambo we ye zuvarisiwa movihuro avihe.”
Orutuu kovakambure mbe he ri Ovajuda
22 Nu ovaapostele novatarere nombongo aihe arire tji va tye kutja pe toororwe ovarumendu tjiva mombongo nu ve hindwe kOantiokie puna Paulus na Barnabas. Owo va toorora ovarumendu vevari, mba yozikirwe tjinene i ovakambure, okutja oJudas ngu ku za Barsabas na Silas, 23 nu ave hindi orutuu ndwi puna wo:
“Eṱe ovakweṋu, ovaapostele novatarere, matu hindi ombinika kovakambure ovakwetu avehe imba mbe he ri Ovajuda nu mbu mwa tura mOantiokie na Sirie na Silisie. 24 Twa zuva kutja ovarumendu tjiva mba zire kombongo yetu ve yokumupa ouzeu nokumukurungisa nomambo ngu ve hi na indu va raererwe i eṱe okuyekuhungira. 25 Opu twa woronganena nu nomutima umwe atuhe atu zuvasana okutoorora ovarumendu tjiva nokuvehinda ku eṋe. Owo mave ya puna omapanga wetu ovasuverwa Barnabas na Paulus, 26 mba yandjera ominyo vyawo okuṱira ena ra Muhona wetu Jesus Kristus. 27 Neṱe nambano matu mu hindire Judas na Silas mbu mave yekumuserekarera nawa oviṋa tjingevyo mbi mbi matu tjanga. 28 Ombepo Ondjapuke na eṱe twa zuvasana kutja atu ha twako omutenge warwe pendje yomazikamisiro omananḓengu nga: 29 Amu ri ko ovikurya mbya punguhirwa oomukuru vovisenginina; amu ri ko ombinḓu; amu ri ko otjipuka tji tja siniwa; neṋe oveni amu nanukire ko oruvakiro. Eṋe mamu kara nawa tji mwe riṱakamisa kutja amu ha tjiti oviṋa mbi. Minikweye tjinene amuhe!”
30 Ovahindwa va tumwa, nowo ave i kOantiokie. MOantiokie owo va kaworonganisa ombongo aihe yovakambure nu ave ve pe indwi orutuu. 31 Novandu tji vaza nokururesa, ve urisirwe nenyanda mena rOmbuze ombwa ndje ve yanḓiparisa. 32 Nu Judas na Silas, owo oveni hapo tjinga ava ri ovaprofete, va hungira orure kuna ovakambure amave ve yanḓiparisa nokuvezeuparisa. 33-34 Nowo tji va za nokukara omayuva tjiva mOantiokie, ovakambure arire tji ve ve hindi ve yaruke mohange, nowo ave yaruka ku imba mbe ve hindire.
35 Paulus na Barnabas va kara omayuva tjiva mOantiokie, puna ovakambure ovakwao ovengi amave hongo ovandu nokuzuvarisa embo ra Muhona.
Ouyenda outjavari: Paulus na Barnabas mave haṋika
36 Kombunda yanao Paulus wa tja nai ku Barnabas: “Ngatu yaruke tu katare ovakambure ovakwetu movirongo avihe mu twa zuvarisire embo ra Muhona, nu tu katjiwe kutja owo ve ri vi.” 37 Barnabas wa vangere kutja owo ve twaerere Johanes Markus, 38 nungwari Paulus ee ripura kutja kasemba okumutwaerera, eye tjinga e ha karere puna wo nga komaandero wouyenda wawo, nungwari tjinga a ri a yaruka nu e ve esire mOpamfilie. 39 Pa kara ombata onene tjinene pokati kawo, nu arire tji va haṋika: Barnabas wa toora Markus nave kondo okuvare okuyenda kOsiprus. 40 Nu Paulus we ritoororera Silas nu ave i tji va za nokuvirikiziwa i ovakambure motjari tja Muhona. 41 Eye wa tuurunga ehi ra Sirie nora Silisie ama zeuparisa ozombongo.
© Herero Revision Bible © Bible Society in Namibia, 2021.
