Oviungura 10 - Herero Revision Bible (HRR)

Petrus na Kornelius

1 Nu mOsesarea mwa ri omurumendu wena Kornelius. Eye wa ri omuhongore wotjimbumba tjovarwe wovita worupa ndu isanewa kutja “Orupa rwovita rwa Italie”. 2 Kornelius wa ri omurumendu omunangamburiro nu ngwa ri nondira ku Ndjambi puna eṱunḓu re arihe. Eye wina wa kondja tjinene okuvatera Ovajuda ovasyona, nu aruhe aa kumbu ku Ndjambi. 3 Eyuva rimwe moiri mangara ondatu yomapeta Kornelius wa munine nawa omuengeri wa Ndjambi motjirimunikise ngwaa hiti nu ngwe mu isana a tja: “Kornelius!”

4 Kornelius wa siririka omeho we momuengeri a uruma na pura nai: “Otjikwatjike, Muhona?”

Omuengeri a ziri a tja: “Ndjambi u norutjato mozongumbiro zoye na moviungura vyoye vyotjari, nu we rizemburuka na ove. 5 Nambano tuma tjimanga ovarumendu tjiva kOjopa ve kaete omurumendu worive wena Simon Petrus. 6 Eye wa sekire ponganda yomuṱuke womikova wena Simon ngwa tura meṋe yokuvare.” 7 Nomuengeri ngwaa hungire puna ye tja zu po, Kornelius arire tja isana ovakarere vevari vondjuwo ye nomutjevere we umwe wokorutu, ngwa ri omurwe wovita omunangamburiro tjinene. 8 Eye we ve serekarerera avihe mbya tjitwa ne ve hindi kOjopa.

9 Mependukirwa, ngunda averi mondjira nu averi pokuvaza kOjope, Petrus arire tja rondo komututu wondjuwo mangara mutenya okukakumba. 10 Kombunda eye wa ṱondjara na vanga otjikurya okurya; novandu ngunda amave mu ṱunine ovikurya, pa raisiwa otjirimunikise ku ye. 11 Eye wa muna eyuru ara paturuka, nu ape raurirwa otjiṋa pehi tjaa tji munika otja erapi enene nda ṱizirwa kovikoro vyaro vine. 12 Mu ro mwa ri ovipuka avihe ovinavikoti vine novikokozoke nozonḓera azehe zokuti. 13 Eraka arire tji ra tja nai ku ye: “Sekama, Petrus, zepa u rye!”

14 Nungwari Petrus wa zira nai: “Kako, Muhona! Ami hi na indu mba rire otjiṋa tji tja tjaerwa poo otjihakohoke.”

15 Neraka ra hungira ku ye porutjavari ari tja: “Imbi Ndjambi mbya vara otja ovikohoke o vi vara ko otja ovihakohoke.” 16 Notjiṋa hi tja tjitwa tutatu, nerapi arire tji ra yarurwa rukwao keyuru.

17 Petrus ngunda a kumisiwa i omaheero wotjirimunikise hi, tjandje nai ovarumendu mba mba hindwa i Kornelius va raerwa ondjuwo ya Simon, nu va kuramene pendje komurungu womuvero. 18 Owo va ravaera ave pura kutja poṋa mba pa sekire omurumendu wena Simon, wina ngu isanewa Petrus.

19 Petrus ngunda ame rizemburuka nomaheero wotjirimunikise hi, Ombepo arire tji ya tja: “Tara, pe novarumendu vetatu mba mbu mave ku paha. 20 Sekama u punde kehi, nu o ripura pevari okuyenda puna wo, orondu owami ngu mbe ve hindi.” 21 Petrus arire tja pundu kehi kovarumendu na katja nai ku wo: “Owami ngu mbi ri ye ngwi ngu mamu paha. Otjikwatjike tji tje mu eta nguno?”

22 Owo va zira ave tja: “omuhongore wotjimbumba tjovarwe esere wovita, Kornelius, ongwe tu hindi. Eye omurumendu omusemba ngu nondira ku Ndjambi, nu ngwa tangwa tjinene i otjiwaṋa tjOvajuda atjihe. Omuengeri wa Ndjambi ongwe mu raere kutja e ku isane u yende kondjuwo ye, kokutja eye a puratene komambo ngu mo hungire.” 23 Petrus we ve ṋanga neve yakura otja ovayenda.

Mependukirwa eye we rirongera na i puna wo; novakambure tjiva votjihuro Jopa ve mu kongorera, 24 nu kombunda yeyuva rimwe ave ya mOsesarea. Kornelius aa undjire Petrus mOsesarea puna omuhoko nomapanga wopopezu eye mba isanene. 25 Nu Petrus tja hita motjihuro, Kornelius we mu tjakanena, e riwisa pozombaze ze ne rikoto mondengero komurungu we. 26 Nungwari Petrus we mu kengamisa a tja: “Sekama, ami owami omundu otja ove.” 27 Petrus ngunda ama hungire kuna Kornelius, tjandje nao ma hiti mondjuwo nu a vaza mo ovandu ovengi mba wongara. 28 Neye wa tja ku wo: “Eṋe mamu tjiwa nawa kutja kape yandjerwa kOmujuda okuwana nokuriangera imba mbe he ri Ovajuda. Nungwari Ndjambi we ndji raisire kutja e ha vara omundu otja omuhakohoke notja omuyaukise. 29 Ami opu mbi ha zire okupanḓa okuya, indu tji mwe kendjiisanisa. Nambano ami me mu pura kutja mwe ndji isanene tjike?”

30 Kornelius wa zira a tja: “Omayuva yane nga kapita nga, moiri mangara ondatu yomapeta, ami ee kumbu mondjuwo yandje. Tjimanga omurumendu ngwa zarere ozombanda ozongeṋangeṋe arire tja kurama momurungu wandje, 31 na tja: ‘Kornelius! Ndjambi we ku zuvire ongumbiro yoye nu wa munu oviungura vyoye vyotjari. 32 Tuma omundu kOjopa komurumendu ngwa rukwa ena Simon Petrus. Eye wa sekire ponganda ya Simon, omuṱuke womikova, ngwa tura meṋe yokuvare.’ 33 Ami opu mba zu okukuisanisa, nu oove ngo vari wa tjiti nawa weya. Nambano oweṱe mba atuhe komurungu wa Ndjambi, matu undju okuzuva move ngamwa atjihe tji wa raerwa i Muhona.”

Omazuvarisiro wa Petrus

34 Petrus wa uta okuzuvarisa a tja: “Tjiri, nambano ami me tjiwa nawa kutja nangwari Ndjambi u vara ovandu avehe pu pe ṱeki pamwe. 35 Eye u yakura omundu auhe ngu nondira ku ye, nu ngu tjita ousemba, nangarire kutja eye owotjiwaṋa kaaṋi ho. 36 Eṋe mamu tjiwa indji ombuze eye ndja hindire kotjiwaṋa tja Israel, na indu tja zuvarisa Ombuze Ombwa yohange mu Jesus Kristus, ngu ri oMuhona waavehe. 37 Eṋe wina mamu tjiwa otjiṋa otjinene tji tja tjitwa mehi arihe ra Israel. Otjo tja utirwa mOgalilea kombunda yombapitisimo Johanes ndja zuvarisire. 38 Mamu tjiwa Jesus wa Nasaret na indu Ndjambi tje mu twirisa nOmbepo Ondjapuke nomasa. Eye aa ryanga akuhe ama tjiti ouwa nama verukisa avehe mba ri kehi youvara wa Satan, Ndjambi tjinga a ri puna ye. 39 Eṱe oweṱe mbu tu ri ovahongonone voviṋa avihe eye mbya tjita mehi ra Israel na mOjerusalem. Tjazumba arire tji ve mu zepa mokumupapera kotjikoroise. 40 Nungwari kombunda yomayuva yetatu Ndjambi we mu pendura movakoke, nu e he mu munikisa 41 kovandu avehe, nungwari e mu munikisa kovahongonone porwe imba Ndjambi mba toororere rukuru, okutja ku eṱe mba mbu twa rya nokunwa puna ye indu tja za nokupenduka movakoke. 42 Eye we tu rakiza kutja tu zuvarise Ombuze Ombwa kovandu nu tu hongonone kutja eye onguri ngwi Ndjambi ngwa toorora okurira omupangure wovanamuinyo novakoke. 43 Ovaprofete avehe va hungirire ye kutja auhe ngu ma kambura mu ye, ma isirwa ourunde we mena re.”

Imba mbe he ri Ovajuda mave pewa Ombepo Ondjapuke

44 Nu Petrus ngunda ama zuvarisa, Ombepo Ondjapuke arire tje ya kombanda yaavehe mbaa ve puratene kombuze ye. 45 NOvajuda ovakambure, mba zire puna Petrus kOjope, va uruma tji va muna kutja Ndjambi wa tirire otjiyandjewa tjOmbepo Ondjapuke kombanda ya imba mbe ha ri Ovajuda wina, 46 tjinga aave hungire omaraka wowozonganda amave tanga ounene wa Ndjambi. Petrus arire tja tja: 47 “Ovandu mba wina va pewa Ombepo Ondjapuke otja eṱe. Pe nomundu ngu ma yenene okuvetjaera okupapitisiwa nomeva are?” 48 Petrus otja rakiza kutja owo ve papitisiwe mena ra Jesus Kristus. Nowo arire tji ve mu ningire kutja a kare omayuva tjiva puna wo.