2 Ozombara 25 - Herero Revision Bible (HRR)

Omatwiro wa Jerusalem

1 Sidkija wa sekamena Nebukadnesar, ombara ya Babilon. Nebukadnesar ope era notjimbumba tje atjihe tjovita na rwisa Jerusalem meyuva oritjamurongo komueze outjamurongo wombura oitjamuvyu youhona wa Sidkija. Owo va tona ozondanda pendje yotjihuro, ave tungu orumbo rwehi okukondoroka tjo, 2 nave tji kovere nga kombura oitjamurongo na imwe youhona wa Sidkija. 3 Meyuva oritjamuvyu komueze outjaine wombura tjingeyo ndjo, ondjara tji ya rira onene tjinene nai, nga ovandu tji ve ha ri notjiṋa okurya 4 orumbo rwotjihuro otji rwa teyewa, nu nandarire kutja Ovababilon va koverere otjihuro, ovarwe avehe wovita va hena ouṱuku. Owo va twara ondjira yotjikunino tjombara ave pitire momuvero wokotjikoro tjorumbo, nave taura okuhungama orutjandja rwonḓonḓu Jordan. 5 Nungwari otjimbumba tjOvababilon tjovita tja tezera ombara Sidkija, natji kemukamburira motutjandja popezu na Jeriko; ovarwe ve avehe wovita ve mu esa. 6 Sidkija wa twarewa kombara Nebukadnesar, ngwa ri motjihuro Ribla, nu mu tjo Nebukadnesar ome mu pangurira. 7 Ovazandu va Sidkija va ṱa, eye omuini ngunda ama tarere; tjazumba Nebukadnesar wa raera kutja omeho wa Sidkija ye homonwe, a pandekwe na twarewe kObabilon.

Omanyoneno wondjuwo ya Muhona

(Jer 52:12-23)

8 Meyuva oritjahambombari komueze outjatano wombura oitjamurongo na muvyu youhona wa Nebukadnesar, ombara ya Babilon, Nebusaradan, omuyandjandunge wombara nomuhongore omunene wovatjevere, otja hita mOjerusalem. 9 Eye wa hwika ondjuwo ya Muhona, nondjuwo youhona, nozondjuwo azehe zovandu ovatjiukwa mOjerusalem; 10 novarwe ve wovita va haṋa orumbo rwotjihuro. 11 Nebusaradan wa twara ovandu imba mba hupa motjihuro kObabilon, na wina imba ovaungure ozonongo mba hupa, na imba mba kondere kOvababilon. 12 Nungwari eye wa isa ovandu tjiva mOjuda, imba ovasyona tjinene, mbe ha ri nouini, ne ve ungurisa movikunino vyomivite na momahi womakunino.

13 Ovababilon va hahaura ozongunḓe zongoporo nḓa ri pomahitiro wondjuwo ya Muhona, noutemba mbwa ri mondjuwo ya Muhona, noruungu orunene rwongoporo ndwa ri mo wina, nave twara ongoporo aihe kObabilon. 14 Owo wina va twara oviwote noviukiro vyomutwe mbyaa vi ungurisiwa okukohorora na vyo otjipunguhiro, novikonde vyomamunine, noviyaha vyokutirira mo ombinḓu yovinamuinyo vyozombunguhiro, noviyaha vyomatwimisiro, noviungurise avihe vyarwe vyongoporo mbyaa vi ungurisiwa mokukarera na vyo mondjuwo ya Muhona. 15 Owo va twara oviungurise avihe mbya ungurwa posilveri na pongoldo, okutja ouyaha ouṱiṱi noviyaha ovitjandja muyamu toorerwa omakara nge nomuriro. 16 Imbi oviṋa vyongoporo ombara Salomo mbya unguririre ondjuwo ya Muhona vya ri ovizeu tjinene okusanekwa, okutja ozongunḓe inḓa mbari zongoporo, noutemba wongoporo, noruungu indwi orunene rwongoporo. 17 Ozongunḓe nḓa mbari za sanene kumwe: Aihe ya ri noutonga wozometa hambondatu, nu ya ri notjiuru tjongoporo tji tja ri noure wometa imwe nohinga. Otjiuru atjihe peke tja kondorokisirwe noruzenga rwongoporo ndwa harekwa nozondenya zongoporo.

Otjiwaṋa tja Juda matji twarewa kObabilon

(Jer 52:24-27)

18 Puna imbi oviṋa avihe Nebusaradan, omuhongore omunene wovatjevere, wa twara ooSeraja, Omupristeri Otjiuru, nomupristeri wokehi, novatjevere vetatu vopomahitiro wondjuwo ya Muhona otja ovahuurwa. 19 Okuza motjihuro eye wa twara omuhongore omunene ngwa ri omutye wovarwe wovita, novayandjandunge vetano vombara, ingee mba ri motjihuro, nomuvatere womuhongore omunene wotjimbumba tjovita, ngwa ri omutjangerepo wotjimbumba hi, novarumendu varwe ovatjiukwa omirongo hamboumwe wina mba ri motjihuro. 20 Nebusaradan we ve twara kombara ya Babilon ndja ri motjihuro Ribla, 21 mehi ra Hamat. Motjihuro hi ombara omu ye ve tonena nai ve zepa.

Komuhingo mbwi otjiwaṋa tja Juda otji tja twarewa kouhuura okuza mehi ratjo.

Gedalja ma rire omunane omunene wokehi yombara mehi ra Juda

(Jer 40:7-9Jer 41:1-3)

22 Nebukadnesar, ombara ya Babilon, wa zika Gedalja, omuzandu wa Ahikam, omuzandu wa Safan, okurira ongooneya mehi ra Juda, ne mu ziki okurira omutye wa imba avehe mbe ha twarerwe kObabilon. 23 Ovahongore va Juda novarwe mbe ha huurirwe tjiva zuva nai, ve rikuta kuna Gedalja mOmispa. Ovahongore mba va ri ooIsmael, omuzandu wa Netanja, na Johanan, omuzandu wa Kareak, na Seraja, omuzandu wa Tanhumet, ngwa zire kotjirongo Netofa, na Jaasanja, ngwa zire kOmaaka. 24 Gedalja we ve yanena na tja ku wo: “Kahepero eṋe okuriyandja mouvara wombara ya Babilon. Tureye mehi ndi nu mu karere ombara ya Babilon, nu mamu kara nawa.”

25 Nungwari momueze outjahambombari wombura ndjo, Ismael, omuzandu wa Netanja, omuzandu wa Elisama womuhoko wouhona, wa ya kOmispa puna ovarumendu omurongo, a karwisa Gedalja ne mu zepa. Eye wina wa zepa Ovaisrael nOvababilon, mba ri puna ye mbo. 26 Ovaisrael avehe, ovatumbe novasyona puna ovahongore votjimbumba tjovita, va ya kOengipte, tjinga ave tira Ovababilon.

Jojakin ma pitisiwa motjovakamburwa

(Jer 52:31-34)

27 Mombura Ewil-Merodak ndja rira ombara mObabilon, eye wa ṱotjari na Jojakin, ombara ya Juda, ne mu pitisa motjovakamburwa. Ihi tja tjitwa meyuva oritjamirongo vivari na hambombari komueze outjamurongo na vivari wombura oitjamirongo vitatu na hambombari, Jojakin tja za nokuhuurwa. 28 Ewil-Merodak we mu ṱuna nawa, ne mu haamisa poruveze rwondjozikiro, pu indwi eye ndwa yandja kozombara ozongwao, nḓa ri mouhuura puna ye mObabilon. 29 Komuhingo mbwi Jojakin otja yandjerwa okurihukura ozombanda zomotjovakamburwa nokukarya kotjiriro tjombara, ngunda a ri nomuinyo. 30 Eyuva arihe ngunda e nomuinyo, aa pewa oviparure mbya hepa.