Jeremia 43 - Herero Revision Bible (HRR)

Jeremia ma twarewa kOengipte

1 Ami mba mana okuserekarera otjiwaṋa omambo aehe Muhona, Ndjambi wawo nge ndji hindire okutjiraera. 2 Tjazumba Asarja, omuzandu wa Hosaja, na Johanan, omuzandu wa Kareak, novarumendu avehe varwe ovirangaranga va tja nai ku ami: “Mo kora ovizeze! Muhona, Ndjambi wetu ke ku hindire okuyekuturaera kutja atu ha katura kOengipte. 3 Baruk, omuzandu wa Nerija, we ku hohiza kutja u tu yandje mouvara wOvababilon, kokutja ve tu zepe poo ve tu tware mouhuura kObabilon.” 4 Johanan novahongore wovita avehe notjiwaṋa atjihe kave vangere okukara nonḓuviro komarakiza wa Muhona wokutja ve kare mehi ra Juda. 5 Johanan novahongore wovita avehe otji va twara ovandu avehe mba sewa mOjuda kOengipte puna otjiwaṋa atjihe tji tja kotokere okuza koviwaṋa avihe mu tja rimbirwe, 6 okutja ovarumendu novakazendu novanatje, novasuko vombara. Owo va twara ovandu avehe Nebusaradan, omuhongore otjiuru, mba twire kehi yondjeverero ya Gedalja, nu wina va twara Baruk na ami. 7 Owo kave karere nonḓuviro komarakiza wa Muhona, notji va kahita mehi ra Engipte nga kotjihuro Takpanhes.

8 MOtakpanhes Muhona wa tja nai ku ami: 9 “Kaete omawe tjiva omanene nu u ye yare momunoko, morupare ndu ri pomahitiro wondjuwo youhona imwi motjihuro, nOvaisrael tjiva ngave ku mune amo tjiti nao. 10 Tjazumba ve raera kutja ami, ngu mbi ri Muhona Omunamasaaehe, Ndjambi wa Israel, me eta omukarere wandje Nebukadnesar, ombara ya Babilon, poṋa mba, neye ma zikamisa otjihavero tje tjouhona kombanda yomawe nga ngu wa sira, nu wina ma yara ko otjinguma tje tjouhona kombanda yawo. 11 Nebukadnesar meya na havere Engipte. Ovandu mba mba sengwa okuṱomutjise omuzeu mave ṱu i omutjise omuzeu; nu imba mba sengwa okutwarewa otja ovahuurwa mave twarewa otja ovahuurwa; nu imba mba sengwa okuṱa movita mave ṱu movita. 12 Eye ma nyosa ozondjuwo ozonḓere zoomukuru vOvaengipte, noomukuru vawo wina e ve twara. Otja omurise punga e pukumuna ozona mozombanda ze, ombara ya Babilon wina opunga amai pukumuna ehi ra Engipte okukohorora ro, noyo mai zu mo mu ro nokuhinatjipo. 13 Oyo mai hahaura ozongunḓe ozonḓere mOheliopolis mOengipte, nu ai nyosa ozondjuwo ozonḓere zoomukuru vOvaengipte.”