Jeremia 19 - Herero Revision Bible (HRR)

Otjikuve tji tja tauka

1 Muhona we ndji raera kutja mbi karande otjikuve tjomunoko. Eye wina we ndji raera kutja mbi toore ovanene tjiva votjiwaṋa, novapristeri tjiva, 2 nu tu yende komukutu wa Ben-Hinom mbu ri pOmuvero wOviyaya vyOzonyungu. Ingo oku mba sokukazuvarisira ombuze eye ndji me ndji pe. 3 Muhona we ndji raera kutja mbi katje nai: “Zombara za Juda novature va Jerusalem, purateneye ku imbi ami, ngu mbi ri Muhona Omunamasaaehe, Ndjambi wa Israel, mbi me hungire. Ami me eta oumba ounene nai kutja auhe ngu me u zuu a kumwe. 4 Ami me tjiti nai, ovandu tjinga ave ndji esa nu ava yamburura otjirongo hi mokupunguhira oomukuru varwe ozombunguhiro muno, imba oomukuru vyawo nooihe mukururume nozombara za Juda mbe hi na ve ve tjivirwe. Owo ve urisa otjirongo hi nombinḓu yovandu ovehinandjo; 5 nu va tungira Baal ovipunguhiro okuningiririsira ko ovanatje vawo ve rire ozombunguhiro. Ami hi na pu mbe ve rakizire okutjita nao; otjiṋa otja ihi katji na indu tja ri momeripuriro wandje. 6 Omayuva otji maye ya, poṋa mba tji pe hi nokuuhara amape isanewa kutja Tofet rukwao poo kutja omukutu wa Ben-Hinom. Nungwari matji isanewa Omukutu wOmazepero. 7 Motjirongo hi ami me yandisa omeripuriro aehe wotjiwaṋa tja Juda nowovature va Jerusalem. Ami me yandjere ovanavita na wo kutja ve ve havere nu ve ve zepe motjirwa. Ami me yandja oturova twawo kozonḓera zeyuru na kovipuka vyokuti, tu rire ovikurya vyavyo. 8 Ami me eta omanyoneno omatirise tjinene nai kotjihuro hi, kokutja auhe ngu ma kapita pu tjo, ma urume nu ma kumwe. 9 Ovanavita mave kovere otjihuro, nu mave kondjo okuzepa ovature vatjo. Omakoverero maye rire omatirise, kokutja ovandu mbe ri moukoto wotjihuro, ve ryasane nu ve rye nangarire ovanatje vawo wina.”

10 Muhona we ndji raera kutja mbi taurire otjikuve momurungu wovarumendu mba mba ya puna ami, 11 nokuvetjivisa kutja Muhona Omunamasaaehe wa tja nai: “Ami me ṱukuṱura otjiwaṋa hi notjihuro hi, notjo matji sana kotjikuve tjomunoko hi tji tja teka, nu tji tji hi nokuyarurwa ko rukwao. Otjiwaṋa matji paka ovakoke vatjo mOtofet, orondu kape nopoṋa parwe pu matji ve paka. 12 Ami otji me tjiti otjihuro hi novature vatjo tjimuna oTofet. 13 Ozondjuwo za Jerusalem, nozondjuwo zozombara za Juda, nu, tjiri, inḓa ozondjuwo azehe komitutu vyazo ku kwa twimisirwa ovyomoro omuwa kozonyose, nu ku kwa tiririwa omavinu ye rire ombunguhiro koomukuru varwe, azehe maze rire ozohakohoke tjimuna oTofet.”

14 Tjazumba otji mba zapo pOtofet, Muhona ke ndji tumine okukazuvarisa ombuze ye. Ami mba ya, e kakurama morupanda rwondjuwo ya Muhona ne karaera ovandu avehe 15 kutja Muhona Omunamasaaehe, Ndjambi wa Israel, wa tjere nai: “Ami me eta otjiwonga tji mba heya kotjihuro hi na kovirongo avihe vyopopezu, orondu oweṋe ovirangaranga, nu kamu puratene ku imbi mbi mbi hungira.”