Manasse ma rire ombara mOjuda
(2Ozo 21:1-9)1 Manasse wa rira ombara mOjuda tja ri nozombura omurongo na mbari; neye wa honapara mOjerusalem oure wozombura omirongo vitano nandano. 2 Eye wa tjita ouvi komurungu wa Muhona ama horere kovitjitwa oviyaukise vyoviwaṋa Muhona mbya rambere mehi, indu otjiwaṋa tje tji tje ya. 3 Manasse wa tungurura poṋa pekepeke pomerikotameneno kovisenginina kozondunda, ihe Hiskija pa haṋene. Eye wa tunga ovipunguhiro vyokurikotamenena ku Baal, a ungura otjiserekarera tjomukuru wotjisenginina oserekaze Asera ne rikotamene kozonyose. 4 Eye wa tunga ovipunguhiro vyovisenginina mondjuwo ya Muhona, poṋa Muhona pa tjere Eye opu me rikotamenenwa nga aruhe. 5 Motupanda tuvari twondjuwo ya Muhona, Manasse wa tunga mo ovipunguhiro vyokurikotamenena kozonyose. 6 Eye wina wa punguhira ovanatje ve ovazandu momukutu wa Ben-Hinom okurira ozombunguhiro ozoningiririsiwa na tjiti ounganga noundjai na kapura kozombuke na kozombetere. Wa tjita ouvi tjinene komurungu wa Muhona ne mu pindikisa. 7 Manasse wa twa otjiserekarera tja Asera mondjuwo ya Muhona, Ndjambi ndja raerere ku David na komuzandu we Salomo, indu tja tjere: “Imba mOjerusalem, mondjuwo ndji, opo poṋa pu mba toorora momahi aehe womihoko vya Israel omurongo na vivari otja moṋa ami mu me rikotamenenwa nga aruhe. 8 Notjiwaṋa atjihe tja Israel tji matji kara nonḓuviro komarakiza wandje aehe natji ṱakamisa Omatwako aehe, ngu tja pewa i omukarere wandje Moses, hi nokutjiyandjera kutja tji rambwe mehi, ndi mba yandja kooihe mukururume.” 9 Manasse wa twa otjiwaṋa tja Juda novature va Jerusalem mouvi ounene pu imbwi mbwa tjitwa i oviwaṋa Muhona mbya rambere, indu otjiwaṋa tje tji tje ya mehi.
Manasse me ritanaura
10 Nangarire kutja Muhona wa ronga Manasse notjiwaṋa tje, owo kave puratenene ko. 11 Muhona otja hinda ovahongore votjimbumba tjOvaasirie tjovita kutja tji rwise Juda. Owo va kambura Manasse ave mu pata nombate, ave mu pandeke nouketanga nave mu twara kObabilon. 12 Eye tjinga a ri mombamisiro we ritanaura ku Muhona, Ndjambi we, ne risusuparisa ame riyarikaṋa ombatero ku Ndjambi wooihe mukururume. 13 Ndjambi wa yakura ongumbiro ya Manasse ne mu zuvire ame mu yarura kOjerusalem kutja a kahonapare rukwao. Manasse opa tjivirwa kutja Muhona onguri Ndjambi.
14 Kombunda yoviṋa mbi Manasse wa ryamisa omatungiro worumbo rwopendje, komukuma wokomuhuka wotjihuro tja Jerusalem, okuza momukutu mbwa ri popezu noruharwi Gihon, komukuma wokeyuva kokunene, nga kOmuvero wEhundju; orwo rwa kondoroka Ofel, neye we ru yerurura tjinene. Eye wina wa zika omuhongore wotjimbumba tjovita motjihuro atjihe peke mOjuda tji tja zeuparisiwa. 15 Eye wa isa mo oomukuru varwe notjiserekarera tja Asera mondjuwo ya Muhona, novipunguhiro vyovisenginina wina mbya ri kozondunda ku kwa kurama ondjuwo ya Muhona, na poṋa apehe parwe mOjerusalem; eye wa pitisa oviṋa avihe mbi motjihuro ne vi imbirahi. 16 Wina wa tungurura otjipunguhiro Muhona kee rikotamenenwa, na punguhire ozombunguhiro zohange nozokutja okuhepa ku tjo. Eye wa rakiza kotjiwaṋa atjihe tja Juda kutja tji rikotamene ku Muhona, Ndjambi wa Israel. 17 Nandarire kutja ovandu va kara pokupunguhira ozombunguhiro poṋa pekepeke parwe pomerikotameneno, owo ve ze punguhira Muhona erike.
Ondjandero youhona wa Manasse
(2Ozo 21:17-18)18 Oviṋa avihe vyarwe Manasse mbya tjita, ongumbiro ndja kumba ku Ndjambi, nozombuze zovaprofete, mba hungirire ku ye mena ra Muhona, Ndjambi wa Israel, avihe mbi vya tjangwa mEkuruhungi rOzombara za Israel. 19 Ongumbiro yombara nomuano Ndjambi mbwa zira ongumbiro ndji, nomauvi aehe ombara nga tjita, nouhaṱakama we, nopoṋa apehe pomerikotameneno kovisenginina kozondunda, noviserekarera vyomukuru wotjisenginina oserekaze Asera kee rikotamene, avihe mbi vya tjangwa mEkuruhungi rOvaprofete. 20 Manasse wa koka na pakwa pondjuwo youhona, nomuzandu we Amon we mu pingena okurira ombara.
Amon ma rire ombara mOjuda
(2Ozo 21:19-26)21 Amon wa ri nozombura omirongo vivari na mbari tja rira ombara mOjuda; neye wa honapara mOjerusalem oure wozombura mbari. 22 Eye wa tjita ouvi komurungu wa Muhona tjimuna ihe Manasse, nu we rikotamena koomukuru vovisenginina, imbi ihe kuye rikotamene. 23 Nungwari Amon ke risusuparisire nokuritanaurira ku Muhona tjimuna ihe; eye wa tjita ouvi tjinene pu ihe.
24 Ovahongore va Amon ve rikuta kumwe okumusekamena nave mu zepere mondjuwo youhona. 25 Nungwari otjiwaṋa tja Juda tja zepa imba mba sekamena ombara Amon natji ziki omuzandu we Josija okurira ombara.
© Herero Revision Bible © Bible Society in Namibia, 2021.
