Ndjambi ma vere Ovaetiopi
1 Munda mbwina yozonḓonḓu za Etiopie ku nehi mu mu zuvaka ombosiro yovivava. 2 Okuza kehi ndo ovakuramenepo varo ve rauka nonḓonḓu Nil mouyaha mbwa ungurwa potuu. Yarukeye kozonganda, vahindwa ovanatjikara! Yarureye ombuze kehi reṋu nda tuurungwa i ozonḓonḓu, kotjiwaṋa tjeṋu otjinamasa notjinauvara, kovandu veṋu ovare mbe nomikova omiheze nu mbe tiriwa mouye auhe.
3 Purateneye, eṋe amuhe mbu mu tura kombanda yehi! Tareye kerapi rotjihako, ndi mari yererwa kozondomba zozondundu! Purateneye kombosiro yohiva! 4 Muhona wa tja nai ku ami: “Ami me tara pehi okuza meyuru amba hirimana tjimuna ovikamba vyombura moupyu wouṱuku moruveze rwomakondero, name keṋakeṋa tjimuna ozohanya zeyuva mutenya. 5 Omandjembere ngunda aye hiya nikorwa, ozosunda tji za pukumuka, nomandjembere tji ya horo, ovanavita tjandje mave yandeke Ovaetiopi oupupu tjimuna oruvyo tji ru konda otutavi twomuvite. 6 Oturova twovarwe vawo wovita matu isiwa tu tokorwe i ozonguvi, nu tu riwe i ovipuka vyokuti. Mokurooro ozonguvi maze tokora oturova twi, nu mokupepera oto matu riwa i ovipuka.”
7 Oruveze maru ya Muhona Omunamasaaehe mu ma yakura ozombunguhiro zehi ndi nda tuurungwa i ozonḓonḓu, ozombunguhiro zotjiwaṋa ihi otjinamasa notjinauvara, ovandu mba ovare mbe nomikova omiheze nu mbe tiriwa mouye auhe. Owo mave ya kondundu Sion, Muhona Omunamasaaehe ke rikotamenenwa.
© Herero Revision Bible © Bible Society in Namibia, 2021.
