Esekiel 26 - Herero Revision Bible (HRR)

Omaukiro kOtirus

1 Meyuva etenga komueze wombura oitjamurongo na imwe youhuura wetu Muhona wa hungira ku ami a tja: 2 “Muatje womundu, ovandu votjihuro Tirus ve nyekerera Jerusalem amave ravaere nai: ‘Jerusalem tja hahaurwa! Omarandasaneno watjo omananḓengu ya zu po! Katji tji nakurarakana puna eṱe rukwao!’

3 “Nambano ami, ngu mbi ri Muhona Ndjambi, me tja nai: Owami omunavita na ove, tjihuro Tirus. Ami me eta omihoko omingi vi ku rwise, novyo mavi ya otja ozongazona zokuvare. 4 Ovyo mavi nyono orumbo rwoye rwotjihuro nu avi teya otuhungu twoye. Ami me kombozora ovitekero avihe vyorumbo, nu e tji esa atji sana koruuwa ndu ri nguruzu. 5 Ovapate vozohi mave kahisire ozombate zawo ku tjo, imbo pu tji ri mokati kokuvare. Ami, ngu mbi ri Muhona Ndjambi, mba hungire. Omihoko mavi pundu Tirus, 6 nu avi zepa nomangaruvyo imba mba tura movirongo vyatjo mbi ri mehi eparanga. Tirus otji matji tjiwa kutja owami ngu mbi ri Muhona.”

7 Muhona Ndjambi ma tja nai: “Ami me eta ombara onene tjinene pozongwao azehe, indji ombara Nebukadnesar wa Babilon, okurwisa Tirus. Eye ma zu komukuma wokeyuva kokunene notjimbumba otjinene tjovita, noukambe nomatemba wovita novakavire. 8 Imba mba tura movirongo, mbi ri mehi eparanga mave ṱu motjirwa. Ovanavita mave se otuhoro, nu ave tungu ozondunduvahi nave ungura orumbo orukukutu ndu maru tjizikiza wo kove. 9 Owo mave mosurire orumbo notjiundure nave teya otuhungu twoye novikuure vyovitenda. 10 Oruuma ndwa sekamisiwa i oukambe wawo maru ku setike. Ondokohero youkambe noyoviryo vyomatemba wovita mai kurakurisa orumbo rwoye, owo tji maye tuurungire momivero vyotjihuro tji tja wa. 11 Ovakavire vawo voukambe mave taurire momivanda vyoye nave zepa ovandu voye nomangaruvyo wawo. Ozongunḓe zoye zomawe ozonamasa maze wisirwa pehi. 12 Ovanavita na ove mave huura outumbe woye novirandwa vyoye. Owo mave teya orumbo rwoye nave hahaura ozondjuwo zoye ozombwa ongongo. Mave toora omawe nomiti noviyaya avihe nave vi ṱomwinisa momuronga. 13 Ami me mwinisa ombosiro yovinangoma vyoye nombosiro vyoviharpe vyoye. 14 Me ku tjiti okurira oruuwa ndwa kuruka porwaro, ovapate vozohi ku mave kahisire ozombate zawo. Otjihuro kamaatji tungururwa rukwao. Ami, ngu mbi ri Muhona Ndjambi, mba hungire.”

15 Muhona Ndjambi ma tja nai kotjihuro Tirus: “Tji wa haverwa, ovandu mba tura komukuro wokuvare mave zezerisiwa i omungunda womawiro woye nomatjemeno wa imba mba tendwa nombinḓu yaimba mba ṱu. 16 Ozombara azehe zomihoko, mbi kayenda mokuvare, maze heruka kovihavero vyazo vyouhona. Ozo maze hukura otupera twazo nozombanda zazo zovivaravara nu aze haama pehi amaze zezera. Maze tirisiwa tjinene nai i otjiwonga tjoye nga tji ze hi nokusora okuisa okuzezera. 17 Ozo maze ku tjitire omutambo mbu mau tja nai:

Otjihuro otjitjiukwa tja nyonwa!

Ozondjuwozomomeva zatjo za

isiwa mo mokuvare.

Ovature votjihuro hi va

honaparera okuvare

nu va urumisa avehe mba

turire pomukuro wokuvare.

18 Nambano, meyuva ndi tja u,

omakoverwa maye zezera,

novature vawo mave kumisiwa i

omanyoneno otja inga.”

19 Muhona Ndjambi ma tja nai: “Ami me ku ririsa etundu tjimuna ovihuro mbya nyonwa mu mu ha tura omundu. Ami me ku vandeke nomeva omanene wokuvare. 20 Me ku hindi kotjovakoke okukawana novandu mba ya ngo moruveze orukuru. Me kekuturisa kouye wokehi yehi mokati komaṱunḓu omakarerere u kakare puna ovakoke. Komuhingo mbwi ove komoo tura rukwao nu komoo kara noruveze mehi rovanamuinyo. 21 Ami me tjiti kutja u rire otjiraisiro otjitirise, nu indji mai rire ondjandero yoye. Ovandu mave ku paha, nungwari komoo munika ko.” Muhona Ndjambi ongwa hungire nai.