Otjirimunikise tjomatemba yane wovita
1 Ami tji mba yera omeho wandje rukwao, otji mba muna otjirimunikise tjarwe tjomatemba yane wovita ngu maye pitire pokati kozondundu mbari zongoporo. 2 Etemba rovita etenga iyari nanwa i oukambe ousazu, indi oritjavari iyari nanwa i oukambe ouzorozu, 3 indi oritjatatu iyari nanwa i oukambe ouvapa, nu indi oritjaine iyari nanwa i oukambe oupawe. 4 Ami otji mba pura omuengeri e tja: “Muhona, omatemba nga maye hee tjike?”
5 Eye wa zira nai: “Owo ozombepo ine nḓe hinga komikuma vine vyeyuru nu nḓe ya nambano okuza ku Muhona wehi arihe.”
6 Etemba ndaari nanwa i oukambe ouzorozu iyari i komukuma wokeyuva kokunene kObabilon; oukambe ouvapa aa u i kongurova, nu imbwi oupawe aa u i kehi rokomukuma wokeyuva kokumuho. 7 Oukambe mbwi oupawe tji wa pita aa u hakahana okukakonḓonona ehi. Omuengeri wa tja nai: “Twendeye mu kakonḓonone ehi!” Nowo wa tjita nao. 8 Tjazumba omuengeri otja ravaera ku ami a tja: “Tara, oukambe mbu mau i komukuma wokeyuva kokunene, mau kasuvisa Ombepo ya Muhona mehi ra Babilon.”
Jesua ma pewa ekori rouhona
9 Muhona we ndji pa ombuze ndji 10 na tja nai: “Kambura oviyandjewa mbya yandjewa i ovahuurwa ooHeldai na Tobija na Jedaja nu u yende tjimanga konganda ya Josija, omuzandu wa Sefanja. Ovarumendu mba avehe va kotoka okuza kouhuura wa Babilon. 11 Ungura ekori rouhona posilveri nongoldo ndji va yandja, nu u ri twe kotjiuru tjOmupristeri Otjiuru Josua, omuzandu wa Jehosadak. 12 Mu raera kutja Muhona Omunamasaaehe ma tja nai: ‘Omurumendu ngu isanewa kutja Orutavi ma nyomoka imba pe ri, nu ma tungurura ondjuwo ya Muhona. 13 Eye onguri ngwi ngu me i tungu, nu ma pewa ondjozikiro ndja pwire ombara, nu ma honapara. Nomupristeri umwe ma kurama potjihavero tje tjouhona, nowo mave ungura pamwe mohange na moupore.’ 14 Ekori rouhona mari ṱakamisirwa mondjuwo ya Muhona otja otjizemburukiro kondjozikiro ya Heldai na Tobija na Jedaja na Josija.”
15 Ovandu mba tura kokure mave ya ave vatere okutungurura ondjuwo ya Muhona. Noyo tji ya tungururwa, eṋe otji mamu tjiwa kutja Muhona Omunamasaaehe ongwe ndji hindire ku eṋe. Imbi avihe mavi tjitwa eṋe tji mwa kara nonḓuviro, tjiri, komatwako wa Muhona, Ndjambi weṋu.
© Herero Revision Bible © Bible Society in Namibia, 2021.
