Omuprofete ma munu Omupristeri Otjiuru motjirimunikise
1 Motjirimunikise tjarwe Muhona we ndji raisira Omupristeri Otjiuru Josua a kurama komurungu womuengeri wa Muhona. Nu imbo meṋe ya Jesua pa kuramene Satan e rirongerere okuyandja ondjo ku Josua. 2 Omuengeri wa Muhona wa tja nai ku Satan: “Muhona nge ku vere, Satan! Muhona ngwa suvera Jerusalem, nge ku vere! Omurumendu ngwi u ri otja otjiyumbu tji tja hakanwa momuriro.”
3 Josua wa kuramene mbo a zara ozombanda zondova. 4 Omuengeri wa tja nai ku imba veyuru mba kuramene komurungu we: “Hukureye ozombanda zondova omurumendu ngwi nḓa zara!” Tjazumba arire tja tja ku Josua: “Ami mba isa po ondjo yomauvi woye, nu me ku pe ozombanda ozombwa ozomanise kutja u zare.”
5 Omuengeri wa rakiza ku imba mba kuramene komurungu we kutja ve twe ko onḓuru ongohoke kotjiuru tja Jesua. Owo va tjita nao; notji va zarisa Jesua ozombanda ozombwa ozomanise, omuengeri wa Muhona ngunda a kurama mbo.
6 Tjazumba omuengeri otja raera Jesua kutja 7 Muhona Omunamasaaehe wa tjere nai: “Tji mo kara nonḓuviro komatwako wandje nokuungura oviungura mbi mbe ku pa, mo kara pokutjevera ondjuwo yandje notupanda twayo, nu me yakura ozongumbiro zoye otja tji mbi yakura ozongumbiro zovaengeri mbe ri momurungu wandje. 8 Nambano puratena, Josua, oove ngu u ri Omupristeri Otjiuru; nu purateneye, eṋe vapristeri va pamwe naye, mbu mu ri otjiraisiro tjoruveze oruwa ndu maru ya: Ami me isana omukarere wandje ngu ma rukwa kutja Orutavi! 9 Ami me twa ewe rimwe momurungu wa Josua ndi nomeho hambombari. Me korora mo otjiserekarera mu ro, nu meyuva rimwe ami me isa po ondjo yomauvi wehi ndi. 10 Eyuva ndo tji re ya, auhe weṋu ma ṋanga omuraranganda we kutja amuhe mu mune ohange norusuvo kehi yomivite nomikuyu vyeṋu.” Muhona Omunamasaaehe ongwa hungire.
© Herero Revision Bible © Bible Society in Namibia, 2021.
