Otjirimunikise tjotjikurameno tjomamunine
1 Omuengeri ngwa hungirire na ami weya rukwao ku ami ne ndji pendura aayo mba rarere ozomboṱu. 2 Eye wa pura a tja: “Mo munu tjike?”
Ami mba zira nai: “Me munu otjikurameno tjomamunine tji tja ungurwa pongoldo. Kombanda yatjo ku notjiyaha tjomaze, nu wina ku nomamunine hambombari nge notuṱumo otupakere hambombari. 3 Pe nomiṋinga vivari meṋe yotjikurameno tjomamunine hi, umwe komunda auhe watjo.” 4 Nu arire tji mba pura omuengeri e tja: “Muhona, oviṋa mbi mavi hee tjike?”
5 Eye wa pura a tja: “Ko nokutjiwa are?”
Ami e ziri nai: “Kako! Hi nokutjiwa, muhona.”
10b Omuengeri wa tja nai ku ami: “Omamunine hambombari owo omeho hambombari wa Muhona nge muna akuhe mouye.”
11 Tjazumba otji mbe mu pura e tja: “Imbi omiṋinga vivari kominda aviyevari vyotjikurameno mavi hee tjike? 12 Nu itwi otutavi tuvari twomiṋinga tu tu ri meṋe yotuṱumo tuvari twongoldo tu tu pakera omaze womiṋinga, matu hee tjike?”
13 Eye arire tje ndji pura a tja: “Ko nokutjiwa are?”
Ami e ziri nai: “Kako! Ami hi nokutjiwa, Muhona.”
14 Tjazumba eye a tja: “Omiṋinga vivari mbi ovyo ovarumendu vevari, mba toororwa nu mba twirisiwa i Ndjambi okumukarera, ingwi Ndjambi ngu ri Muhona wouye auhe.”
Omakwizikiro wa Ndjambi ku Serubabel
6 Omuengeri we ndji raera kutja mbi yandje ombuze ya Muhona ndji ku Serubabel: “Ove mo toṋa, kanomasa wotjimbumba tjovita nu kanomasa woye omuini, nungwari mo toṋa nOmbepo yandje. 7 Ovipwite ovinene tjinene tjimuna ozondundu mavi isiwa po i ami komurungu woye. Ove mo tungurura ondjuwo ya Muhona, nu ngunda amo ziki ewe esenina poruveze rwaro ovandu tjandje mave ravaere nai nondjoroka: ‘Oyo ombwa, tjiri, oyo ombwa omanise.’ ”
8 Ombuze ongwao ye ya ku ami okuza ku Muhona, 9 noyo ya tja nai: “Serubabel wa zika omazikameno wondjuwo ya Muhona, neye ma mana omatungiro wayo. Otjiṋa hi tji tja tjitwa, otjiwaṋa tjandje otji matji tjiwa kutja owami ngu mbe ku hinda ku tjo. 10a Ovandu va nyengwa, oviungura vyomatungiro wayo tjinga amavi kayenda kaṱiṱi tjinene. Nungwari tji mave munu Serubabel ama panḓere pokutungurura ondjuwo ya Muhona, mave yoroka.”
© Herero Revision Bible © Bible Society in Namibia, 2021.
