Esra 5 - Herero Revision Bible (HRR)

1 Moruveze ndo ovaprofete mba vevari ooHagai na Sakaria, omuzandu wa Ido, va uta okuzuvarisira Ovajuda mena ra Ndjambi wa Israel, imba Ovajuda mba turire mehi ra Juda na mOjerusalem.

2 Serubabel, omuzandu wa Sealtiel, na Jesua, omuzandu wa Josadak, tji va zuva ombuze yovaprofete mba, otji va uta okutungurura ondjuwo ya Muhona mOjerusalem; novaprofete mba vevari ve ve vatera.

3 Moruveze tjingero ndo Tatenai, ongooneya yokongurova kwa Eufrat, na Setar-Bosnai, novahongore ovakwao ve ya kOjerusalem nave pura nai: “Owaṋi ngwe mu pe ousemba wokutunga ondjuwo ndji nokuhareka omakuma wayo nomiti?” 4 Owo wina va pura omana wovarumendu avehe mbaa ve vatere okutunga indji ondjuwo ya Muhona. 5 Nungwari Ndjambi wa tjevera ovanane vOvajuda; novahongore vOvapersie kave tjitire otjiṋa, nga tji va za nokumuna eziriro rorutuu ndwi ndu va tjangere ku Darius. 6 Omambo ngu va hinda kombara owo nga:

7 “Kombara Darius, minikwa mohange!”

8 “Ove, muhona, u sokutjivisiwa kutja eṱe twa ire korukondwa rwa Juda, nu twa kamuna ondjuwo ya Ndjambi omunene amai tungururwa nomawe omanene, nomiti mbya tuwa momakuma. Oviungura vi ungurwa noupatje ounene, nu vi kayenda nawa komurungu.

9 “Eṱe otji twa pura ovanane votjiwaṋa ve tu raere kutja owaṋi ngwe ve pa ousemba wokutungurura ondjuwo ya Muhona nokuhareka omakuma wayo nomiti. 10 Wina twe ve pura omana wawo tu ku tjivise kutja ovanane votjiungura hi oowaṋi.

11 “Owo va zira ave tja: ‘Oweṱe ovakarere va Ndjambi weyuru nehi; nu matu tungurura ondjuwo ya Muhona, ndja tungirwe rukuru mba, nu ndja harekerwe ozombura ozengi nḓa kapita i ombara ya Israel onauvara. 12 Nungwari ootate mukururume tjinga ava pindikisa Ndjambi weyuru, eye otja tjita kutja ve haverwe i Nebukadnesar, ombara ya Babilon, indji ombara youhona wOvakaldea. Indji ondjuwo ya Muhona ya haṋewa, notjiwaṋa tja twarewa mouhuura kObabilon. 13 Nu mombura ondenga youhona wa Kirus, ombara ya Babilon, Kirus omuini wa yandja omarakiza wokutja ondjuwo ya Muhona i tungururwe. 14 Eye wa kotora ovitjuma ovingoldo novisilveri vyondjuwo ya Muhona, Nebukadnesar mbya isire mo mu yo mOjerusalem na katwa mondjuwo onḓere mObabilon. Kirus wa yandja ovitjuma mbi komurumendu wena Sesbasar, eye ngwa toorora a rire ongooneya ya Juda. 15 Ombara ye mu raera kutja e vi toore nu e vi yarure kondjuwo ya Muhona mOjerusalem, nu a tungurure ondjuwo ya Muhona poṋa pu ya ri rukuru. 16 Sesbasar otje ya na ziki omazikameno wayo; omatungiro wayo ya kayendisiwa komurungu okuza koruveze ndo nga ku ndinondi, nungwari ondjuwo ya Muhona nga mba kaiya manuka.’

17 “Nambano, tji u nohange, muhona, tjita omakonḓononeno momatjangwa wouhona mObabilon, u tjiwe kutja Kirus tjiri u na pa rakizire kutja ondjuwo ya Muhona mOjerusalem i tungururwe, tjazumba u tu tjivise ombango yoye motjiṋa hi.”