Ovaroma 3 - Herero Revision Bible (HRR)

1 Hapo Ovajuda tji ve na tjo okukapita imba mbe he ri Ovajuda otjikwatjike? Nomasukarekero hapo ye nonḓengu yatjike? 2 Ii, owo ye nonḓengu onene tjinene momuhingo auhe. Rutenga Ndjambi wa yandja embo re kOvajuda. 3 Nungwari tjiva vawo kava ri ovaṱakame. Okuhinouṱakame kwawo indu nai maku yandisa ouṱakame wa Ndjambi are? 4 Kako ka tjiperi nao! Ndjambi omunauatjiri, nomundu auhe omunavizeze otja punga amwa tjangwa momatjangwa:

“Oove omusemba momambo woye,

nu u kara noutoṋi tji mo pangurwa.”

5 Nu hapo ourunde wetu tji mau raisa poruhaera ousemba wa Ndjambi, ngatu tje vi? Ngatu tje, Ndjambi ma tjiti ouhasemba tji me tu vere are? Indi ondi ri epuriro ovandu ndi ve pura. 6 Kako! Ndjambi atja pangura vi ouye ndovazu eye kamusemba?

7 Nungwari ovizeze vyandje tji mavi raisa ongahukiro imbwi ouṱakame wa Ndjambi nokuneneparisa ondjozikiro ye, nu me pangurirwa tjike otja omunauvi? 8 Okutjavi tji tu hi nakutja: “Ngatu tjite ouvi kokutja ouwa a rire tji weya?” Tjiri, pe novandu mbe ndji yamburura mokundjikuminina kutja ami mbi hungira omambo tjingewo nga! Owo mave pangurwa i Ndjambi punga apa pwira wo.

Kape nomundu omusemba

9 Nu pe ri vi? Eṱe Ovajuda oweṱe ovasemba pu imba mbe he ri Ovajuda? Kako ka tjiperi! Ami mba raisa rukuru kutja Ovajuda na imba mbe he ri Ovajuda, avehe pamwe ve ri kehi youvara wourunde. 10 Orondu omatjangwa maye tja:

“Kape nomundu nangarire umwe ngu ri omusemba,

11 kape nomundu omunazondunge

nu ngu paha ombango ya Ndjambi.

12 Avehe va poka ku Ndjambi;

avehe va zunḓaka;

kape na umwe ngu tjita ouwa,

nangarire umwe ke po.

13 Omiriu vyawo vi ri ohamukwao

neyendo ndi ri kamwaha,

nu ve hungira ovineya nomaraka wawo.

Omambo womiṋa vyawo ye

ri otja ouzuwo wozonyoka,

14 ovinyo vyawo vye ura nomasengiro omazeu.

15 Ozombaze zawo ze hakahana

okukahihamisa nokuzepa,

16 akuhe ku mave i, ve isa

omanyoneno nomahahauriro.

17 Nondjira yohange kave na pu ve i tjivirwe.

18 Nu kave na indu va karere nondira ku Ndjambi.”

19 Neṱe matu tjiwa kutja avihe, mbi ri mOmatwako wa Ndjambi vi hungirirwa imba mbe ri kehi yOmatwako nga. Kape nomundu ngu ma sora okutja eye ke nondjo, nouye auhe wa pwa okuverwa i Ndjambi. 20 Punao, kape nomundu ngu ma varwa otja omusemba komurungu wa Ndjambi mokuyenenisa inga omaheero wOmatwako. Nu otjiṋa Omatwako tji ye tjita, ye raisa ourunde wovandu.

Okuvarwa omusemba komurungu wa Ndjambi mena rOngamburiro

21 Nungwari nambano imbwi omuhingo Ndjambi ovandu meve vara kutja ovasemba wa raisiwa. Owo kau notjiṋa nomatwako, nandarire kutja owo wa hongononwa i Omatwako wa Moses novaprofete. 22 Ndjambi ovandu u ve vara otja ovasemba mena rongamburiro yawo mu Jesus Kristus. Ndjambi u tjita nai ku avehe mbe kambura mu Kristus, tjinga ape hi nombangu oparukaze pokati kawo. 23 Avehe ovarunde nu va humburuka kokure na Ndjambi. 24 Nungwari owo avehe ve varwa kutja ovasemba komurungu wa Ndjambi motjimbe tjonguturiro, ndji ri otjiyandjewa tjotjari tje mu Kristus Jesus. 25-26 Ndjambi we mu yandja okurira ombunguhiro, ndji mai eta ohanganisiro mokutirahi ombinḓu ye ku imba mbe kambura mu ye. Ndjambi wa tjita nai a raise kutja eye omusemba. Oruveze orukuru eye wa ri nomuretima kourunde wovandu ne ve isire. Nungwari momayuva wa nambano u raisa kutja omusemba: Eye u pangura osemba, nu auhe ngu kambura mu Kristus u mu vara kutja omusemba.

27 Nu hapo otjiṋa eṱe oveni tji tu rihivira tji pi? Katji po! Nu omena ratjike? Omena rokutja tu nonḓuviro komatwako poo? Kako! Omena rongamburiro. 28 Nu, tjiri, matu tjiwa nawa kutja omundu u varwa otja omusemba komurungu wa Ndjambi mena rongamburiro porwayo, nu kamena rokuṱakamisa inga Omatwako. 29 Poo Ndjambi eye oNdjambi wOvajuda porwe are? Eye ka Ndjambi wa imba mbe he ri Ovajuda wina are? Ii, eye owoviwaṋa vyarwe wina. 30 Ndjambi iumwe uriri, neye, imba Ovajuda naimba mbe he ri Ovajuda meve vara otja ovasemba komurungu we motjimbe tjongamburiro. 31 Nu nambano indu matu isa po Omatwako mena rongamburiro are? Kako! Inga Omatwako matu ye zikamisa.