Ongumbiro yombatero
Epsalme ra David.
1 Muhona, zuva ongumbiro yandje;
puratena komeriyarikaṋeno wandje.
Oove omuṱakame nomusemba,
arikana, ndji zira!
2 O pangura omukarere woye;
kape nomundu ngu he ri
omuhinandjo komurungu woye.
3 Omunavita na ami me ndji tezere,
eye me ndji tombere mehi;
me ndji patere motjovakamburwa monḓorera,
nami mbi ri otja omundu ngwa koka rukuru.
4 Ami mbe rihahiza oparukaze,
nu hi tji nomaundjiro.
5 Me zemburuka omayuva nga kapita,
me ripura na imbi avihe,
mbi wa tjita, nu me rihungirire momutima
imbi oviungura vyomake woye.
6 Ami mbi yera omake wandje kove mongumbiro;
omuinyo wandje u nonyota yoye
tjimuna ehi nda kukuta.
7 Arikana, hakahana okundjizuvira, Muhona!
Mba urwa mombepo yandje.
O horeke omurungu woye ku ami
kutja e ha sana na imba mbe ri momaendo.
8 Ndji esa mbi mune orusuvero
rwoye omuhuka auhe,
orondu tjinga ambe riyameka kove.
Ndji urikira ondjira, ndji mbi
sokutwara, orondu omaundjiro
wandje ya zikama move.
9 Ndji yama kovanavita na ami, Muhona,
orondu oove ngu u ri omaundiro wandje.
10 Ndji honga okuyenenisa ombango yoye,
orondu ove tjinga au ri Ndjambi wandje!
Ombepo yoye ombwa ngai ndji
hongorere mondjira ndja seruka.
11 Motjimbe tjena roye, Muhona,
ndji kareka nomuinyo;
oove omusemba ndji yama mombamisiro!
12 Yandeka ovanavita na ami otja
korusuvero rwoye
novendjipirukire avehe wina,
orondu owami omukarere woye.
© Herero Revision Bible © Bible Society in Namibia, 2021.
